دارىگەرلەر دەنەسىن 80 پايىز كۇيىك شالعان استانالىق ءورت ءسوندىرۋشىنىڭ ءومىرىن ساقتاپ قالا المادى
«بۇگىن اۋرۋحانادا جاتقان ءورت ءسوندىرۋشى اسقار زابيكۋلين قايتىس بولدى. ونىڭ ءومىرىن امان الىپ قالۋ ءۇشىن دارىگەرلەر بىرنەشە تاۋلىك بويى ايانباي ەڭبەك ەتتى. اسقار استانا قالاسىندا بولعان ءورت كەزىندە ادامداردىڭ ءومىرىن قۇتقارۋ كەزىندە باتىرلىق تانىتتى. توتەنشە جاعدايلار مينيسترلىگىنىڭ ۇجىمى اسقار زابيكۋليننىڭ تۋعان-تۋىستارىنا، جاقىندارىنا قايعىرا كوڭىل ايتادى. ول ءوز ءىسىنىڭ مامانى رەتىندە جادىمىزدا ماڭگى قالادى»، - دەدى ق ر توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆ.
ءورت ءسوندىرۋشىنىڭ ارتىندا جولداسى مەن 2 بالاسى قالدى.
«اسقار اقجارقىن ادام، جاۋاپتى قىزمەتكەر، كاسىبي ءورت ءسوندىرۋشى جانە ساۋاتتى مامان بولدى. ارىپتەستەرى اراسىندا ءادىل، ءوز ماماندىعىن سۇيەتىن قىزمەتكەر رەتىندە قۇرمەتكە يە. اسقاردىڭ ايەلى مەن ەكى بالاسى قالدى. توتەنشە جاعدايلار مينيسترلىگى قايتىس بولعان ءورت ءسوندىرۋشىنىڭ وتباسىنا جان-جاقتى كومەك كورسەتەدى»، - دەدى رەسمي وكىل.
ايتا كەتەيىك، ەلوردادا كوپقاباتتى ۇيدە ءورت بولىپ، 3 ادام، ونىڭ ىشىندە 1 بالا اۋرۋحاناعا ءتۇستى.
ال 3 ادامدى قۇتقارعان استانالىق ءورت ءسوندىرۋشى اسقار زابيكۋليندى %80 كۇيىك شالىپ، جانساقتاۋ بولىمىنە جاتقىزىلدى. سونداي-اق، وعان دوستارى كومەك جينادى.
ودان بولەك، مەملەكەت باسشىسى ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.
كۇنى كەشە، ونىڭ وتباسىنا ءۇش بولمەلى پاتەردىڭ سەرتيفيكاتى تابىستالعان بولاتىن.
