رەسەي ۋكراينا اۋماعىنا ءبىر كۇننىڭ وزىندە 80-نەن استام قاناتتى زىمىرانمەن سوققى بەردى
ماسكەۋدىڭ بۇل ارەكەتىنەن كەيىن باتىس ەلدەرى ۋكراينادا تۇتاستاي جاڭا اۋە قورعانىس جۇيەسىن قۇرۋ تۋرالى شەشىم قابىلدادى. تاقىرىپتى حالىقارالىق شولۋشى اراي تولەگەن قىزى جالعاستىرادى.
قازاننىڭ 10- كۇنى رەسەي ۋكراينانىڭ قالالارى مەن ەلدىمەكەندەرىنە زىمىراندارمەن جويقىن شابۋىل جاسادى. 19 ادام قازا تاۋىپ، ونداعان تۇرعىن جارالاندى. زىمىران سوققىسىنان كەيىن ىستەن شىققان ەنەرگەتيكالىق ينفراقۇرىلىم ءالى تولىقتاي قالپىنا كەلگەن جوق. رەسەي بولسا، شابۋىلدى وتكەن اپتادا قىرىم كوپىرىندە بولعان جارىلىس ءۇشىن كەك الۋ دەپ مالىمدەدى.
ايتا كەتۋ كەرەك، قىركۇيەكتىڭ باسىنان بەرى رەسەي جاۋىنگەرلەرى ۇرىس دالاسىندا ساتسىزدىكتەرگە ۇشىراپ جاتىر. ال ۋكراينا ارمياسى ولاردىڭ مايدان شەپتەرىن بۇزىپ، سولتۇستىك- شىعىس پەن وڭتۇستىكتە مىڭداعان شارشى شاقىرىم اۋماقتى ازات ەتتى. پرەزيدەنت ۆلاديمير زەلەنسكيدىڭ سوزىنشە، سوڭعى كۇندەرى ەلدىڭ بىرنەشە وبلىسىندا قارۋلى قاقتىعىس بەلسەندى تۇردە ءجۇرىپ جاتىر. جاعداي اسىرەسە دونەتسك جانە لۋگانسك وبلىستارىندا كۇردەلى.
ۆلاديمير زەلەنسكي، ۋكراينا پرەزيدەنتى:
سوڭعى كۇندەرى رەسەي سوققى بەرۋدى كۇشەيتتى. شابۋىلعا زىمىراندار مەن يراندىق دروندار قولدانىلىپ جاتىر. دونباس، زاپوروجە، نيكولايەۆ، حاركوۆ جانە باسقا دا اۋدانداردا ادامدار قازا تاۋىپ، نىساندار قيرادى.
رەسەي ۋكراينانىڭ اسا ماڭىزدى ينفراقۇرىلىم نىساندارىنا جويقىن سوققى بەرگەننەن كەيىن، باتىس ەلدەرىنىڭ جوسپارى وزگەردى. ا ق ش پەن ونىڭ وداقتاستارى بريۋسسەلدە كەزدەسىپ، ۋكراينادا جاڭا اۋە قورعانىس جۇيەسىن قۇرۋعا كەلىستى. ونىڭ اياسىندا كيەۆكە گەرمانيادان سۋ جاڭا زەنيتتىك- زىمىراندىق كەشەن جەتتى. «ايريس – تي» اتتى بۇرىن- سوڭدى قولدانىستا بولماعان قارۋ نىساندى ۇشاقتاردان، تىكۇشاقتاردان جانە قاناتتى زىمىرانداردان 360 گرادۋستا قورعاي الادى. سونىمەن بىرگە تاياۋدا ۋكراينا ارمياسىنىڭ ارسەنالى نورۆەگيا مەن ا ق ش بىرلەسىپ جاساعان NASAMS زىمىران كەشەنىمەن تولىعادى. ال ا ق ش ۋكرايناعا 725 ميلليون دوللار كولەمىندە جاڭا اسكەري كومەك بەرەتىنىن مالىمدەدى.
جوزەف بوررەل، ەۋروپالىق وداقتىڭ سىرتقى ساياسات جونىندەگى جوعارعى وكىلى:
رەسەي شيەلەنىستى كۇشەيتىپ جاتقان شاقتا ءبىز ۋكرايناعا قولداۋ كورسەتە بەرەمىز. جانە بۇل كومەك قاجەت بولعان مەرزىمگە دەيىن جالعاسا بەرەدى. اسكەري قولداۋ كورسەتە وتىرىپ، قاقتىعىستى ديپلوماتيالىق جولمەن شەشۋدى دە كوزدەيمىز.
رەسمي ماسكەۋدىڭ مالىمدەۋىنشە، باتىس كيەۆكە قارۋ بەرۋ ارقىلى قاقتىعىستى ءورشىتىپ وتىر. استاناداعى سامميتتەن كەيىن وتكەن باسپا ءسوز ءماسليحاتىندا رەسەي پرەزيدەنتى ۆلاديمير پۋتين الدا ۋكراينانى جويۋ مىندەتى تۇرعان جوق دەپ مالىمدەدى. سونىمەن بىرگە رەسەيدە ءىشىنارا موبيليزاتسيا جاريالانعاننان كەيىن ەلدەن كەتكەن ازاماتتارعا قاتىستى ءوز پىكىرىن ءبىلدىردى. بۇل جاعدايعا ەموتسيالىق ەمەس، زاڭدىق تۇرعىدا باعا بەرۋ كەرەكتىگىن جانە وسى نەگىزدە عانا ارەكەت ەتۋ قاجەت ەكەنىن ايتتى. پۋتين ەلدەن بىرەۋى قورىققاننان، ەكىنشىسى موبيليزاتسيادان قاشۋ ءۇشىن، وزگەلەرى باسقا دا سەبەپتەرمەن كەتۋى مۇمكىن دەپ جاۋاپ بەردى.
ۆلاديمير پۋتين، رەسەي پرەزيدەنتى:
قورعانىس مينيسترلىگى باستاپقىدا اسكەر قاتارىنا 300 مىڭ ەمەس، بۇدان دا از ادامدى الۋدى ۇيعاردى. بۇعان قوسىمشا ەشتەڭە جوسپارلانىپ وتىرعان جوق. موبيليزاتسيا ەكى اپتادان كەيىن اياقتالادى.
دەگەنمەن ا ق ش- تىڭ سوعىستى زەرتتەۋ ينستيتۋتىنىڭ مالىمدەۋىنشە، ەكى اپتادان كەيىن رەسەيدە كۇزگى اسكەر قاتارىنا شاقىرۋ باستالادى. ناۋقان قاراشانىڭ 1-نەن جەلتوقساننىڭ سوڭىنا دەيىن جالعاسادى. ال سەنبىدە ەلدىڭ بەلگورود وبلىسىندا ۋكرايناعا قارۋلى قاقتىعىسقا بارۋعا نيەت بىلدىرگەن ەرىكتىلەر جاتتىعاتىن پوليگوندا اتىس بولدى. 11 ادام قازا تاۋىپ، 15- ءسى جارالانعان. وقيعانىڭ ءمان- جايى انىقتالىپ جاتىر.
https://qazaqstan.tv
