قازاقستان تۇرىكمەنستانعا 80 تاۋار پوزيتسياسى بويىنشا ەكسپورتتى ارتتىرا الادى
«قازاقستان تۇرىكمەنستانعا 80 تاۋار پوزيتسياسى بويىنشا ەكسپورتتى ارتتىرا الادى. تۇرىكمەن كاسىپكەرلەرى ءوز ونىمدەرىن ءبىزدىڭ نارىققا جەتكىزۋدى ۇلعايتا الاتىنىنا سەنىمدىمىن. ءبىز وسى ماقساتقا جەتۋ ءۇشىن قولدان كەلگەننىڭ ءبارىن جاسايمىز. ءونىمنىڭ سۋبسيديالانعان جەتكىزىلىمىن كەڭەيتۋ مۇمكىندىگىنىڭ بار ەكەندىگىن دە اتاپ وتتىك. پەرسپەكتيۆالى كوممەرتسيالىق كەلىسىمشارتتار «قازاق ەكسپورت» ساقتاندىرۋ كومپانياسىنىڭ ەكسپورت جەلىسى بويىنشا ىسكە اسىرىلۋى مۇمكىن»، - دەدى قاسىم-جومارت توقايەۆ.
ق ر پرەزيدەنتى 2024-جىلعا دەيىن ەكىجاقتى ىنتىماقتاستىقتى نىعايتۋ جونىندەگى كەشەندى باعدارلامانى ىسكە اسىرۋ ەكى ەلدىڭ ساۋدا-ەكونوميكالىق سەرىكتەستىگىن تەرەڭدەتۋگە ىقپال ەتەتىنىن باسا ايتتى.
«ءبىزدىڭ ماقساتىمىز - الداعى جىلدارى ءوزارا ساۋدانىڭ 500 ميلليون دوللارعا دەيىن ءوسۋىن قامتاماسىز ەتۋ. جانە دە جاقىن بولاشاقتا ءبىز ميللياردتىق مەجەگە دە شىعا الامىز. ول ءۇشىن تاۋار اينالىمىن ۇلعايتۋ جانە جەتكىزىلەتىن تاۋارلار نومەنكلاتۋراسىن كەڭەيتۋ جونىندەگى ەكىجاقتى جۇمىس توبىنىڭ قىزمەتىن جانداندىرۋدى تاپسىردىق. ءبىزدىڭ تاپسىرمامىز بويىنشا ەكى ەلدىڭ ۇكىمەتتەرى وسى مۇمكىندىكتەردىڭ بارلىعىن پىسىقتايدى»، - دەدى مەملەكەت باسشىسى.
