اجەلەر بايقاۋى: 80 جاستاعى اقمولالىق «اسىل اجە» اتاعىنا يە بولدى
بايقاۋدى اقمولا وبلىستىق حالىق شىعارماشىلىق جانە مادەني دەمالىس ورتالىعى حالقىمىزدىڭ سالت- ءداستۇرى مەن ادەت- عۇرپىن دارىپتەۋگە ارنالعان «ءداستۇر مەن عۇرىپ» ارنايى جوباسىنىڭ تۇجىرىمداماسى شەڭبەرىندە ۇيىمداستىردى. وعان وڭىردەگى قالالىق، اۋداندىق مادەنيەت ۇيلەرىنىڭ جولداماسىمەن جاسى 60-تان اسقان نەمەرە، شوبەرە تاربيەلەپ وتىرعان اجەلەر قاتىسىپ، باق سىنادى.
بايقاۋ ءتورت كەزەڭنەن تۇردى، ونى ىشىندە « قىزىم ساعان ايتام...» جانە تانىستىرۋ كەزەڭىندە اجەلەر ۇمىتىلىپ بارا جاتقان، سيرەك قولدانىلاتىن كونە سوزدەردىڭ ماعىناسىن اشىپ، ءتۇسىندىردى. سونداي- اق، ۇلتتىق تاعام تۇرلەرىن ازىرلەۋدەن سايىستى. «ونەرپاز اجە» كەزەڭىندە «بەسىك جىرى» جانە وزگە دە ۇمىت بولىپ بارا جاتقان ەسكى اندەردى ورىنداپ، ۇلتتىق بي بيلەدى. ال «بارماقتارى مايىسقان» كەزەڭدە وزدەرىنىڭ قولدارىنان شىققان بۇيىمداردان كورمە ۇيىمداستىردى.
اق جاۋلىقتى اجەلەردىڭ ونەرىنە ق ر ەڭبەك سىڭىرگەن ءارتىسى، كوكشەتاۋ قالاسىنىڭ قۇرمەتتى ازاماتى، ءداستۇرلى ءانشى، قازىلار القاسىنىڭ ءتورايىمى بيسارا ماكەنوۆا، ستەپنوگور قالالىق ارداگەرلەر جانە انالار كەڭەسىنىڭ ءتورايىمى فاريدا ەسجانوۆا، رەسپۋبليكالىق «جىگىت سۇلتانى» بايقاۋىنىڭ جەڭىمپازى، «ق ر تاۋەلسىزدىگىنە 30 جىل» مەدالىنىڭ يەگەرى، وبلىستىق حالىق شىعارماشىلىق جانە مادەني دەمالىس ورتالىعىنىڭ ءبولىم باسشىسى اسىلبەك ابەنوۆ ءتارىزدى قازىلار باعا بەردى.
«بۇگىنگى وتكىزىپ وتىرعان بايقاۋىمىزدىڭ باستى ماقساتى، وتباسىلىق قۇندىلىقتارعا نەگىزدەلگەن ءداستۇرلى تاربيەنى ناسيحاتتاۋ، ۇلتىمىزدىڭ قاسيەتتى قازىناسى سالت- داستۇرلەردى، ادەت- عۇرىپتاردى مۇرا ەتۋ، اجە تاربيەسىن وسكەلەڭ ۇرپاققا ونەگە، ۇلگى ەتۋ، اجەلەرگە لايىقتى قولداۋ كورسەتۋ جانە كوپشىلىككە ناسيحاتتاۋ»، - دەپ اتاپ ءوتتى اقمولا وبلىستىق مادەنيەت باسقارماسىنىڭ باسشىسى ايگۇل ءسابيتوۆا.
بايقاۋ قورىتىندىسى بويىنشا سەلينوگراد اۋدانىنان تۇيمەقىز رىسپايەۆا «شەبەر اجە» اتالىمى، ارشالى اۋدانىنان شىرىنگۇل ۇزاقبايەۆا «ونەگەلى اجە» اتالىمى، بۋراباي اۋدانىنان زەلتاي تۇگەلبايەۆا «مەيىربان اجە» اتالىمى، شورتاندى اۋدانىنان جۇپار ءجۇسىپوۆا «دانا اجە» اتالىمى، ءبىرجان سال اۋدانىنان باقىت جەكسەنوۆا «پاراساتتى اجە» اتالىمى، بۋراباي اۋدانىنان باحىت ەلەمانوۆا «ۇلاعاتتى اجە» اتالىمى، اقكول اۋدانىنان گۇلسارا قۇماربەك «بايسالدى اجە» اتالىمى، قورعالجىن اۋدانىنان توقتار ەلەۋوۆا «بىلگىر اجە» اتالىمى، اتباسار اۋدانىنان روزا ءتاشىموۆا «كورىكتى اجە» اتالىمى، جارقايىڭ اۋدانىنان رايسا موتەنوۆا «مەيىرىمدى اجە» اتالىمى، ستەپنوگور قالاسىنان باعيلا مۇراتوۆا «ءانشى اجە» اتالىمى بويىنشا جۇلدەگەر اتاندى.
ال باس جۇلدە «اسىل اجە» اتاعىنا استراحان اۋدانىنان كەلگەن 80 جاستاعى شولپان قاسىموۆا لايىق دەپ تانىلدى. بايقاۋ قاتىسۋشىلارى مەن جۇلدەگەرلەرى باعالى سىيلىقتارمەن جانە ديپلودارمەن ماراپاتتالدى.
اۆتور: اسلان وسپانوۆ
