قىسقى وليمپيادا: ۇلتتىق قۇرامانىڭ 80 پايىزى «دينامو» قوعامىنان شىققان
بۇل تۋرالى ق ر ىشكى ىستەر مينيسترلىگىنىڭ باسپا ءسوز قىزمەتى جاريالادى، دەپ حابارلايدى قازاقپارات.
«وتكەن اپتادا ۇلتتىق قۇراما XXIV قىسقى وليمپيادا ويىندارىنا قاتىسۋ ءۇشىن بەيجىڭگە ۇشىپ كەتتى. قازاقستاندىقتار سپورتتىڭ 8 تۇرىنەن 82 وليمپيادالىق ليتسەنزيا جەڭىپ العان بولاتىن. ونىڭ ىشىندە بياتلون، شورت-ترەك، كونكيمەن جۇگىرۋ جانە تاۋ شاڭعىسى سپورتى، فريستايل-اكروباتيكا جانە تاعى باسقا سپورت تۇرلەرى بار. ۇلتتىق وليمپيادالىق كوماندا قۇرامىنا كىرگەن 32 سپورتشىنىڭ 28 ءى - ديناموشىلار»، - دەلىنگەن مينيسترلىك حابارلاماسىندا.
سونىمەن بىرگە، تاۋەلسىزدىك جىلدارى قازاقستاندىق سپورتشىلار جەڭىپ العان 72 وليمپيادالىق مەدالدىڭ 60 ى «دينامو» قوعامىنىڭ وكىلدەرىنە تيەسىلى.
ايتا كەتۋ كەرەك، ۇلتتىق قۇراما كوماندالارىنىڭ %80 دان استامىن دينامو سپورتشىلارى قۇرايدى. ولار ءارتۇرلى سپورت تۇرلەرى بويىنشا ونەر كورسەتەدى. سونداي-اق 44 وليمپيادالىق سپورت ءتۇرىنىڭ 36 سى «دينامودا» دايىندالادى.
«دينامو» دەنە شىنىقتىرۋ- سپورت قوعامى - قۇقىق قورعاۋ ورگاندارى قىزمەتكەرلەرىنىڭ دەنە شىنىقتىرۋ جانە ارنايى دايارلىعىنا جاردەمدەسەتىن ەلدەگى ەڭ كونە سپورت ۇيىمدارىنىڭ ءبىرى.
توقسان مىڭنان استام قۇقىق قورعاۋ ورگاندارىنىڭ قىزمەتكەرى - وسى قوعامنىڭ مۇشەسى. ولار 15 اۋماقتىق فيليالداعى 445 دەنە شىنىقتىرۋ ۇجىمىنا بىرىكتىرىلگەن. ودان بولەك، بۇل قوعام - بۇقارالىق سپورتتى، دەنە شىنىقتىرۋ-سپورت قوزعالىسىن، جاستاردى تاربيەلەۋ باعىتىندا قىزمەت اتقاراتىن بىرەگەي سپورت ۇيىمى.
