الماتى وبلىسىندا 80 جىلقى ۇرلاعان بارىمتاشىلار ۇستالدى

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ءبىر اپتا بۇرىن جامبىل اۋدانىنىڭ پوليتسياسىنا 38 جاستاعى جەرگىلىكتى تۇرعىن ارىزدانىپ، وزىنە تيەسىلى شارۋا قوجالىعىنان 80 جىلقىنىڭ قولدى بولعانىن جانە 40 ميلليون تەڭگەگە جۋىق ماتەريالدىق شىعىن كەلگەنىن ايتقان.

قىلمىستى اشۋعا باعىتتالعان جەدەل-ىزدەستىرۋ شارالارى بارىسىندا كۇدىككە ىلىنگەن ەكى ادام ۇستالدى. ونىڭ ءبىرى - 29 جاستاعى وزبەكستان ازاماتى. ول زارداپ شەگۋشىنىڭ شارۋا قوجالىعىندا مالشى بولىپ جۇمىس ىستەگەن.

ەكىنشى كۇدىكتى جامبىل اۋدانى كوكدالا اۋىلىنىڭ 39 جاستاعى تۇرعىنى، كورشىسىنىڭ ادال مالىنا ارامدىق جاساپ، قول سالعان جاقىن ماڭداعى وزگە شارۋا قوجالىعىنىڭ يەسى بولىپ شىققان. كۇدىكتىلەر بۇلتارتپاس ايعاقتاردىڭ ارقاسىندا وسى قىلمىسقا قاتىسى بارىن مويىندادى.

ءتارتىپ ساقشىلارى قولدى بولعان مالدى ىزدەستىرۋ بارىسىندا 36 جىلقىنى تاۋىپ، يەسىنە قايتاردى. قالعان جىلقىنىڭ سويىلىپ كەتكەنى انىقتالدى. تەرگەۋ بارىسىندا كۇدىكتىلەر شارۋا قوجالىعىنان جىلقىلاردى ۇزاق ۋاقىت بويى ۇرلاپ كەلگەنى جانە مال يەسىنىڭ پوليتسياعا ارىزدانباعانىن وڭتايلى پايدالانعانى بەلگىلى بولدى.

بارىمتاشىلار اۋەل باستا 2-3، كەيدە 5 جىلقىنى ۇرلاعان. ولار جالپى سانى 80 جىلقى ساتسا، ونىڭ 35 ى قۇلىندى بيە بولعان. وڭاي جولمەن تابىلعان قارجىنى ءوز قاجەتتەرىنە جاراتىپ وتىرعان. ەكى كۇدىكتى جامبىل اۋدانى پوليتسياسىنىڭ ۋاقىتشا ۇستاۋ يزولياتورىنا قاماققا الىندى.

اتالعان دەرەك بويىنشا قولدانىستاعى قىلمىستىق زاڭنامانىڭ 188-1-بابى 4-بولىگىنىڭ 2-تارماعىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى