كوروناۆيرۋستىڭ 80 پايىزى جەڭىل فورمادا وتەدى - مامان پىكىرى
«كوروناۆيرۋس ءبىزدىڭ ەلىمىزگە كەلگەن جوق، ەل اۋماعىندا تىركەلگەن جوق. ءبىراق ونىڭ ءوز قاعيدالارى بار جانە مۇندا مەديتسينالىق ماسكا باستى قۇرال ەمەس. مۇندا ءبىز ايتقان پروفيلاكتيكالىق شارالاردى ورىنداپ، تۇشكىرۋ مادەنيەتىن ساقتاۋ قاجەت. ماسەلەن، اۋرۋ ادام تۇشكىرىپ، تۇتقانى ۇستايدى. ىزىنشە ساۋ ادام كەلىپ، سول تۇتقانى ۇستايدى. ءارى قاراي كوزىن، اۋزىن ۇستاسا، اۋرۋ جۇعادى. سوندىقتان، باستى نازاردى ماسكاعا اۋدارماي، جەكە گيگيەنا تالاپتارىن ساقتاۋ قاجەت. باستى پروفيلاكتيكالىق قۇرال - ماسكا ەمەس، جەكە گيگيەنا» ، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز قىزمەتىندە.
ونىڭ ايتۋىنشا، كوروناۆيرۋس اۋرۋىنىڭ 80 پايىزى جەڭىل فورمادا وتەدى.
«كوروناۆيرۋس اۋرۋىنىڭ 80 پايىزى جەڭىل فورمادا وتەدى. سوندىقتان، دۇرلىكپە تۋدىرىپ، ۋايىمعا سالىنۋعا بولمايدى. ايتسە دە، الدىن الۋ شارالارىن ۇمىتپاعانىمىز ءجون. اۋرۋدى جەڭۋدىڭ، ۆيرۋستى تاراتپاۋدىڭ 50 پايىزى ءسىز بەن ءبىزدىڭ ارەكەتىمىزگە بايلانىستى. قوعامدىق ورىندارعا ءجيى بارماڭىز، اۋرۋ تىركەلدەرگەن مەملەكەتتەرگە بارۋدان باس تارتىڭىز» ، - دەدى د. باەشيەۆا.
بۇعان دەيىن دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ» باس ديرەكتورى ارنۇر نۇرتايەۆ ەلىمىزدەگى مەديتسينالىق ماسكا جەتىسپەۋشىلىگى ماسەلەسىن تۇسىندىرگەن ەدى.
ايتا كەتەيىك، قازىرگى ۋاقىتتا الەمدە COVID-19 ۆيرۋسىن جۇقتىرعاندار سانى 90893 ادام جانە ودان 3110 ادام قايتىس بولدى.
سوڭعى 48 ساعاتتا قىتايدان تىسقارى جەردە تىركەلگەن 1848 ناۋقاستىڭ %80 ى ءۇش ەلگە تيەسىلى: يران، يتاليا جانە وڭتۇستىك كورەيا.
