سەكسەن جىلدىققا - 80 سۋرەت: تارازدا ەرەكشە فوتوپوەزيا كورمەسى ءوتتى
كورمەنىڭ ەرەكشەلىگى - فوتوسۋرەت پەن پوەزيا ونەرىنىڭ ءوزارا ۇندەسىپ، كەلۋشىلەرگە ادەمى اسەر سىيلاعانى بولدى، دەپ حابارلايدى قازاقپارات ءتىلشىسى.
كورمەدە قازاقستان جۋرناليستەر وداعىنىڭ مۇشەسى، جامبىل وبلىستىق «اراي» جاستار گازەتىنىڭ فوتوتىلشىسى التىنبەك قارتابايدىڭ فوتو سۋرەتتەرى قويىلدى. تاراز قالالىق اكىمدىگىنىڭ ۇيىمداستىرۋىمەن وتكەن شارا جامبىل وبلىسىنىڭ 80 جىلدىعىنا ارنالدى.
ءبىر قىزىعى، كورمە شىمىلدىعى اشىق اسپان استىنداعى كلاسسيكالىق ۆالسپەن اشىلدى. سودان كەيىن جۇرگىزۋشى ورتاعا شىعىپ، كارتينالاردىڭ بەتپەردەلەرىن اشا ءجۇرىپ ولەڭ وقىدى. وسى ساتتە وڭىردەگى «اقكەربەز» بيشىلەر توبىنىڭ ۇلتتىق ناقىشتا كيىنگەن ارۋلارى دا بارلىق كارتينالاردىڭ بەتپەردەلەرىن اشىپ، ولاردى كوپشىلىك نازارىنا ۇسىندى.
التىنبەك قارتاباي ءوزىنىڭ تۇڭعىش شىعارماشىلىق كورمەسىن اقىنداردىڭ ولەڭدەرىمەن كەرەمەت ۇيلەستىرە بىلۋىمەن دە ەرەكشەلەندى دەۋگە بولادى. فوتوتىلشى قازاقتىڭ ارۋ قىزدارى، سونىمەن قاتار التىن كۇز، اقىندار بەينەسى، تابيعات كورىنىستەرى سياقتى كوركەم كورىنىستەردى دە قالت جىبەرمەگەن. ال، بۇل شىعارمالار جاقسىلىق ساتىبەكوۆ، ارعىنباي بەكبوسىن، تىنىشباي راقىم، كۇلاش احمەتوۆا، سەرىك تومانوۆ، مارالتاي رايىمبەك ۇلى سياقتى اقىنداردىڭ ولەڭدەرىمەن جاقسى جاراسىم تاۋىپ، كورمەنى تاماشالاۋشىلارعا كەرەمەت كۇي سىيلادى.
فوتوپوەزيا كورمەسىن تاماشالاۋعا كەلگەن جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا مۇنداي كەشتىڭ تاراز توپىراعىندا تۇڭعىش رەت ۇيىمداستىرىلىپ وتىرعانىن اتاپ ءوتىپ، كورمە يەسىنىڭ جۇمىسىنا ساتتىلىك تىلەدى.
بۇل كۇنى كورمە يەسى جامبىل وبلىسىنىڭ 80 جىلدىعىنا وراي كوپشىلىك نازارىنا 80 سۋرەت ۇسىندى. ونىڭ ىشىندە ءوڭىر تاريحىنان سىر شەرتەتىن تۋىندىلار دا بار.
«تۋعان جەردىڭ، قورشاعان ورتانىڭ كەرەمەت سۇلۋلىعىن كورمەۋ مۇمكىن ەمەس. مەن بۇل كورمەدە ءوزىمنىڭ فوتوتۋىندىلارىممەن قوس ونەردى بىرىكتىرىپ، اقىندار شىعارماشىلىعىن دا وسى كەشكە ارقاۋ ەتۋدى ماقسات ەتتىم» ، - دەيدى التىنبەك قارتاباي.
