پەتروپاۆلداعى كوكتايعاق: ءبىر تاۋلىكتە 80 نەن استام ادام جاراقاتتاندى

تراۆمپۋنكت مەڭگەرۋشىسى ۆالەري گريباشوۆتىڭ اقپاراتى بويىنشا، كەلۋشىلەردىڭ 66 سى كوشەدە جاراقات السا، 11 ادام اۋرۋحاناعا جاتقىزىلعان، ولاردىڭ كەيبىرى شۇعىل ەم الۋى كەرەك.

«جەتى ادامنىڭ توبىعى، ءبىر ادامنىڭ ومىرتقاسى، ءۇش ادامنىڭ جىلىنشىگى، جەتى ادامنىڭ يىعى، 16 ادامنىڭ بىلەگى جانە 3 ادامنىڭ قابىرعاسى سىنعان. بەس ادام جول-كولىك وقيعاسى سالدارىنان جاراقات العان. كومەك كورسەتىلگەننەن كەيىن بارلىعى ۇيلەرىنە قايتارىلدى»، - دەدى ۆالەري گريباشوۆ.

كوكتايعاق سالدارىنان سولتۇستىك قازاقستاندىق بالالار دا جاراقات العان. وبلىستىق بالالار اۋرۋحاناسىنىڭ باس دارىگەرى ولەگ زاۆيالوۆتىڭ اقپاراتى بويىنشا، ولارعا ءبىر تاۋلىكتىڭ ىشىندە بەس ادام كەلگەن. ەكى بالا اۋرۋحاناعا جاتقىزىلعان. ءبىر بالانىڭ بىلەگى سىنسا، تاعى ءبىر بالانىڭ ميى شايقالعان.

ەسكە سالايىق، كەشە پەتروپاۆلدا اۋا تەمپەراتۋراسىنىڭ تومەندەپ، جاڭبىر جاۋۋى سالدارىنان قالا مۇز ايدىنىنا اينالدى. ءبىر تاۋلىكتىڭ ىشىندە وبلىستا 20 جول-كولىك وقيعاسى تىركەلسە، سونىڭ باسىم بولىگى قالادا بولعان.

فوتو: primorye24.ru

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى