تەاتر ساڭلاعى، ق ر حالىق ءارتيسى اسانالى ءاشىموۆ 80 جاسقا تولادى
دەپ حابارلايدى قازاقپارات.
اسانالى ءاشىموۆ 1937 -جىلى 8 - مامىردا جامبىل وبلىسى، سارىسۋ اۋدانى، ساۋداكەنت (بۇرىنعى بايقادام) اۋىلىندا دۇنيەگە كەلگەن. 1956-1961 -جىلدارى قۇرمانعازى اتىنداعى قازاق ۇلتتىق كونسەرۆاتورياسىنىڭ تەاتر فاكۋلتەتىن اكتەر ماماندىعى بويىنشا وقىپ- ءبىتىرىپ، «قازاقفيلم» كينوستۋدياسىنا اكتەرلىك شتاتقا قابىلدانادى. ال 1964 -جىلدان بەرى م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءۇزىلىسسىز ەڭبەك ەتىپ كەلەدى. تەاتردا نەگىزىنەن باستى رولدەردى سومداعان اكتەر م. اۋەزوۆتىڭ «ابايىندا» ايدار، كەرىم، «ەڭلىك- كەبەگىندە» - كەبەك، «قاراقىپشاق قوبىلاندىسىندا» - ايشۋاق، «تاڭعى جارىعىندا» - جاراسباي، ع. مۇسىرەپوۆتىڭ «قوزى كورپەش - بايان سۇلۋىندا» - قودار، ن. حيكمەتتىڭ «ەلەۋسىز قالعان ەسىل ەرىندە» - اسسيستەنت، ق. مۇحامەدجانوۆتىڭ «جات ەلدە» دراماسىندا - اسان اقىن، ت. احتانوۆتىڭ «بورانىندا» - قاسبولات، ش. ايتماتوۆ پەن ق. مۇحامەدجانوۆتىڭ «كوكتوبەدەگى كەزدەسۋىندە» - يوسيف تاتايەۆيچ، ءا. نۇرپەيىسوۆتىڭ «قان مەن تەرىندە» - ەلامان، ءا. تارازيدىڭ «كۇلمەيتىن كومەدياسىندا» - ءسانجان، ي. ۆوۆنيانكونىڭ «اپاتىندا» - اسان قارت، شەكسپيردىڭ «يۋليي سەزارىندە» - يۋلي سەزار، م. فريشتىڭ «دون جۋاننىڭ دۋمانىندا» - دون جۋان، گ. گاۋپتماننىڭ «ىمىرتتاعى ماحابباتىندا» دوكتور كلاۋزەن جانە ت. ب. كوپتەگەن رولدەرىمەن ۇلتتىق اكتەرلىك مەكتەپتىڭ دامۋىنا ولشەۋسىز ۇلەس قوستى.
وتىزدان اسا فيلمگە تۇسكەن اكتەرد قازاق كينو ونەرىن جاڭا بەلەستەرگە كوتەرۋ ءۇشىن كوپ ەڭبەك ءسىڭىردى. ۇلتتىق كينونىڭ ءتولقۇجاتىنداي بولعان «قىز جىبەكتەگى» بەكەجان، «اتاماننىڭ اقىرى» مەن «ترانسءسىبىر جۇردەك پويىزىنداعى» قاسىمحان شادياروۆ بەينەلەرى ونىڭ ەسىمىن شەت ەلدەردە تانىمال ەتتى. ا. ءاشىموۆ تەاتر مەن كينو سالاسىندا رەجيسسەرلىك قىزمەت ەتۋىمەن قاتار، ونەر قايراتكەرى رەتىندە ەلىمىزدەگى جانە شەتەلدەردەگى مادەني شارالارعا بەلسەندى ات سالىسادى. سونىمەن قاتار، ت. جۇرگەنوۆ اتىنداعى قازاق ۇلتتىق ونەر اكادەمياسىندا ءدارىس بەرىپ، تەاتر ونەرىنىڭ دامۋىنا وزىندىك ۇلەس قوسىپ جۇرگەن، كوپتەگەن شاكىرتتەردى تاربيەلەگەن ۇلاعاتتى ۇستاز.
اكتەردىڭ تاعى ءبىر قىرى - جازۋشىلىق. ونىڭ «مايرانىڭ ءانى» (1995)، 5 تومدىق شىعارمالار جيناعى (2007)، «س ليۋبوۆيۋ، ۆاش اسانالي اشيموۆ» (2008)، «عۇمىر- داريا» (2012) جيناقتارى قالىڭ وقىرماننىڭ سۇيىكتى شىعارمالارىنا اينالدى. ا. ءاشىموۆ بۇگىنگى تاڭدا م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى جانە قازاقستان تەاترلار قاۋىمداستىعىنىڭ ءتوراعاسى رەتىندە ۇلتتىق ساحنا ونەرىنىڭ وركەندەۋىنە مول تاجىريبەسىمەن، ابىروي- بەدەلىمەن ەلەۋلى ۇلەس قوسىپ ءجۇر. اسانالى ءاشىموۆتىڭ ۇلتتىق ونەرگە قوسقان وراسان زور ەڭبەگى مەملەكەت تاراپىنان جوعارى باعالاندى.
ول قازاقستاننىڭ حالىق ءارتيسى (1976)، ك س ر و حالىق ءارتيسى (1980)، سونداي- اق «تارلان» تاۋەلسىز سىيلىعىمەن (2000)، «وتان» (2001)، «قۇرمەت» (2007)، «پاراسات» (2007)، «دوستىق» (2014)، ق ر مادەنيەت جانە اقپارات مينيسترلىگىنىڭ «مادەنيەت ۇزدىگى» توسبەلگىسىمەن (2012) جانە يۋنەسكو- نىڭ «التىن قىران» وردەندەرىمەن ماراپاتتالعان.
