الماتىدا اۋەسقوي بوكسشىلار اراسىندا وتكەن تۋرنيرگە 80 بوكسشى قاتىستى

«بۇل تۋرنير قالامىزدا ءار توقسان سايىن وتكىزىلىپ تۇرادى. بۇل جولى ول «تۇران» ۋنيۆەرسيتەتىنىڭ جۇلدەسىنە ارنالدى. تۋرنيرگە قاتىسۋشىلار سانى بارعان سايىن كوبەيۋدە. ەڭ العاشقى تۋرنيرگە بارى-جوعى 10 جۇپ قاتىسقان بولاتىن. ودان كەيىنگى جارىسقا 20 جۇپ قاتىستى.

سودان بەرى تۋرنيردىڭ تانىمالدىعى ارتا ءتۇستى. بۇگىنگى تۋرنيرگە 200 گە جۋىق ادام قاتىسۋعا ءوتىنىش بىلدىرگەن بولاتىن. ءبىراق، ءبىز ىرىكتەي كەلە 80 جۇپتى شارشى الاڭعا شىعارۋدى ءجون كوردىك. تۋرنيردىڭ باستى ماقساتى - بۇقارالىق سپورتتى دامىتۋ، سالاماتتى ءومىر سالتىن جانە قازاقستاندا ءنومىرى ءبىرىنشى سپورت ءتۇرى - بوكس ونەرىن ناسيحاتتاۋ. بۇل تۋرنير فيتنەس كلۋب جانە باسقا دا سپورت كلۋبتارىندا بوكسپەن اۋەسقويلىق دەڭگەيدە اينالىسىپ جۇرگەن كاسىپقوي ەمەس بوكسشىلار اراسىندا وتكىزىلەتىن جارىس بولعاندىقتان، مۇندا ءار بوكسشى ءبىر رەت قانا رينگكە شىعادى.

جەڭىمپازدارعا مەدالدارمەن قاتار، باعالى سىيلىقتار تابىس ەتىلەدى»، - دەدى وسى تۋرنيردىڭ نەگىزىن قالاۋشى جانە ۇيىمداستىرۋشىسى، بوكستان ك س ر و سپورت شەبەرى، حالىقارالىق تۋرنيرلەردىڭ جۇلدەگەرى رينات تانەكوۆ.

ايتا كەتەلىك، تۋرنيرگە قاتىسۋشىلاردىڭ جاس مولشەرى - 18 جاستان 55 جاسقا دەيىن. ولاردىڭ اراسىندا قاراپايىم ستۋدەنت جاستاردان باستاپ، كومپانيا باسشىلارىنا دەيىن بار. ءبىراق، بارلىعىن بىرىكتىرەتىن - بوكسقا دەگەن شىنايى قۇشتارلىق. قاتىسۋشىلار 48 كەلىدەن باستاپ، 100 كەلىگە دەيىنگى سالماق دارەجەسى ارالىعىندا باقتارىن سىنايدى. ءاربىر بوكسشى ءوز جۇبىمەن ءبىر رەت قانا رينگكە شىعادى. دەگەنمەن، ۇيىمداستىرۋشىلاردىڭ ايتۋىنشا، قاتىسۋشىلار سانىنىڭ ارتۋىنا بايلانىستى، الداعى ۋاقىتتاعى تۋرنيرلەردە ارنايى تۋرنير كەستەسى جاسالاتىن بولادى. وندا بوكسشىلار وليمپيادالىق جۇيە بويىنشا رينگكە ءبىر ەمەس بىرنەشە رەت كوتەرىلەتىن بولادى.

اۆتور: ايبوتا جاپپاربەرگەن

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى