تۇرعىن ءۇي قۇرىلىس جيناق بانكى 80 جىلدىق تاجىريبەسى بار گەرمانيالىق ارىپتەسىمەن كەلىسىمگە كەلدى - فوتو
وسى ەكى ءىرى بانكتىڭ اراسىنداعى بۇل كەلىسىم ەكى جاققا دا ءتيىمدى تاجىريبە الماسۋعا جانە ەلىمىزدەگى تۇرعىن ءۇي قۇرىلىس جيناق جۇيەسىنىڭ دامۋىنا ىقپال ەتپەك، دەپ حابارلايدى «بايتەرەك» حولدينگىنىڭ باسپا ءسوز قىزمەتىنەن.
- ۇدايى جەتىلدىرىپ وتىرۋ، ەڭ جاقسى حالىقارالىق تاجىريبەنى الىپ، قازاقستانعا ەنگىزۋ، تاجىريبەسى مول قىزمەتكەرلەردى تارتۋ - باستى مىندەت. «نۇر وتان» پارتياسىنىڭ XVI قۇرىلتايىندا مەملەكەت باسشىسى وسىنداي تاپسىرما بەردى. ءبىز دامۋ جولىمەن ءجۇرىپ كەلەمىز. ەل ازاماتتارىن تۇرعىن ۇيمەن قامتاماسىز ەتۋدىڭ قولجەتىمدى تەتىكتەرىن ۇسىنامىز. وتباسىنىڭ جانە بالالارىنىڭ بولاشاعىنا سەنىممەن قاراۋ، باسپانالى بولۋ سەكىلدى ادامنىڭ ەڭ باستى قاجەتتىلىكتەرىنە قول جەتكىزۋىنە كومەكتەسەمىز، - دەدى «قازاقستاننىڭ تۇرعىن ءۇي قۇرىلىس جيناق بانكى» ا ق ديرەكتورلار كەڭەسىنىڭ ءتورايىمى الينا الدامبەرگەن نەمىس ارىپتەستەرىمەن كەزدەسۋ كەزىندە.
تۇرعىن ءۇي قۇرىلىس جيناق بانكى ءۇشىن باۋشپاركاسسە شۆەبيش حاللدىڭ تاجىريبەسى اسا ماڭىزدى. ويتكەنى، ەۋروپالىق قۇرىلىس جيناق كاسساسىنىڭ 80 جىلدىق تاجىريبەسى بار. وسى ۋاقىتتان بەرى تۇرعىن ءۇي قۇرىلىس جيناق جۇيەسىن ىلگەرى دامىتتى. بۇل جۇيە گەرمانياعا ەڭ ماڭىزدى الەۋمەتتىك ماسەلە - ازاماتتاردى باسپانامەن قامتاماسىز ەتۋ ماسەلەسىن شەشۋگە جاردەمدەسىپ كەلەدى. سونىمەن قاتار ءوزىنىڭ تۇراقتىلىعىن بىرنەشە مارتە ناقتى دالەلدەپ بەرگەن. ينفلياتسيا جانە داعدارىس كەزىندە دە قايراڭداپ قالماي، كەرىسىنشە، شيرىعا، ىسىلا ءتۇستى.
قازىر باۋشپاركاسسە شۆەبيش حاللدىڭ گەرمانياداعى كرەديت بەرۋ نارىعىنداعى ۇلەسى %30 عا جەتكەن. قۇرىلىس جيناق كاسساسىنىڭ شارتتىق سوماسى 274 ميلليارد ەۋرو بولاتىن 7,4 ميلليون سالىمشىسى بار. جىل سايىن 13 ميلليارد ەۋروعا تۇرعىن ءۇي ساتىپ الۋدى قارجىلاندىرادى. بۇل كاسسا گەرمانيا ازاماتتارىنا بۇگىنگە كۇنگە دەيىن 300 ميلليارد ەۋروعا جۋىق قارىز بەرگەن. بۇل قوماقتى قاراجات 8,6 ميلليون پاتەر مەن ءۇيدى ساتىپ الۋعا، جوندەۋگە جانە قۇرىلىس سالۋعا جۇمسالعان. بۇگىندە گەرمانيادا ەسكى ۇيلەردى جاڭعىرتۋ وزەكتى ماسەلە بولىپ وتىر. سوندىقتان جاڭا پاتەر ساتىپ الۋدان گورى، وسى ماقساتقا كوپ قارىز الىناتىن كورىنەدى.
قازاقستان وسى جۇيەنى جۇزەگە اسىرۋدا ەۋروپانىڭ تاجىريبەسىن العان پوستكەڭەستىك كەڭىستەگى العاشقى مەملەكەت بولدى. وسى ۋاقىت ىشىندە بانك سالىمشىلارىنىڭ سانى 760000 مىڭنان اسىپ جىعىلدى.
تۇرعىن ءۇي قۇرىلىس جيناق بانكى اشىلعالى بەرى 401434 ميلليون تەڭگەگە، 92 مىڭ سالىمشىعا تۇرعىن ءۇي ماسەلەسىن شەشۋگە قولعابىسىن تيگىزگەن.
2015 -جىلدىڭ 1 -شىلدەسىندەگى دەرەك بويىنشا، بانك ەكىنشى دەڭگەيلى بانكتەر اراسىندا ۇزاق مەرزىمدى سالىمدار بويىنشا ءبىرىنشى ورىندا تۇر. كليەنتتەرىنىڭ دەپوزيتتىك بازاسى - 272,7 ميلليارد تەڭگە.
5 ايدىڭ قورىتىندىسى بويىنشا، ەكىنشى دەڭگەيلى بانكتەردىڭ قۇرىلىسقا جانە تۇرعىن ءۇي الۋعا بەرگەن كرەديت نارىعىنداعى ق ت ق ج ب- نىڭ ۇلەسى %75 عا جەتتى ( 2014 -جىلى - %33).
قازاق جانە نەمىس ارىپتەستەرى اراسىنداعى مەموراندۋم تۇرعىن ءۇي قۇرىلىس جيناق جۇيەسىن ءارى قاراي جەتىلدىرە تۇسۋگە جاڭا مۇمكىندىك بەرمەك.
