ءسوز ونەرىنىڭ ورداسى «قازاق ادەبيەتىنە» - 80 جىل
سالتاناتتى شارادا ق ر ينۆەستيتسيالار جانە دامۋ مينيسترلىگى بايلانىس، ينفورماتيزاتسيا جانە اقپارات كوميتەتىنىڭ ءتوراعاسى ساكەن سارسەنوۆ ق ر پرەمەر-ءمينيسترى كارىم ءماسىموۆتىڭ قۇتتىقتاۋ ءسوزىن وقىپ بەردى.
«20 - عاسىرداعى ۇلتتىق رۋحانياتتىڭ قاينار كوزى بولعان «قازاق ادەبيەتى» گازەتىنىڭ 80 -جىلدىق مەرەيتويى قۇتتى بولسىن. الاش كوسەمدەرىنىڭ ءسوز الاڭىنا اينالىپ، ادەبيەت پەن ونەر، مادەنيەت سالاسىندا زور اعارتۋشىلىق قىزمەت اتقارعان باسىلىم ەركىن ويدىڭ، ەلدىكتىڭ ءۇنجارياسى بولا ءبىلدى. ابىز باسىلىمدا قالامىنىڭ ىزدەرى قالعان ۇلت قايراتكەرلەرىنىڭ كورنەكتى اقىن- جازۋشىلاردىڭ ەڭبەگىن حالقىمىز ءاردايىم ءقادىر تۇتادى. ەڭبەكتەرىڭىز جانا بەرسىن. ەلدىڭ گۇلدەنۋى جولىنداعى ورتاق ماقسات- مۇراتىمىز باياندى بولسىن»، - دەدى ساكەن سارسەنوۆ ۇكىمەت باسشىسىنىڭ قۇتتىقتاۋىن جەتكىزە وتىرىپ.
«قازاق ادەبيەتى» گازەتىنىڭ 80 جىلدىعىنا وراي ق ر ۇكىمەتىنىڭ اقپارات سالاسىنىڭ ۇزدىگى توسبەلگىسىمەن گازەت ارداگەرى تەمىرەيەۆا گۇلجامال، و ق و-داعى مەنشىكتى ءتىلشىسى عالىمجان ەلشىبايەۆ، گازەت ارداگەرى رىسكۇل جۇمابايەۆا، روزا سەيىلحانوۆا، قاراكوز ءسىمادىل ماراپاتتالدى.
حالىقارالىق جيىنعا تۇركى مادەنيەتىنىڭ جاناشىرى تۇركسوي ۇيىمىنىڭ اتىنان قاتىسقان جازۋشى-اۋدارماشى مالىك وتاربايەۆ تا قاتىستى.
«تۇركى مادەنيەتىن دامىتۋعا قۇرىلعان تۇركسويعا مۇشە ەلدەردىڭ اتىنان 80 جىلدىق مەرەيتويىمەن قۇتتىقتايمىز. بۇل - تەك قازاق ەلىنىڭ عانا ەمەس، تۇگەل تۇركى الەمىنىڭ ايتۋلى مەرەكەسى. تۇركى ادەبيەتىنىڭ قۇرامداس بولىگى - قازاق ادەبيەتى ءسوزسىز باي ادەبيەت. قازاق جازۋشىلارىنىڭ ولمەس شىعارمالارى تۇركى تىلدەس حالىقتاردىڭ رۋحانياتىنا قوسىلعان باعا جەتپەس قازىنا ەكەنى ءمالىم. عاسىردان عاسىرعا جەتكەن قازىنامىزدى ۇرپاققا جەتكىزۋ ورتاق مىندەت»، - دەدى مالىك وتاربايەۆ باس حاتشىسى دۇيسەن قوراباي ۇلى قاسەيىنوۆتىڭ قۇتتىقتاۋىن جەتكىزە وتىرىپ.
كونفەرەنتسيادا نەگىزگى باياندامانى حالىقارالىق «الاش» ادەبي سىيلىعىنىڭ يەگەرى، «قازاق ادەبيەتى» گازەتىنىڭ باس رەداكتورى جۇماباي شاشتاي ۇلى جاسادى.
سونداي-اق، مەملەكەتتىك سىيلىقتىڭ يەگەرى، جازۋشى ورازبەك سارسەنبايەۆ، «ەگەمەن قازاقستان» گازەتىنىڭ پرەزيدەنتى ساۋىتبەك ابدراحمانوۆ، قاز ۇ ۋ-دىڭ رەكتورى، اكادەميك عالىم- قايىر مۇتان ۇلى، جازۋشى، «قازاق ادەبيەتى» گازەتىندە ءبىراز جىلدار باس رەداكتور بولعان احات جاقسىباي، «جامبىل» جۋرنالىنىڭ باس رەداكتورى، جازۋشى نەسىپبەك ءداۋتاي ۇلى، شاكارىم قۇدايبەردى ۇلى اتىنداعى سىيلىقتىڭ يەگەرى، اقىن ەرتاي اشىقبايەۆ، «ايقىن» گازەتىنىڭ باس رەداكتورى نۇرتورە ءجۇسىپ، «قازاق ادەبيەتى» گازەتىنىڭ ءبولىم مەڭگەرۋشىسى قاراگوز ءسىمادىل ءسوز سويلەدى.
وسى سالتاناتقا ارنايى كەلگەن شەتەلدىك قالامگەرلەر - ەۋرازيا جازۋشىلار وداعىنىڭ ءتوراعاسى ياكۋپ دەليمەروعلى، ق ح ر جازۋشىلار جۋرنالىنىڭ باس رەداكتورى اكبار ءماجيت، قىرعىزستان جازۋشىلار وداعىنىڭ ءتوراعاسى اقبار رىسقۇلوۆتار جىلى لەبىزدەرىن ءبىلدىردى.
كونفەرەنسيا باستالماس بۇرىن كىتاپحانانىڭ زالىندا ارنايى كورمە ۇيىمداستىرىلدى. كورمەگە العاش جارىق كورگەننەن بەرگى گازەت تىگىندىلەرى، ءار جىلدارداعى باسىلىم تاريحىنان سىر شەرتەتىن فوتوسۋرەتتەر، گازەت اۆتورلارىنىڭ، كوسەمسوزشىلەردىڭ كىتاپتارى قويىلدى.
اۆتور: گۇلميرا عوسمانالي
