قازاقستان جازۋشىلار وداعىنا - 80 جىل

شارا اياسىندا قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى باعلان مايلىبايەۆ ەلباسى نۇرسۇلتان نازاربايەۆتىڭ قۇتتىقتاۋ حاتىن وقىپ بەردى.

«جازۋشىلار وداعى - 700 دەن استام قازاقستاندىق اقىن-جازۋشىنىڭ باسىن قوسقان ەلىمىزدەگى ەڭ العاشقى جانە ەڭ ءىرى شىعارماشىلىق بىرلەستىكتەردىڭ ءبىرى. وداق - ەلىمىزدىڭ مادەني ءومىرىنىڭ دامۋىنا، مورالدىق جانە رۋحاني قۇندىلىقتاردىڭ نىعايا تۇسۋىنە، جاستار تاربيەسىنە زور ۇلەس قوسىپ وتىرعان ىرگەلى ۇجىم.

جازۋشىلاردىڭ بۇگىنگى بۋىنى - قازاقستان ادەبيەتىنىڭ كەشەگى اباي قۇنانبايەۆ، جامبىل جابايەۆ، شاكارىم قۇدايبەرديەۆ، مۇحتار اۋەزوۆ، ساكەن سەيفۋللين، ءىلياس جانسۇگىروۆ، عابيت مۇسىرەپوۆ، موريس سيماشكو، يۆان شەگوليحين سىندى كوپتەگەن كورنەكتى تۇلعالارىنىڭ باعا جەتپەس مۇرالارىن لايىقتى جالعاستىرۋشى ءىزباسارلار.

رۋحاني كەمەلدەنۋ، جالپى ۇلتتىق قۇندىلىقتاردى دامىتىپ، بەيبىتشىلىك پەن كەلىسىمنىڭ اسىل مۇراتتارىن ۇلىقتاۋ - «قازاقستان-2050» ستراتەگياسىنىڭ باستى مىندەتتەرىنىڭ ءبىرى. جاڭا قازاقستاندىق پاتريوتيزمدى قالىپتاستىرۋعا بەلسەنە ارالاساتىن زيالى قاۋىم وسى مىندەتتەردى ورىنداۋدا شەشۋشى رولگە يە. قازاقستان جازۋشىلار وداعى الداعى ۋاقىتتا دا ورەسى بيىك زيالىلارىمىزدى ەلدىك ىستەرگە ۇيىستىرا بەرەتىنىنە سەنەمىن»، - دەلىنگەن مەملەكەت باسشىسى نۇرسۇلتان نازاربايەۆتىڭ جولداعان قۇتتىقتاۋىندا.

پلەنۋمدا قازاقستان رەسپۋبليكاسى پارلامەنتى سەناتىنىڭ دەپۋتاتى، قازاقستان جازۋشىلار وداعى باسقارماسىنىڭ ءتوراعاسى نۇرلان ورازالين بايانداما جاسادى.

سالتاناتتى شارادا الماتى قالاسىنىڭ اكىمى احمەتجان ەسىموۆ، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى ولجاس سۇلەيمەنوۆ، ك س ر و-نىڭ حالىق ءارتيسى، مەملەكەتتىك سىيلىقتىڭ لاۋرەاتى ءاسانالى ءاشىموۆ، قازاقستان عىلىم اكادەمياسىنىڭ پرەزيدەنتى، اكادەميك، مەملەكەتتىك سىيلىقتىڭ لاۋرەاتى مۇرات جۇرىنوۆ ءسوز سويلەدى.

سونداي-اق، ايتۋلى مەرەكەگە ەۋرازيا جازۋشىلار وداعىنىڭ ءتوراعاسى ياكۋب وماروعلى، «كاردەش كالەملەر» جۋرنالىنىڭ باس رەداكتورى الي اكباش، تۇركيا ءبىلىم جانە عىلىم ءمينيسترىنىڭ كەڭەسشىسى، جازۋشى يلتەر يەشيلاي، حالىقارالىق تۇركىسوي ۇيىمىنىڭ اۋدارما ءبولىمىنىڭ مەڭگەرۋشىسى، اۋدارماشى ياسەمين ۆودابلە، حالىقارالىق باتاليست جانە مارينيست جازۋشىلار قاۋىمداستىعىنىڭ باسقارما حاتشىسى، رەسەيدىڭ ەڭبەك سىڭىرگەن قايراتكەرى ۆالەري پوۆاليايەۆ، «ليتەراتۋرنايا گازەتا» باس رەداكتورىنىڭ ورىنباسارى ماكسيم زامشيەۆ، تاتارستان جازۋشىلار وداعىنىڭ ءتوراعاسى، اقىن رافيس كۋربانوۆ، ازەربايجان جازۋشىلار وداعى باسقارماسى ءتوراعاسىنىڭ ورىنباسارى يلگار پاشايەۆ، قىرعىزستان جازۋشىلار وداعىنىڭ ءتوراعاسى اقبار رىسقۇلوۆ، تاجىكستاننىڭ حالىق جازۋشىسى مۋمين كانوات، باشقۇرتستان جازۋشىلار وداعى ءتوراعاسىنىڭ ورىنباسارى سپارتاك يلياسوۆ، قىتاي حالىق رەسپۋبليكاسى ەتنيكالىق توبىنىڭ باس ديرەكتورى يۋ بينشي ارنايى كەلىپ، شىعارماشىلىق ۇيىمىنا قۇتتىقتاۋلارىن جەتكىزدى.

پلەنۋمنىڭ قورىتىندىسى بويىنشا جازۋشىلاردىڭ اتىنان ۇندەۋ قابىلداندى.

«ەلباسى، قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆ «قازاقستان-2050» ستراتەگياسىندا «زيالى قاۋىم جاڭا قازاقستاندىق پاتريوتيزمدى قالىپتاستىرۋدا باستى كۇش بولۋى ءتيىس»، دەپ اتاپ ءوتتى. قازاقستان جازۋشىلار وداعى وسى جوعارى ميسسيانى ىسكە اسىرۋ ءۇشىن بار كۇش-جىگەرىن سالاتىن بولادى. قازىرگى باستى مىندەت - جاسامپازدىق ەڭبەكپەن ەل ىرگەسىن نىعايتا ءتۇسۋ، مادەنيەتتى، عىلىم مەن ءبىلىمدى دامىتۋ، حالىقتىڭ ءال-اۋقاتىن ارتتىرۋ. قازاقستان جازۋشىلار وداعىنىڭ 80 جىلدىق مەرەيتويىندا ءبىز وتاندىق ادەبيەتشىلەردىڭ تابىستارىن باعالاپ قانا قويماي، سونىمەن بىرگە ودان ءارى دامۋدىڭ جانە الەمدىك زياتكەرلىك كەڭىستىككە كىرىگۋدىڭ جاڭا باعدارلارىن مەجەلەيمىز»، - دەلىنگەن ۇندەۋدە.

قازاقستاندىق جازۋشىلار شىعارماشىلىق الەۋەتىن وتانىمىزعا جانە ەل تاۋەلسىزدىگىنىڭ مۇراتتارىنا رۋحاني قىزمەت ەتۋ تاريحي ميسسياسىنا جۇمىلدىراتىندىعىن ءبىراۋىزدان اتاپ ءوتتى. مەرەكەلىك شارانىڭ سوڭى قازاقستان رەسپۋبليكاسى ونەر قايراتكەرلەرىنىڭ قاتىسۋىمەن كونسەرتتىك باعدارلاماعا ۇلاستى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى