نۇرتورە ءجۇسىپ: بەيبارىس سۇلتاننىڭ 800 جىلدىعىن جوعارى مازمۇندى دەڭگەيدە وتكىزۋ كەرەك
دەپۋتات ءوز ۇسىنىستارىن پرەمەر-ءمينيستردىڭ ورىنباسارى ەرالى توعجانوۆتىڭ اتىنا جولداعان دەپۋتاتتىق ساۋالدا ايتتى. ول ەۋرازيا دالاسىنىڭ تۋماسى، مىسىردىڭ ۇلى بيلەۋشىسى بەيبارىس سۇلتاننىڭ قازاقستان ءۇشىن دە، مىسىر ءۇشىن دە ماڭىزى زور ەكەنىن اتاپ ءوتتى.
«قازاقستان مەن مىسىر اراسىنداعى قارىم-قاتىناس جاقسى. ەكى ەلدىڭ باسشىلارى جاقىندا عانا تەلەفون ارقىلى سويلەستى. قازاقستان مەن مىسىردى بايلانىستىراتىن تاريحي تۇلعالار بار. سولاردىڭ ىشىندە سۇلتان بەيبارىستىڭ ەسىمى ەرەكشە اتالادى. بەيبارىس بيلىگى تۇسىندا سالىنعان تاريحي ەسكەرتكىشتەر كۇنى بۇگىنگە دەيىن كاير قالاسىنىڭ ءسانىن كەلتىرىپ تۇر»، - دەدى دەپۋتات سەناتتىڭ جالپى وتىرىسىندا.
سەناتور بۇعان دەيىن مىسىر مەن قازاقستان سۇلتان بەيبارىس مەشىتىن قالپىنا كەلتىرۋ جۇمىستارىن قارجىلاندىرعانىن اتاپ ءوتتى. جوبا 2011 -جىلدىڭ قازان ايىندا اياقتالۋى ءتيىس ەدى. الايدا اراب ەلدەرىندەگى ساياسي جانە ەكونوميكالىق داعدارىسقا بايلانىستى جاڭعىرتۋ جۇمىستارى كەيىنگە قالدىرىلدى. ماۋلەن اشىمبايەۆتىڭ جاقىندا بولعان ساپارىنىڭ ناتيجەسىندە مىسىر اعىمداعى جىلدىڭ سوڭىنا دەيىن قالپىنا كەلتىرۋ جۇمىستارىن اياقتاۋ ءۇشىن قوسىمشا 2 ميلليون ا ق ش دوللارىن ءبولىپ جاتقانى بەلگىلى بولدى. نۇرتورە ءجۇسىپتىڭ ايتۋىنشا، بەيبارىس سۇلتاننىڭ 800 جىلدىعىن ساپالى مازمۇندا اتاپ ءوتۋ اسا ماڭىزدى.
«1989 -جىلى تۇسىرىلگەن «سۇلتان بەيبارىس» تەلەفيلمىن اراب جانە اعىلشىن تىلىنە اۋدارىپ، مىسىر ەلىندە كورسەتۋدى، پرەزيدەنت تاپسىرماسىنا ساي ازىرلەنىپ جاتقان شەتەلدىكتەرگە ارنالعان تاريح وقۋلىعىنا بەيبارىس باستاعان قىپشاق سۇلتاندارى تۋرالى دەرەكتەردى قوسۋدى، ەگيپەت ەلىنىڭ بەيبارىس سۇلتان تۋرالى 30 سەريالىق كينوسىن قازاق تىلىنە اۋدارىپ، حالىققا تانىستىرۋدى، جازۋشى-دراماتۋرگ ر. وتاربايەۆتىڭ «بەيبارىس سۇلتان» پەساسىن مىسىر ساحناسىنا قويۋدى، ماملۇكتەر كەزەڭىندە جازىلعان، قازاق تاريحى ءۇشىن ماڭىزى زور اراب جانە قىپشاق عالىمدارىنىڭ ەڭبەكتەرىن قازاقشاعا اۋدارىپ، كىتاپ ەتىپ شىعارۋدى سۇرايمىز»، - دەدى سەناتور.
