كوروناۆيرۋس الەمدە 800 مىڭ ادامنىڭ ءومىرىن جالمادى
مۇنداي دەرەك امەريكانىڭ دجونس حوپكينس ۋنيۆەرسيتەتى 22 تامىز، سەنبى كۇنى جاريالاعان مالىمەتتەردە كەلتىرىلگەن. اتالعان اۋرۋمەن قايتىس بولعان پاتسيەنتتەردىڭ 25 پايىزعا جۋىعى (175467- سى) قۇراما شتاتتارىنىڭ تۇرعىندارى، دەپ حابارلايدى قازاقپارات dw.com پورتالىنا سىلتەمە جاساپ. ۋنيۆەرسيتەت ساراپشىلارىنىڭ باعالاۋىنشا، جەر شارى تۇرعىندارى اراسىندا ىندەت جۇقتىرعانداردىڭ سانى 23 ميلليوننان اسىپ وتىر. كوروناۆيرۋس جۇقتىرعانداردىڭ باسىم بولىگى ا ق ش (5,63 ميلليون) ، برازيليا (3,53 ميلليون) جانە ءۇندىستاندا (2,97) تىركەلگەن. اۋرۋ جۇقتىرعاندار سانى سوڭعى ۋاقىتتا باتىس ەۋروپا ەلدەرىندە دە ارتىپ بارادى. ماسەلەن، گەرمانيادا وتكەن تاۋلىكتە 2 034 ادامنان ۆيرۋس تابىلدى. بۇل ءساۋىر ايىنىڭ سوڭىنان بەرگى ەڭ جوعارى كورسەتكىش بولىپ وتىر.
فرانتسيادا دا ەكىنشى كۇن قاتارىنان ىندەت جۇقتىرعانداردىڭ سانى 4 مىڭ ناۋقاستان اسىپ جىعىلعان. مۇنداي جوعارى كورسەتكىش بۇل ەلدە مامىر ايىنان بەرى تىركەلمەگەن ەدى. يتاليادا دا وتكەن تاۋلىكتە 1071 جاعداي تىركەلدى. مامىر ايىنىڭ ورتاسىندا قاتاڭ كارانتين شارالارى جەڭىلدەتىلگەننەن كەيىن بۇل ەلدە العاش رەت 1 مىڭنان اساتىن جاعداي ورىن الىپ وتىر.
