يتاليادا ءبىر تاۋلىكتە كوروناۆيرۋستان 800 گە تارتا ادام كوز جۇمدى
قاۋىپتى ۆيرۋستان مەرت بولعاندار سانى ول ەلدە 4825 ادامعا جەتىپ وتىر، دەپ حابارلايدى قازاقپارات بي- بي- سي اقپارات كوزىنە سىلتەمە جاساپ.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سۇيەنسەك، الەم بويىنشا ءبىر تاۋلىكتە كوروناۆيرۋس ينفەكسياسىن جۇقتىرعانداردىڭ سانى 32 مىڭ ادامعا كوبەيىپ، 266 مىعا جەتىپ قويعان. 11 مىڭعا تارتا كىسى قايتىس بولعان. دجونس حوپكينس ۋنيۆەرسيتەتىنىڭ حابارلاۋىنشا، ءتىپتى الەمدە كوروناۆيرۋستى جۇقتىرعانداردىڭ سانى 300 مىڭنان اسىپ كەتكەن. يتاليا بەيسەنبى كۇنى- اق كوروناۆيرۋستان بولعان ءولىم- ءجىتىم بويىنشا قىتايدىڭ الدىنا شىعىپ كەتكەن ەدى. 22 - ناۋرىزداعى مالىمەتكە سۇيەنسەك Covid-19 يتالياداعى 53578 تۇرعىننان تابىلعان. بۇل 21 - ناۋرىزداعى كورسەتكىشتەن 6557 گە ارتىپ وتىر. كوروناۆيرۋستىڭ ەڭ ۇلكەن وشاعى انىقتالعان لومبارديادا ينفەكسيانىڭ تارالۋىنا جول بەرمەۋ ماقساتىندا قاتاڭ شارالار قولعا الىندى. سەنبى كۇنى كەشكە جاريالانعان جاڭا ەرەجەلەرگە سايكەس كوشەدە سپورتپەن، دەنە ماشىعىمەن اينالىسۋعا تىيىم سالىنعان. ساۋدا اۆتوماتتارىن پايدالانۋعا دا شەكتەۋ قويىلعان. حالىققا ەڭ قاجەتتى تاۋارلاردى ساناماعاندا بيزنەسكە بارلىق وپەراتسيانى توقتاتۋعا پارمەن بەرىلدى. اۋرۋحانا تۇرعىزۋدان باسقا بارلىق قۇرىلىس جۇمىسىن جۇرگىزۋگە تىيىم سالىندى. اشىق اسپان استىنداعى بارلىق بازاردىڭ جۇمىسى توقتاتىلدى. لومبارديادا كوروناۆيرۋس ينفەكسياسىن جۇقتىرعاننان 3095 ادام جان تاپسىرعان. ريمدەگى ەكى موناستىر كارانتينگە جابىلدى. ونداعى 59 موناح ايەل كوروناۆيرۋس جۇقتىرىپ العان. ەلدە Covid-19 ىندەتىنەن 28 ءدىن قىزمەتكەرى باقيلىق بولدى. رەسەي سەنبى كۇنى كوروناۆيرۋسپەن كۇرەسۋ ءۇشىن يتالياعا اسكەري ۆيرۋسولوگتار مەن قاجەتتى قۇرال- جابدىقتاردى جىبەرەتىنىن جاريا ەتتى.
