اسحانادا 8000 دوللارىنان ايىرىلدى

ول ىشىندە كولەمدى اقشاسى بار سومكەنى جىمقىرىپ كەتكەن دەپ جازادى وتىرار ارناسى. (فوتو: otyrar.kz).

وبلىستىق ىشكى ىستەر دەپارتامەنتى باسپا ءسوز قىزمەتىنىڭ حابارلاۋىنشا، ەڭبەكشى پوليتسيا ءبولىمىنىڭ كەزەكشىسىنە قالا تۇرعىنى ارىزدانىپ كەلگەن. ول قالاداعى تاماقتاناتىن ورىنداردىڭ بىرىندە سومكەسىن ۇمىتىپ كەتكەنىن ايتقان. ىشىندە 7700 ا ق ش دوللارى مەن 300 مىڭ تەڭگەگە جۋىق اقشاسى بار. ءبىرشاما ۋاقىتتان كەيىن قايتىپ كەلسە، سومكە جوق.

تەرگەۋشىلەر بۇل فاكتىنى ەڭبەكشى پوليتسيا ءبولىمىنىڭ سوتقا دەيىنگى ءبىرىڭعاي تەرگەپ- تەكسەرۋ تىزىلىمىنە تىركەپ، قىلمىستىق ءىس قوزعادى. ارى قاراي شۇعىل قىزمەتكەرلەر ىزدەستىرۋ جۇمىستارىن جۇرگىزەدى. ءتارتىپ ساقشىلارى ىشكى ىستەر دەپارتامەنتىنىڭ جەدەل باسقارۋ ورتالىعىنا تيەسىلى كوشەدەگى بەينە-باقىلاۋ كامەرالارىنداعى جازبانىڭ كومەگىمەن كۇدىكتىنىڭ ىزىنە ءتۇسىپ، ۇستادى. ول 45 جاستاعى جۇمىسسىز قالا تۇرعىنى بولىپ شىققان.

كۇدىكتىنىڭ ۇيىنە تىنتىگەن پوليتسەيلەر ۇرلانعان اقشانى تاۋىپ، ايعاق زات رەتىندە تاركىلەدى. قولعا تۇسكەن ازامات «ولجاسىنىڭ» 15 مىڭداي تەڭگەسىن عانا جاراتىپ ۇلگەرگەن ەكەن.

ول ازاماتتىڭ ايتۋىنشا، سول اسحانادان بۇل دا تاماقتانىپتى. قايتايىن دەگەن كەزىندە بوس ۇستەلدەردىڭ بىرىندە تۇرعان يەسىز سومكەنى كورەدى. بىرەۋ كەلىپ قالار دەپ، ءبىراز كۇتكەنىن ايتادى. ەشكىم كەلمەگەن سوڭ، سومكەنى الىپ، ۇيىنە قايتىپ كەتكەن. ىشىندەگى اقشاسىن العان سوڭ قۇجاتتاردى سومكەمەن بىرگە قوقىس جاشىگىنە لاقتىرىپ جىبەرىپتى.

قازىرگى تاڭدا وسى فاكتى بويىنشا قىلمىستىق كودەكستىڭ 188-بابىمەن (ۇرلىق) ءىس قوزعالدى. كۇدىكتى ەشقايدا كەتپەۋ تۋرالى قولحاتپەن جىبەرىلگەن. سوتقا دەيىنگى تەرگەۋ امالدارى جالعاسۋدا.

Otyrar-tv.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى