اتىراۋدا كارانتيندى بۇزعاندارعا 8,3 ميلليون تەڭگەنىڭ اكىمشىلىك ءىسى قوزعالدى

بۇل تۋرالى وبلىستىڭ باس مەملەكەتتىك سانيتارلىق دارىگەرى سادۋاقاس بايعابىلوۆ ءمالىم ەتتى، دەپ حابارلايدى قازاقپارات.

ونىڭ ايتۋىنشا، موبيلدىك توپتاردىڭ رەيدتىك تەكسەرىستەرى كەزىندە كارانتين تالابىن بۇزعان بىرنەشە دەرەك انىقتالعان.

جابىق عيماراتتاردا ماسكا رەجيمىن، الەۋمەتتىك قاشىقتىقتى ساقتاماۋ سەكىلدى وزگە دە تالاپتاردى بۇزعاندارعا 8,3 ميلليون تەڭگەنىڭ اكىمشىلىك ءىسى قوزعالعان.

«جەكە تۇلعالارعا 24، ورتا جانە شاعىن كاسىپكەرلىك سۋبەكتىسىنە (19 دۇكەن، 2 كولىك جوندەۋ ورتالىعى) 23 ايىپپۇل سالىندى. تەك اتىراۋ قالاسىندا بازارلار، سۋپەرماركەتتەر مەن تۇرعىن ۇيلەردە ورنالاسقان دۇكەندەردە ماسكا تاقپاعان 17 جەكە تۇلعا 30 ايلىق ەسەپتىك كورسەتكىش مولشەرىندەگى ايىپپۇل جازاسىنا تارتىلدى. ال، جىلىوي اۋدانىندا كارانتين تالابىن ساقتاماعاندار 11 ايىپپۇل ارقالادى. ونىڭ ىشىندە 7 جەكە تۇلعا، 4 شاعىن جانە ورتا كاسىپكەرلىك سۋبەكتىسى بار. سونداي-اق، يندەر اۋدانىندا ۋاقىتشا جۇمىس كەستەسىن ساقتاماعان كاسىپكەرلىك نىساندارىنا 2 ايىپپۇل سالىندى»، - دەدى سادۋاقاس بايعابىلوۆ.

موبيلدى توپتارمەن رەيد كەزىندە قامتىلعان 1014 نىساننىڭ 14 دە كەمشىلىكتەر سول مەزەتتە شەشىمىن تاپقان. مۇنداي كەمشىلىكتەر اراسىندا ەسىك تۇتقالارىن، ساۋدا سورەسىن، تەحنولوگيالىق جابدىقتاردى، شاتىر مەن قوقىس سالعىشتاردى دەزينفەكتسيالىق ەرىتىندىمەن وڭدەۋ بار. ال، وزگە نىسانداردا گيگيەنالىق ساۋاتتىلىقتى ارتتىرۋ، كارانتيندى ساقتاۋ جونىندە بروشيۋرالار تاراتىلىپ، پروفيلاكتيكالىق اڭگىمە جۇرگىزىلگەن.

ەسكە سالا كەتەلىك، بۇعان دەيىن اتىراۋ حالقى ءدارى-دارمەك باعاسىنا شاعىمدانعاننان كەيىن 50 ءدارىحانا تەكسەرىلگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى