فۋتبول: «اقجايىق» قارسىلاسىن 8:1 ەسەبىمەن ۇتىپ، كوش باسىنا كوتەرىلدى

بۇل - «اقجايىقتىڭ» بيىلعى ماۋسىمداعى ەڭ ءىرى ۇتىسى. سونىمەن قاتار ءبىرىنشى ليگادا ازىرگە ءبىر كوماندانىڭ قاقپاسىنا بۇلايشا سەگىز دوپ ءتۇسىپ كورگەن ەمەس.

جالپى، ويىن ورالدىقتار ءۇشىن ءساتسىز باستالدى. الدىمەن قوناقتاردان نيكيتا ۋتروبين الىستان قاقپانى ءدال كوزدەپ، ەسەپ اشتى. كوپ ۇزاماي «اقجايىقتىڭ» مەرگەنى ولەگ حرومتسوۆ بۇرىشتامادان بەرىلگەن دوپتى اياعىمەن ءساتتى سوعا ءبىلدى. سودان كەيىن كوماندانىڭ تاعى ءبىر سۇرمەرگەنى، سلوۆەنيالىق لەگيونەر مارۋشكو ماتيتس ەسەپتى 2:1 گە جەتكىزدى.

ەكىنشى تايمدا الاڭ يەلەرى قوناقتارعا مۇلدەم دەس بەرمەدى. الدىمەن ايدار جاقسىبەكوۆ كوزگە تۇسسە، بۇدان سوڭ ولەگ حرومتسوۆ وسى كەزدەسۋدەگى ەكىنشى، بيىلعى ماۋسىمداعى ون ءبىرىنشى دوبىن سوقتى. ويىننىڭ ەكىنشى كەزەڭىندە الاڭعا شىققان «اقجايىقتىڭ» فۋتبولشىلارى دا تىڭ لەپ اكەلدى. اسىرەسە، يۆان انتيپوۆ وڭ قاناتتان ادەمى ءوتىپ، ەكى رەت ءدال پاس بەردى. ايىپ دوبىن سوققان ساتتە ورالدىقتاردىڭ قورعاۋشىسى، بولگاريالىق لەگيونەر يانكو ۆالكانوۆ ابجىلدىك تانىتسا، ي. انتيپوۆتىڭ پاسىنان كەيىن نيكولاي زابرودين بەسىنشى گولدى باسپەن كىرگىزدى. انتون شۋرىگين ايىپ الاڭىنان كەرى سەرپىلگەن دوپتى شىرەنە تارتىپ، قاقپانىڭ بۇرىشىن ءدال كوزدەدى. ماتچ سوڭىنا تامان «اقجايىقتىڭ» ويىنشىسىن شالىپ قۇلاتقانى ءۇشىن قوناقتاردىڭ قاقپاسىنا 11 مەترلىك ايىپ دوبى بەلگىلەندى. ونى كوماندانىڭ مەرگەن ويىنشىلارىنىڭ ءبىرى الەكسەي مالتسيەۆ ءساتتى ورىنداپ، ويىن نۇكتەسىن قويدى.

سونىمەن، «اقجايىق» بيىلعى ماۋسىمدا قارسىلاستار قاقپاسىنا سالعان گول سانىن 48 گە جەتكىزىپ، 38 ۇپايمەن ءبىرىنشى ورىنعا كوتەرىلدى. ءوز الاڭىندا «بايقوڭىردى» 2:1 ەسەبىمەن ۇتقان وسكەمەننىڭ «ۆوستوگىنىڭ» ەسەبىندە دە 38 ۇپاي بار. ال وسى تۋرعا دەيىن كوش باستاپ كەلە جاتقان تەمىرتاۋدىڭ «بولاتى» ءوز الاڭىندا شىمكەنتتىڭ «قىرانىمەن» تەڭ ويناپ، ەكى ۇپاي جوعالتتى. ءبىراق ونىڭ قورجىنىندا 36 ۇپاي بولعانىمەن، «اقجايىق» پەن «ۆوستوكتان» ءبىر ويىنى كەم، دەمەك، قۋىپ جەتۋگە مۇمكىندىگى بار. 19 -قىركۇيەكتە «اقجايىق» سىرت الاڭدا «بايقوڭىرمەن» جاسىل الاڭعا شىقسا، پرەمەر- ليگا جولداماسىنان ءالى ءۇمىتىن ۇزە قويماعان پەتروپاۆلدىڭ «قىزىلجارى» ءوز الاڭىندا «ۆوستوكتى»، س س ك ا الماتىدا «بولاتتى» قابىلدايدى. ءتورتىنشى ورىنداعى «كاسپي» اقتاۋدا «ماقتاارالمەن» كەزدەسەدى.

ەسكە سالا كەتەيىك، «اقجايىق» س س ك ا كومانداسىن ءبىرىنشى اينالىمدا سىرت الاڭدا دا 4:0 ەسەبىمەن تىزە بۇكتىرگەن بولاتىن.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى