تۋبەركۋلەزگە جىل سايىن 7 مىڭعا جۋىق ادام شالدىعادى - مينيسترلىك

مۇنداي دەرەك پرەمەر-ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ءماجىلىس دەپۋتاتتارى ساۋالىنا بەرىلگەن جاۋابىندا كەلتىرىلگەن، دەپ حابارلايدى قازاقپارات ءتىلشىسى.

«قازاقستاندا جىل سايىن ورتاشا ەسەپپەن تۋبەركۋلەز اۋرۋىنىڭ 7 مىڭعا جۋىق جاڭا جاعدايى تىركەلەدى. سوڭعى بەس جىلدا ەلىمىزدە تۋبەركۋلەز بويىنشا ەپيدەميولوگيالىق احۋالدىڭ جاقسارۋ ءۇردىسى تىركەلۋدە. ماسەلەن سىرقاتتانۋشىلىق كورسەتكىشى - 24، بالالار اراسىندا - 26، ءولىم - 42 پايىزعا تومەندەدى. 2022 -جىلى ونىڭ الدىڭعى جىلمەن سالىستىرعاندا تۋبەركۋلەزبەن سىرقاتتانۋشىلىق كورسەتكىشى كوۆيدتەن كەيىن كۇتىلەتىن 1,4 پايىزعا ءوسىم تىركەلدى»، - دەدى تامارا دۇيسەنوۆا.

دەگەنمەن، ونىڭ مالىمەتىنە سايكەس، بالالار اراسىندا سىرقاتتانۋشىلىق 2,3 پايىزعا، ال تۋبەركۋلەزدەن ءولىم-ءجىتىم 17,6 پايىزعا تومەندەدى.

«سونىمەن بىرگە، تۋبەركۋلەزبەن اۋىراتىن ادامدارعا تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا مەديتسينالىق كومەك جانە ءدارى-دارمەكپەن قامتاماسىز ەتۋ امبۋلاتوريالىق جانە ستاتسيونارلىق دەڭگەيلەردە كورسەتىلەدى. وسى ماقساتتا رەسپۋبليكالىق بيۋدجەتتەن 2023 -جىلعا 41,6 ميلليارد تەڭگە ءبولىندى»، - دەدى مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى