اتىراۋ وبلىسىندا ەكى كولىك سوقتىعىسىپ، 7 ادام مەرت بولدى

اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، جول-كولىك وقيعاسى 16-شىلدەدە بولعان.

«جەرگىلىكتى ۋاقىتپەن ساعات 15:00 شاماسىندا دوسسور- قۇلسارى- بەينەۋ باعىتىنداعى تاسجولىنىڭ 82-شاقىرىمى تۇسىندا Chevrolet Cobalt ماركالى اۆتوكولىگى جولدىڭ قارسى جولاعىنا شىققان. سالدارىنان Toyota Ipsum اۆتوكولىگىنە سوقتىعىسقان. جول-كولىك وقيعاسىنىڭ سالدارىنان Chevrolet Cobalt كولىگىنىڭ جۇرگىزۋشىسى مەن 4 جولاۋشىسى، Toyota Ipsum كولىگىنىڭ جۇرگىزۋشىسى مەن 1 جولاۋشىسى وقيعا ورنىندا قازا تاپتى. ال، 2 جولاۋشى ءتۇرلى دەنە جاراقاتىمەن جىلىوي اۋداندىق اۋرۋحاناسىنا جەتكىزىلدى»، - دەپ حابارلادى اتىراۋ وبلىسى پوليتسيا دەپارتامەنتى جانىنداعى پاترۋلدىك روتاسىنىڭ كومانديرى پوليتسيا كاپيتانى ادىلبەك شاحمەتوۆ.

قازىر پوليتسيا قىزمەتكەرلەرى جول-كولىك وقيعاسىنا بايلانىستى ءتيىستى ءىس-قۇجاتتار جيناقتاپ جاتىر.

«كولىك جۇرگىزۋشىلەرىنە جول اپاتىنىڭ ارتى اۋىر زارداپقا اكەلىپ سوقتىراتىنىن ەسكەرتەمىز. سول سەبەپتەن، جۇرگىزۋشىلەر ءوزىنىڭ جانە وزگەنىڭ ءومىرى مەن دەنساۋلىعىنا نەمقۇرايلى قاراماعانى ءجون. جول اپاتىنا ۇشىراعان ەكى اۆتوكولىكتىڭ جۇرگىزۋشىسى بۇرىن بىرنەشە رەت كولىك جىلدامدىعىن شامادان تىس ارتتىرعانى ءۇشىن جاۋاپكەرشىلىككە تارتىلعانى انىقتالىپ وتىر»، - دەپ ءمالىم ەتتى ادىلبەك شاحمەتوۆ.

ەسكە سالا كەتەلىك، بۇعان دەيىن اتىراۋدا 4 كولىك سوقتىعىسىپ، ەكى ادام كوز جۇمعانىن جازعان ەدىك.

سونداي-اق، اتىراۋدا جول-كولىك وقيعالارى سالدارىنان مەرت بولعاندار سانى %8,8 عا وسكەنىن حابارلاعان ەدىك.

اتىراۋ وبلىستىق پوليتسيا دەپارتامەنتىنىڭ باستىعى نۇرحات ورازبايەۆتىڭ ايتۋىنشا، بيىلعى 5 ايدا جول-كولىك وقيعاسى %5,4 عا تومەندەگەن. الايدا مەرت بولعاندار سانى %8,8 عا وسكەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى