سامۇرىق-قازىنا تابىسىنىڭ كەم دەگەندە 7 پايىز «قازاقستان حالقىنا» قورىنا اۋدارادى
مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
«مەملەكەتتىك ساتىپ الۋ تۋرالى» زاڭعا تۇزەتۋلەر ەنگىزىلدى. سىبايلاس جەمقورلىق تاۋەكەلدەرىن ازايتۋ جانە باسەكەلەستىكتى دامىتۋ ماقساتىندا ءبىر كوزدەن الۋ قۇقىعى الىنىپ تاستالادى:
- مەملەكەتتىك ماتەريالدار رەزەرۆى تاۋارلارى؛
- جەدەل-ىزدەستىرۋ قىزمەتىنە ارنالعان تاۋارلار مەن قىزمەتتەر؛
- عيماراتتار، تۇرعىن ەمەس ماقساتتاعى ءۇي-جايلار.
سونداي-اق، زاڭدا «سامۇرىق-قازىنا» قورىنىڭ ساتىپ الۋ ەرەجەلەرىن باسەكەلەستىكتى قورعاۋ جانە دامىتۋ اگەنتتىگىمەن كەلىسۋ، جەتكىزۋشىلەردىڭ ساتىپ الۋعا قاتىستى شاعىمدانۋ قۇقىعى جانە قوردىڭ ىشكى كووپەراتسيا شەڭبەرىندە ساتىپ الۋدى الىپ تاستاۋ مىندەتى كوزدەلەدى.
مەملەكەتتىك ساتىپ الۋ ءراسىمىن اينالىپ ءوتۋدى بولدىرماۋ ماقساتىندا مەملەكەتتىك-جەكەشەلىك ارىپتەستىك جوبالارىنىڭ ايرىقشا كريتەريى ەنگىزىلەدى. جوبادا ەكى كەزەڭ مىندەتتەلگەن، ياعني وبەكتىنى جەكە ارىپتەستىكتە قۇرۋ جانە پايدالانۋ.
سۋپەرمارجينالدىلىقتى تومەندەتۋ جانە تاۋەكەلدەردىڭ مەملەكەت پەن جەكە سەكتور اراسىنداعى تەڭگەرىمدى ءبولىنۋىن قامتاماسىز ەتۋ ءۇشىن ينۆەستيتسيالىق شىعىنداردىڭ وتەماقىسىن تولەۋ الىنىپ تاستالادى. سول سياقتى قوسا قارجىلاندىرۋ بويىنشا شەكتەۋلەر ەنگىزىلىپ، كۆازيمەملەكەتتىك سەكتور سۋبەكتىلەرىنىڭ جەكە ارىپتەستەر رەتىندە قاتىسۋى ءۇشىن توسقاۋىل بەلگىلەنەدى.
سىبايلاس جەمقورلىق ارەكەتىن باقىلاۋدى كۇشەيتۋ شەڭبەرىندە مەملەكەتتىك-جەكەشەلىك ارىپتەستىك جوبالارىن جوسپارلاۋ جانە ىسكە اسىرۋ پروتسەسىنىڭ اشىقتىعى قاعيداتىن ەنگىزۋ كوزدەلەدى. مەملەكەتتىك-جەكەشەلىك ارىپتەستىك جوبالارىن ىسكە اسىرۋ كەزىندە مونوپولياعا جول بەرمەۋ ماقساتىندا مىندەتتى تۇردە قۇزىرلى ورگانمەن كەلىسۋ كوزدەلەدى.
سونداي-اق، «تابيعي مونوپوليالار تۋرالى» زاڭعا تۇزەتۋلەر ەنگىزىلدى.
- قىزمەتتەردى ۇسىنۋ كەزىندە تەحنولوگيالىق سيكلدە پايدالانىلاتىن جەلىلەر مەن مۇلىكتى تەڭگەرىمگە جانە سەنىمگەرلىك باسقارۋعا العان جاعدايدا تاريفتى قولدانىلۋ مەرزىمى اياقتالعانعا دەيىن وزگەرتۋ مۇمكىندىگى؛
- سيفرلاندىرۋ ارقىلى تاريف بەلگىلەۋ پروتسەسىنىڭ اشىقتىعىن ارتتىرۋ.
«ۇلتتىق ءال-اۋقات قورى تۋرالى» زاڭعا دا تولىقتىرۋلار ەنگىزىلدى. «سامۇرىق-قازىنا» قورى ۇكىمەتتىڭ شەشىمى بويىنشا جىل سايىن قوردىڭ تازا تابىسىنىڭ كەمىندە %7 «قازاقستان حالقىنا» قوعامدىق قورىنا اۋداراتىن بولادى.
ودان بولەك، زاڭدا ارنايى ەكونوميكالىق جانە يندۋستريالىق ايماقتار تۋرالى زاڭنامانى جەتىلدىرۋ، جالداۋ تولەمدەرىن سۋبسيديالاۋ جونىندەگى تەتىك شەڭبەرىندە شوتتاردى قورعاۋ، شەتەلدىك اۆتوموبيلدەردى اكەلۋ مەن پايدالانۋدىڭ جەكەلەگەن ماسەلەلەرىن رەتتەۋ، قۇرىلىس ءۇشىن جوبالاردى ۆەدومستۆودان تىس كەشەندى ساراپتاۋ تاعى سول سياقتى جايتتار قاراستىرىلعان.
