جىل باسىنان بەرى قازاقستانعا 7 ميلليوننان استام شەتەلدىك كەلگەن
«جىل باسىنان بەرى ەلىمىزگە 7 ميلليون 934 مىڭ 134 شەتەلدىك كەلگەن، شىققان ازاماتتار سانى - 7 ميلليون 751 مىڭ 491 ادام. اتالعان شەتەل ازاماتتارى نەگىزىنەن جەكە شارۋالارىمەن كەلگەندەر، حالىقارالىق تاسىمالداۋ جۇمىستارىمەن اينالىساتىندار، ەلگە كەلىپ جۇمىس ىستەيمىز دەگەن ازاماتتار جانە ترانزيت، قىزمەتتىك ءىس ساپارمەن كەلگەندەر. قازىرگى ۋاقىتتا ەلگە كەلىپ، مەديتسينالىق ەمدەلەتىن ازاماتتار سانى دا كوبەيۋدە»، - دەدى ءى. يسپانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
مەملەكەتتىك باسقارۋ جۇيەسىن ءتيىمدى اتقارۋ ماقساتىندا پرەزيدەنت جارلىعىنا سايكەس ەڭبەك مينيسترلىگىنە 22 قوسىمشا فۋنكتسيا بەرىلگەن بولاتىن.
وسىعان وراي كوشى- قون سالاسىنىڭ مەملەكەتتىك ساياساتىن ءتيىمدى ىسكە اسىرۋدى ۇيلەستىرۋ بويىنشا باستى ورگان رەتىندە كوشى- قون كوميتەتى قۇرىلدى.
«بۇل كوميتەتتىڭ جۇمىستى ۇيلەستىرۋى ارقىلى مينيسترلىك باسقا دا قۇزىرەتتى مەملەكەتتىك ورگاندارمەن بىرلەسىپ، 2023-2027 -جىلدارعا ارنالعان كوشى- قون ساياساتى تۇجىرىمداماسىن ازىرلەدى. ونى 30-قاراشا ۇكىمەت قاۋلىسىمەن بەكىتتى. جاڭا تۇجىرىمداما ەلىمىزدىڭ كوشى- قون سالاسىن رەتتەۋگە جانە ەكونوميكا دامۋىن كادرلىق جاعىنان قامتاماسىز ەتۋدى كوزدەيدى. ونىڭ اياسىندا الداعى جۇمىس بارىسى 3 بلوكتان تۇرادى، ءبىرىنشى - ەلىمىزگە بىلىكتى كادرلاردى كەلۋىن ىنتالاندىرۋ، ەكىنشى - شەتەلگە شىققان ءبىزدىڭ ازاماتتاردىڭ جۇمىسىن رەتتەۋ نەمەسە ەڭبەك قۇقىقتارىن قورعاۋعا باعىتتالعان جۇمىستار، ءۇشىنشى - وڭىرلەر اراسىنداعى دەمگورافيالىق تەڭسىزدىكتى جويۋعا ارنالعان جۇمىستار بولادى»، - دەدى ءىلياس يسپانوۆ.
