الماتى كوشەلەرىنە تاعى 7 مىڭ كامەرا ورناتىلادى
بۇل تۋرالى قالا اكىمىنىڭ ورىنباسارى اسقار امرين ايتتى، دەپ حابارلايدى قازاقپارات ءتىلشىسى.
«بيىل «الماتىنىڭ ەرەكشە مارتەبەسى تۋرالى» زاڭدى ىسكە اسىرۋ ءۇشىن جەكە بەينەباقىلاۋ جۇيەلەرىن ءبىرىڭعاي ديسپەتچەرلىك پۋنكتكە ينتەگراتسيالاۋ قاعيدالارى قابىلداناتىن بولادى. ارينە، يەسىنىڭ كەلىسىمىمەن. قاۋىپسىزدىكتى قامتاماسىز ەتۋ ءۇشىن 2025 -جىلعا دەيىن بەينەتالداۋدىڭ «اقىلدى» جۇيەلەرىنىڭ بارلىق مۇمكىندىكتەرىن پايدالانا وتىرىپ، بەينەباقىلاۋمەن قامتىلماعان وبەكتىلەردە 7000 بەينەباقىلاۋ كامەراسى ورناتىلادى»، - دەدى الماتى اكىمىنىڭ ورىنباسارى اسقار امرين.
ايتۋىنشا، الماتىدا قۇقىق بۇزۋشىلىقتاردىڭ ۇشتەن ءبىرى قوعامدىق ورىندار مەن كوشەلەردە جاسالادى.
«2024 -جىلعا دەيىن ادامدار كوپ جينالاتىن جەرلەردە «SOS «دابىل تۇيمەسى» شۇعىل اۋديو جانە بەينە شاقىرۋ جۇيەسى ورناتىلاتىن بولادى. جالپى، 2030 -جىلعا دەيىن كوشەلەر، جولدار مەن اۋلالار جاڭا جارىقتاندىرۋ جەلىلەرىن سالۋ، جارىق نۇكتەلەرىن ورناتۋ جانە توزعان شامداردى جاڭا LED شامدارعا اۋىستىرۋ ارقىلى ساپالى جارىقپەن تولىق قامتاماسىز ەتىلەدى» ، - دەدى ول.
سونىمەن قاتار، ول الماتىنىڭ بارلىق اۋداندارىندا 2023 -جىلى «پوليتسيانىڭ سەرۆيستىك ورتالىقتارىنىڭ» العاشقى 8 پۋنكتى اشىلاتىنىن اتاپ ءوتتى.
«ورتالىقتاردا تەك پوليتسەيلەر عانا ەمەس، ولاردا پسيحولوگتار، مەدياتورلار كابينەتتەرى، بالالار بولمەلەرى جانە تاعى باسقاسى بولادى. قىسقا اڭگىمەلەر ارقىلى جۇزەگە اسىرىلاتىن ورتالىقتارداعى پوليتسيامەن وڭ بايلانىس تۇرعىنداردىڭ پوليتسياعا دەگەن كوزقاراسىن، سونىڭ ىشىندە قۇقىقتىق ءتارتىپتى ساقتاۋعا جانە ىنتىماقتاستىققا دايىندىعىن ەداۋىر جاقسارتادى»، - دەيدى ول.
ال، 2030 -جىلعا قاراي 30 ۋچاسكەلىك پوليتسيا پۋنكتىن اشۋ جوسپاردا تۇر.
«وسىلايشا، اتالعان شارالاردىڭ ارقاسىندا قىلمىس سانىن 2025 -جىلى 10 مىڭ تۇرعىنعا شاققاندا 165 كە دەيىن جانە 2030 -جىلعا قاراي 10 مىڭ تۇرعىنعا شاققاندا 150 گە دەيىن ازايتۋعا بولادى. حالىقتىڭ پوليتسيا ورگاندارىنا دەگەن سەنىم دەڭگەيىن 2025 -جىلى %50 دەيىن، 2030 –جىلى %80 دەيىن ارتتىرۋ كوزدەلگەن. جەكە، مۇلىكتىك جانە قوعامدىق قاۋىپسىزدىك سەزىمىن ارتتىرۋ 2025 –جىلى %80، 2030 –جىلى %88 جەتەتىن بولادى»، - دەپ تولىقتىردى سپيكەر.
