اسحات ايماعامبەتوۆ: ءبىلىم بەرۋ ۇيىمىنا باسشىلىق ەتۋ مەرزىمى 7 جىلدان اسپاۋى كەرەك
جازبادا ۆەدومستۆو باسشىسى مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىلارىن روتاتسيالاۋ قاعيدالارىن ق ر ادىلەت مينيسترلىگى تىركەگەنىن ايتادى. ايتۋىنشا، بۇل قادام ءبىلىم بەرۋ ۇيىمدارىن ءبىر ادامنىڭ 10-15 جىل جەكەدارا بيلەپ- توستەۋىنە جول بەرمەۋى كەرەك.
«وسىلايشا، ءبىلىم بەرۋ جۇيەسىندە مەكتەپ، كوللەدج جانە بالاباقشا ديرەكتورلارىن روتاتسيالاۋ ينستيتۋتى پايدا بولدى. ءبىلىم بەرۋ سالاسىندا ون مىڭنان استام مەملەكەتتىك ۇيىم بار. كوپتەگەن باسشىلار، مەرزىمسىز ەڭبەك كەلىسىمشارتتارىن جاساسقان. وسىعان بايلانىستى ءبىر ۇيىمدا 10-15 جىل جانە ودان دا كوپ جۇمىس ىستەيتىندەر از ەمەس. ارينە، ولاردىڭ اراسىندا ءوز جۇمىسىن جاقسى بىلەتىن جانە مەكتەپ، كوللەدج، مەكتەپكە دەيىنگى نەمەسە قوسىمشا ءبىلىم بەرۋ ۇيىمدارىنىڭ دامۋىنا ەلەۋلى ۇلەس قوساتىن باسشىلار بار. دەگەنمەن، 10-15 جىل بويى ءبىر ورىندا وتىرىپ، وزدەرىنىڭ باستاماشىلدىعى مەن دامۋعا دەگەن ىنتاسىن جوعالتاتىن مەكتەپ ديرەكتورلارى دا بار»، - دەپ جازدى مينيستر.
اسحات ايماعابەتوۆ ءبىلىم ۇيىمدارىنىڭ باسشىلارىن روتاتسيالاۋ مەكەمنىڭ ومىرىنە وزگەرىستەر ەنگىزۋگە جانە باسشىنىڭ جۇمىستاعى تيىمدىلىگىن ارتتىرۋعا مۇمكىندىك بەرەدى. اتالعان قاعيدات بويىنشا روتاتسيالاۋدىڭ مىناداي نەگىزگى باسىم باعىتتارى بار:
بىرىنشىدەن، ءبىر ءبىلىم بەرۋ ۇيىمىندا 4 نەمەسە 7 جىلدان استام جۇمىس ىستەگەن باسشىلار روتاتسيالانادى.
«بۇل رەتتە، وسى ءبىلىم بەرۋ ۇيىمىندا لاۋازىمعا تاعايىندالعان كۇننەن باستاپ 4 (ءتورت) جىل جۇمىس اتقارعان ءبىرىنشى باسشى روتاتسيادان ءوز ءوتىنىشى نەگىزىندە بوساتىلىپ، قولدانىستاعى ەڭبەك شارتى شەڭبەرىندە ءوز جۇمىسىن جالعاستىرا الادى. الايدا، ەگەر باسشى اتالعان ۇيىمدا 7 جىلدان استام ۋاقىت جۇمىس ىستەسە، وندا ول مىندەتتى تۇردە روتاتسيالانادى. وسىلايشا، ءبىر ءبىلىم بەرۋ ۇيىمىنا جەتەكشىلىك ەتۋ مەرزىمى 7 جىلدان اسپاۋى ءتيىس»، - دەيدى اسحات ايماعامبەتوۆ.
ەكىنشىدەن، روتاتسيالاۋدىڭ بىرنەشە شارتى بار:
- روتاتسيالاۋدى وبلىستاردىڭ جانە رەسپۋبليكالىق ماڭىزى بار قالالاردىڭ ءبىلىم باسقارمالارى جۇزەگە اسىرادى؛
- روتاتسيا ءبىر ەلدى- مەكەن اۋماعىندا جۇرگىزىلەدى؛
- روتاتسيالاۋ ءبىر دەڭگەيدەگى ۇيىم باسشىلارىنىڭ اراسىندا جۇرەدى؛
- روتاتسيالاۋ كەزىندە ءبىرىنشى باسشىلاردىڭ بىلىكتىلىك ساناتى، ياعني اتالعان سانات ءۇشىن تولەنەتىن قوسىمشا اقى دا مەرزىمى اياقتالعانعا دەيىن ساقتالادى.
«اشىقتىق پەن وبەكتيۆتىلىكتى قامتاماسىز ەتۋ ءۇشىن روتاتسيالاۋ تۋرالى ماسەلەنى قارايتىن كوميسسيا جۇمىس ىستەيتىن بولادى. جۇيەنىڭ ءتيىمدى جۇمىس ىستەۋى جانە قاعيدالاردىڭ جەرگىلىكتى ورىنداردا دۇرىس ىسكە اسىرىلۋى ءۇشىن مينيسترلىك مونيتورينگ جۇرگىزەدى»، - دەپ جازدى مينيستر.
