جامبىل وڭىرىندە وبلىستىق دەڭگەيدەگى 7 باسشىعا قىلمىستىق ءىس قوزعالعان
بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگى جامبىل وبلىستىق دەپارتامەنتىنىڭ باسشىسى ءادىلحان اشىربايەۆ ايتتى، دەپ حابارلايدى قازاقپارات ءتىلشىسى.
«ەلىمىزدە قالىپتاسقان ەپيدەميولوگيالىق جاعدايعا قاراماستان وبلىستاعى سىبايلاس جەمقورلىققا قارسى قىزمەت مەملەكەت باسشىسى مەن اگەنتتىك ءتوراعاسىنىڭ تاپسىرماسىنا وراي بارلىق قاجەتتى شارانى قابىلداپ جاتىر. اگەنتتىكتىڭ جاڭا تالابى - سىبايلاس جەمقورلىققا قارسى قىزمەتتىڭ جۇمىسىن ساننان ساپاعا اۋىستىرۋ. دەپارتامەنت جۇمىسىن وسى باعىتتا جالعاستىرۋدا. الدىن الۋ ءىس- شارالارىمەن قاتار تۇراقتى نەگىزدە جەدەل ىزدەستىرۋ جانە تەرگەۋ قىزمەتىن جۇرگىزىپ جاتىرمىز. ناتيجەسىن قىسقاشا ايتار بولسام، وسى جىلدىڭ 11 ايىندا دەپارتامەنت 121 قىلمىستىق ءىستى تىركەدى. بۇل بىلتىر تىركەلگەن قىلمىستىق ىستەر سانىنان ءبىرشاما از بولعانىمەن اۋىر ساناتتاعى قىلمىس سانى كوبەيىپ وتىر. بيىل 84، ال وتكەن جىلى 72 اۋىر قىلمىس تىركەلگەن ەدى»، - دەدى ول.
ونىڭ ايتۋىنشا، سىبايلاس جەمقورلىقتىڭ جۇيەلى ءتۇرى بويىنشا 7 قىلمىس تىركەلسە، مەملەكەتتىك باعدارلامالار اياسىندا بولىنگەن قاراجاتتاردى ۇرلاۋ فاكتىسىمەن 16، شاعىن جانە ورتا بيزنەس جۇمىسىنا زاڭسىز ارالاسۋ بويىنشا 9 دەرەك تىركەلگەن.
«دەپارتامەنت جۇمىسىنىڭ ناتيجەسىندە 80 گە جۋىق كاسىپكەردىڭ قۇقىعى قورعالدى. مۇنان باسقا دەپارتامەنت مەملەكەتتىك ورگانداردىڭ جانە كۆازيمەملەكەتتىك سەكتوردىڭ باسشىلارى تاراپىنان جاسالعان سىبايلاس جەمقورلىق فاكتىلەرىن انىقتاۋ جۇمىستارىن اتقارىپ جاتىر. اتاپ ايتقاندا، بيىل وبلىس دەڭگەيىندەگى باسشىلارعا قاتىستى 7 قىلمىس تىركەلىپ وتىر. بىلتىر 3 قىلمىستىق ءىس تىركەلگەن بولاتىن. ولاردىڭ ىشىندە وبلىس اكىمدىگى باسقارمالارىنىڭ 4 باسشىسىنا، 1 كۆازيمەملەكەتتىك مەكەمە باسشىسىنا جانە وڭىرلىك دەپارتامەنتتەردىڭ 2 باسشىسىنا قاتىستى قىلمىستىق ءىس قوزعالدى. بۇعان قوسا، 7 قىلمىس قالا، اۋدان دەڭگەيىندەگى باسشىلارعا قوزعالسا، 4 قىلمىس اۋداندىق وكرۋگتەردىڭ اكىمدەرىنە قاتىستى تىركەلدى»، - دەدى دەپارتامەنت باسشىسى.
ءادىلحان اشىربايەۆتىڭ اتاپ وتۋىنشە، بۇگىندە 105 ءىس سوتقا جولداندى. 8 ءىس قىسقاردى. جاساعان زاڭسىز ءىس-ارەكەتى ءۇشىن 70 تۇلعا قىلمىستىق جاۋاپكەرشىلىككە تارتىلدى.
«تىركەلگەن قىلمىستىق ىستەر بويىنشا 827 ميلليون تەڭگە كولەمىندە زالال كەلتىرىلگەن بولسا، ونىڭ 600 ميلليون تەڭگەدەن استامى ءوندىرىپ الىندى. 160 ميلليون تەڭگەنىڭ مۇلكىنە تىيىم سالىندى. بۇدان باسقا سىيبايلاس جەمقورلىق دەرەكتەرى تۋرالى حابارلاعان ازاماتتاردى كوتەرمەلەۋ بولىگىندە اتقارىلعان الدىن الۋ جۇمىستارىنىڭ ناتيجەسىندە جىل باسىنان بەرى 30 ازاماتقا 4,8 ميلليون تەڭگە كولەمىندە سىياقى تولەندى»، - دەدى ول.
اۆتور: مارلان جيەمباي
