ىشىمدىكتىڭ سەبەبىنەن پايدا بولاتىن نەگىزگى 7 دەرت
«بۇل اراعىڭ جاسالادى بيدايدان،
سوندىقتان دا نانمەن قۇنى تەڭ!»، - دەيسىڭ.
تىرلىگىڭدە مۇنىڭ ءبارىن ويلاماي،
تەگىن جاتقان مول ساۋاپتى تەرمەيسىڭ.
ءىشىپ ءجۇرىپ ءولىم بارىن ەسكەرمەي،
جەتپەس جەرگە قىلىشىڭدى سەرمەيسىڭ.
(ارمان بەردالين)
الكوگولدىڭ ادام دەنساۋلىعىنا وراسان ۇلكەن زارداپ كەلتىرەتىنى، تىپتەن اقىرىندا ولىمگە اپارىپ سوقتىراتىنى عىلىمي تۇرعىدان دالەلدەنگەن. بۇل ماسەلەگە قاتىستى جازىلعان عىلىمي ەڭبەكتەر مامانداردىڭ ەسكەرتۋلەرى دە از ەمەس. دەگەنمەن، ادامزات ءوز- ءوزىن قۇردىمعا سۇيرەگەن وسىناۋ ىندەتتى تۇپكىلىكتى جەڭە الماي وتىرعانى وكىنىشتى جاعداي.
الكوگولدىڭ ادام دەنساۋلىعىنا زياننان باسقا بەرەرى جوق. سوندىقتان دا بولار قازىرگى مەديتسينا الكوگولدى جەكە دارا ءدارى رەتىندە مۇلدەم قولدانبايدى. الكوگول - كوبىنەسە جۇرەك، باۋىر، اسقازان جانە بۇيرەك اۋرۋلارىنىڭ تىكەلەي سەبەبى. الايدا ادام اعزاسىن ءبىرتۇتاس جۇيە رەتىندە قولعا الار بولساق، اعزانىڭ ءبىر مۇشەسىندە تۋىنداعان اقاۋ وزگە مۇشەلەرگە جاناما تۇردە اسەر ەتەتىندىگى بەلگىلى. سوندىقتان جۇرەك، باۋىر، اسقازان جانە بۇيرەك اۋرۋلارىنان باسقا ادام اعزاسىندا تۋىنداعان بارشا اۋرۋ- سىرقاتقا الكوگولدىڭ تىكەلەي بولماعانىمەن جاناما ىقپالى بولاتىندىعى ايداي انىق.
الكوگول سونىمەن قاتار، مي جاسۋشالارىن زاقىمداپ، ادامنىڭ ويلاۋ قابىلەتى مەن زەيىنىن ويراندايدى. الكوگول كوپ تۇتىنىلعان جاعدايدا ەركەكتەردى بەلسىزدىككە ۇرىندىرادى.
الكوگولدىڭ سالدارىنان تۋىندايتىن ونكولوگيالىق اۋرۋلار: باۋىر راگى، تاماق راگى، اۋىز قۋىسى راگى، كومەي راگى، وڭەش راگى، اسقازان راگى، ىشەك راگى، ەمشەك (كوكىرەك بەزى) راگى جانە ت. ب.
جۇيكە تالشىقتارى نازىك بولعاندىقتان، ىشىمدىك ولاردى تەز السىرەتەدى. ىشىمدىكتىڭ اسەرىنەن ادامنىڭ قول- اياعى دىرىلدەپ، سال اۋرۋىنان باستاپ ولىمگە دەيىن اپارۋى مۇمكىن. ىشىمدىك سالدارىنان تۋىندايتىن جۇيكە جۇيەسىندەگى اۋرۋلار: ۋايىم، قورقىنىش، اشۋشاڭدىق، قىزعانشاقتىق، جىگەرسىزدىك، اقىل- پاراساتتىڭ كەمدىگى، پسيحيكانىڭ بۇزىلۋى، ۇيقىسىزدىق، ەستە ساقتاۋ قابىلەتىنىڭ تومەندەۋى جانە ت. ب.
ادام سۇيەگىنىڭ ورگانيكالىق وزگەرىسكە ۇشىراۋى سالدارىنان وستەپوروز اۋرۋى تۋىندايدى. الكوگولدىڭ سالدارىنان وزىنە - ءوزى قول جۇمساۋ، ۋلانۋ، ورتكە شالدىعۋ سەكىلدى مەزگىلسىز ءولىم وقيعالارى ورىن الادى.
الكوگول سالدارىنان ادام فيزيولوگياسىنداعى اۋىتقۋلار: بالالار مەن جاسوسپىرىمدەردىڭ ىشكى جانە سىرتقى دەنە مۇشەلەرىنىڭ كەمىستىگى، جارىمجان بولۋ، اقىل- ەسىنىڭ كەم بولۋى ت. ب. ورىن الادى.
ماسكۇنەمدىكتىڭ كلينيكالىق كورىنىستەرى نەۆرولوگيالىق، پسيحيكالىق، سوماتيكالىق تۇرعىدان ادامدى مازالايدى. ادامدا اشۋشاڭدىق، بەيمازالىق، ۇنەمى قورقىنىش پەن ۇرەيدىڭ بيلەۋى، قىزعانشاقتىق، سەكەمشىلدىك، تۇسىنىكسىز ويلاردىڭ مازالاۋى ت. ب. قۇبىلىستار پايدا بولادى. ەڭبەككە قابىلەتتىلىگى كۇرت تومەندەيدى. بۇزاقىلىققا اۋەستىك پەن گيگيەنالىق سالاقتىق پايدا بولادى. ءوزىن- ءوزى تومەن سانايدى. وزىنە قول جۇمساۋعا دەيىن بارادى. دەپرەسسيا، ەپيلەپسيا، ەنتسەفالوپاتيا، ۇيقىسىزدىق، تۇسىندە شوشۋ مەن مازاسىزدىق بەلەڭ الادى. سونىمەن قاتار، تەمەكى، اراق، ەسىرتكى ارتەريالدى گيپەرتونيا، ىشىمدىك سالدارىنان بولاتىن كارديوميوپاتيا، ءوت جولىنىڭ، باۋىردىڭ زاقىمدانۋى، اسقازان اۋرۋلارى (يازۆا، گاستريت، دۋودەنيت، ەلليسون سيندرومى، ون ەكى ەلى ىشەك جاراسى ت. ب. )، ميوپاتيا، پوداگرا، شامادان تىس سەمىرۋ، ەندوكريندىك اۋىتقۋلار، انەميا، مىنە، مۇنىڭ بارلىعى الكوگول قولدانۋ سالدارىنان تۋىندايتىن اۋرۋلاردىڭ ءبىرقاتارى.
