باس اۋرۋىنىڭ ءسىز بىلمەيتىن 7 سەبەبى
ادەتتە كۇيزەلىستىڭ، ىشىمدىكتىڭ، سۋىق ءتيۋدىڭ نەمەسە ۇيقىسى بۇزىلعان ادامنىڭ باسى اۋىرادى. الايدا باس اۋرۋىنىڭ ءسىز بىلمەيتىن تاعى بىرنەشە سەبەبى بار بولىپ شىقتى.
ءيىس
دارىگەرلەردىڭ ايتۋىنشا، جاعارماي، تەمەكى ءتۇتىنى مەن ءيىسسۋ ءيىسى باس اۋرۋىن تۋعىزادى. ءبىر قىزىعى، اتى اتالعان زاتتاردىڭ ءارقايسىسى ادامعا ءارقالاي اسەر ەتەدى. ماسەلەن، كەي ادامدار ءۇشىن جاعارماي ءيىسىن بىرنەشە مينۋت بويى يىسكەۋ جەتكىلىكتى بولسا، ەندىگىلەر كەمى جارتى ساعاتقا شىداي الادى. ال ءۇشىنشى ادامعا ءدال وسى ءيىس جاعىمدى اسەر قالدىرۋى مۇمكىن.
گادجەتتەر
زەرتتەۋ ناتيجەسىنە سۇيەنسەك، تەلەفون نەمەسە كومپيۋتەر جارىعىنىڭ وزگەرۋى كوزدىڭ ىشكى تورى مەن جۇيكە جۇيەسىن «ىسكە قوسادى» . ال ول ءوز كەزەگىندە باستى اۋىرتۋى مۇمكىن. بۇدان وزگە، ءار گادجەتتەن بولىنەتىن «كوگىلدىر» ءتۇس ادام ۇيقىسىنىڭ ساپاسىنا اسەر ەتەدى. بۇل دا باس اۋرۋدىڭ سەبەبىنە اينالۋى مۇمكىن.
قۇرعاۋ
ادام اعزاسىنا قاجەتتى سۋ مولشەرى تومەندەپ كەتسە دە باس اۋرۋىنا شالدىعادى ەكەن. ەگەر باسىڭىز اۋىرا قالسا، بىردەن دارىگە جۇگىرمەي، ءبىر ستاقان سۋ ءىشىپ كورىڭىز.
كۇردەلى شاش ۇلگىسى
باس تەرىسىن تارتىپ تۇراتىن شاش ۇلگىلەرىنىڭ باسسۇيەككە سالماق تۇسىرەتىنى بەلگىلى. لوندوندىق باس اۋرۋى كلينيكاسىنىڭ زەرتتەۋشىلەرى ايەلدەردىڭ جارتىسىنىڭ قاتتى تارتىلعان شاش ۇلگىسىنىڭ كەسىرىنەن باس اۋرۋىنا شالدىعاتىنىن انىقتادى.
كوفەيننەن باس تارتۋ
ءسىز كوفەنى شامادان ارتىق ىشەتىنىڭىزدى ءتۇسىنىپ، «انتيكوفەلىك» ديەتاعا وتىردىڭىز با؟ اياق استىنان كوفەدەن باس تارتقان سوڭ العاشقى كۇندەرى ءسىز شارشاڭقىلىق، ەنجارلىق سەزىپ، كوڭىل- كۇيىڭىز تۇسەدى، ءتىپتى باسىڭىز اۋىرادى.
«كوفەين قان- تامىرلارى جۇيەسىنە فيزيولوگيالىق تۇرعىدان اسەر ەتىپ، تامىرلاردى قىسۋى نەمەسە كەرىسىنشە بوساڭسىتۋى مۇمكىن. باس اۋرۋى وسىمەن تۇسىندىرەلەدى»، - دەپ ءتۇسىندىردى نيۋ- يوركتىق نيەۆرولوگ ميا مينەن.
ميدىڭ «قاتىپ قالۋى»
سۋىق تاعام جەگەندە (بالمۇزداق) نەمەسە مۇزداي سۋسىن ىشكەندە نە سەبەپتى ادامنىڭ باسىنىڭ اۋىراتىنىن عالىمدار ءالى كۇنگە دەيىن تۇسىندىرە الماي الەك. جۋىردا دجونسون حوپكينس ۋنيۆەرسيتەتىنىڭ عالىمدارى، تەمپەراتۋراعا كەلگەندە سەزگىشتىك قابىلەتى جوعارى جۇيكە جۇيەسىنىڭ سالدارىنان بولۋى مۇمكىن دەگەن بايلامعا كەلدى.
كوك تۇسكەن ىرىمشىك (جانە ۇزاق ۋاقىت بۇرىن وندىرىلگەن ىرىمشىك)
سونداي-اق، كەيبىر ازىق- تۇلىك تۇرلەرى باس اۋرۋىن تۋعىزۋى مۇمكىن. ولاردىڭ ىشىندە وندىرىلگەنىنە ءبىراز ۋاقىت بولعان ىرىمشىك، كوك تۇسكەن ىرىمشىك، شاراپ، ساليامي، ارقان بالىق جانە مارينادتالعان قيار بار. عالىمداردىڭ پايىمداۋىنشا، اتى اتالعان ازىقتاردىڭ قۇرامىندا سۋلفيتتەر بولعاندىقتان، ادامنىڭ باسى اۋىرادى ەكەن.
