ون جەتى ادامدى قۇتقارىپ قالعان شىمكەنتتىكتىڭ ەرلىگى 7 جىلدان كەيىن ەسكەرىلدى
ءوز ءومىرىن قاۋىپ-قاتەرگە تىگىپ، جولاۋشىلاردى امان الىپ شىققان توتەنشە جاعدايلار قىزمەتكەرى «ەرلىگى ءۇشىن» توسبەلگىسىن كەۋدەسىنە تاقتى، دەپ حابارلايدى قازاقپارات ح ا ا ءتىلشىسى.
قايعىلى جاعداي وسىدان 7 جىل بۇرىن الماتى-تاشكەنت تاس جولىنىڭ بويىندا بولعان ەدى. سول كۇنى ءورت ءسوندىرۋشى ءتورت تۋىسىمەن بىرگە الماتىعا ساپارلاپ بارا جاتقان. جامبىل وبلىسىنىڭ اۋماعىنان وتە بەرىستە اۆتوبۋس پەن اۋىر جۇك كولىگى قاراما قارسى سوقتىعىسىپ قالادى. ارتىنشا قوعامدىق كولىك وتقا ورانادى. وسى كەزدە توتەنشە جاعدايلار قىزمەتكەرى قاۋىپكە قاراماي، قىزىل جالىننىڭ ىشىندە قالىپ قويعان ادامداردى بىرتىندەپ دالاعا شىعارادى. قۇتقارىلعان جولاۋشىلاردى اۆتوبۋستان مۇمكىندىگىنشە الىس جەرگە اپارىپ، كەيبىرىن جولشىباي وتكەن كولىكتەرگە مىنگىزىپ جىبەرگەن.
جاراقاتتانعانداردىڭ اۋرۋحاناعا جەتۋىنە قولعابىس ەتتى. الايدا ءوزىنىڭ ءۇش باۋىرى جانىپ جاتقان اۆتوبۋستىڭ ىشىندە قالىپ قويادى. «اۆاريا بولعاندا بۇرىن وندايدى كورمەگەن ادامدار وزگەلەردى قۇتقارا المايدى، ءتىپتى قاراي المايدى. ال، ەندى مەن قولىمنان كەلگەنشە قول ۇشىمدى تيگىزدىم. اۆتوبۋستىڭ الدى جانىپ جاتقان سوڭ، ارت جاعىنا كىرىپ وسىنشا ادامدى شىعاردىم. ەڭ اقىرىندا نازەرگەن قارىنداسىمدى الىپ شىقتىم. ءۇش جاقىنىمدى سول جەردەن الىپ شىعا الماي قالدىم. ەڭ وكىنىشىم سول بولدى»، - دەيدى داۋلەت بايقابىلوۆ.
وسىلايشا بەيبىت كۇننىڭ باتىرى اتانعان ازاماتتىڭ ەرلىگى 7 جىلدان كەيىن ەسكەرىلدى. ماراپات يەسى قازىر قازىعۇرت اۋدانىندا تۇرىپ جاتىر. ءورت ءسوندىرۋشى قىزمەتىنەن دەمالىسقا شىعىپ، باسقا سالادا ەڭبەك ەتىپ ءجۇر.
اۆتور: اينۇر اقبايەۆا
