قازاقستان جىل باسىنان بەرى 7 ميلليون تونناعا جۋىق استىق ەكسپورتتادى - يسايەۆا

بۇل تۋرالى بۇگىن قازاقستانداعى استىق نارىعىنىڭ اشىقتىعىن ارتتىرۋ جونىندەگى كونفەرەنتسيادا ەلىمىزدىڭ اۋىل شارۋاشىلىعى ۆيتسە-ءمينيسترى گۇلميرا يسايەۆا ءمالىم ەتتى، دەپ حابارلايدى قازاقپارات.

«اعىمداعى جىلى ءبىز مول ءونىم الىپ، 23,7 ميلليون توننا استىق باستىردىق. ونىمدىلىك گەكتارىنا 15,4 تسەنتنەردى قۇرادى. بۇل سوڭعى جىلدارداعى رەكوردتىق ءتۇسىم بولىپ وتىر. وڭدەلگەننەن كەيىنگى تازا سالماقتاعى استىقتىڭ وندىرىلگەن كولەمى 21,7 ميلليون توننا دەڭگەيىندە بولادى دەپ بولجانۋدا»، - دەدى ول.

ۆيتسە-ءمينيستردىڭ اتاپ وتۋىنشە، بۇل كولەم ىشكى سۇرانىستى تولىقتاي قاناعاتتاندىرۋمەن قاتار، 9 ميلليون تونناعا دەيىنگى استىقتى ەكسپورتقا شىعارۋعا دا مۇمكىندىك بەرەدى. «وسى جىلدىڭ باسىنان بەرى 10- قاراشاداعى مالىمەتتەرگە سايكەس استىققا بالاما ۇندى قوسا العاندا، شامامەن 7 ميلليون توننا استىق ەكسپورتقا جونەلتىلدى. ال بۇل وتكەن جىلدىڭ سايكەس كەزەڭىمەن سالىستىرعاندا، شامامەن 21 پايىزعا ارتىق. جالپى، قازاقستاندىق استىق پەن ۇن ەكسپورتقا شىعارىلاتىن ءداستۇرلى نارىقتاردىڭ قاتارىندا ورتا ازيا ەلدەرى، اۋعانستان، يران، ازەربايجان مەملەكەتتەرى بار. سونىمەن بىرگە ءبىز سولتۇستىك افريكا، تاياۋ شىعىس، ەۋروپالىق وداق ەلدەرى مەن قىتايعا دا استىق جەتكىزۋ كولەمىن ۇلعايتۋعا نيەتتىمىز»، - دەدى يسايەۆا.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى