جان دۇنيەنىڭ تىنىشتىعى: 7 زاڭدىلىق
ال شىنىمەن دە جەتىستىككە جەتىپ، باقىتتى ءومىر ءسۇرۋ فورمۋلاسىن قالىپتاستىرعان بولساڭىز ءسىز اتالعان جەتى زاڭدىلىقتى ءبىلۋىڭىز كەرەك. نەمەسە ءوزىڭىزدىڭ ىشكى جان تىنىشتىعىن ساقتاۋ ەرەجەڭىزدى بىزگە ۇسىنىپ كورىڭىز.
«ويلار ورىندالادى»
نە ويلاساڭ سونىڭ ىسكە اينالۋى - زاڭدىلىق. بۇل ءبىرىنىشى زاڭ. ءسىز جامان ويدان ارىلماساڭىز الدىڭىزدان كەلەڭسىزدىكتەر شىعا بەرەدى. سەنىڭىز. بۇل اقيقات. دجەيمس اللەن: «ادام - مي» دەگەن. ەندەشە ميىمىزدا ورىن الىپ جاتقان كەز كەلگەن دۇنيە ءىستىڭ ناتيجەسى. جاقسى ءومىر سۇرگىڭىز كەلسە جاقسى ويلاڭىز. قانداي جاعداي بولماسىن جاقسى نارسەنى ويلاۋ ءسىزدىڭ باقىتتى ءومىر ءسۇرۋىڭىزدىڭ كەپىلى.
«قاناعاتقا قارىن تويسىن، بۇل قالىپتى جاعداي»
«قۇمىراداعى تولىپ تۇرعان سۋ، تامشىلاردىڭ جيىنتىعىنان كەلگەن» . بۇل ءبىر ءتامسىل عانا بولۋى مۇمكىن. ءبىراق بەرەر ماعىناسى كوپ. قازاق «جىلقى قۇلىننان، تەڭگە تيىننان» دەپ بەكەر ايتپايدى. ءار نارسەگە از بولسا دا قاناعات تانىتىپ، سابىرلى بولۋ ءسىزدىڭ الداعى ۋاقىتتاعى ۇلى جەڭىسىڭىزدىڭ ايناسى. رالف ۋولدو ەمەرسون: « تەگىندە ءاربىر شەبەر تەك قىزۋشىلىق تانىتۋشىلار بولعان» دەيدى. ياعني، ءسىزدىڭ ءسال عانا تالابىڭىز بەن قىزىعۋشىلىڭىز ءبىر ءىستىڭ قايتالانباس شەبەرى قىلۋى مۇمكىن.
«كەشىرۋ»
كەشىرىم - ىشتە جاتقان ۇلكەن ۇلىلىق. ءبىراق وسىناۋ ۇلىلىقتى سىرتقا شىعارۋ ءۇشىن تاكاپپارلىقتىڭ الدىنان ءوتۋ كەرەك. ءناپسىڭىزدى تەجەي الساڭىز ءسىز ءبارىن جەڭەسىز. كەشىرە ءبىلۋ دە ونەر. ويتكەنى كەشىرىم سۇراۋ ءۇشىن بۇكىل جان دۇنيەڭىز تىنىشتىقتا بولۋ كەرەك. كەشىرە ءبىلۋى بىرەۋگە باقىت سىيلاۋمەن تەڭ. بۇل زاڭدىلىقتى ءار كۇن سايىن ءار ارەكەت سايىن قايتالاپ داعدىعا اينالدىرعان ابەستىك بولماس.
«ءسىزدىڭ ءاربىر ارەكەتىڭىزدىڭ ءوز ءمانى بار»
«ايتىلعان ءسوز اتىلعان وقپەن تەڭ» دەگەن بار. ەندەشە ءسىزدىڭ ءاربىر ءسوزىڭىزدىڭ ىسكە اينالار كەزى بار جانە ونىڭ وزىنە ءتان ءمانى مەن ماعىناسى دا جوق ەمەس. سوندىقتان نە ىستەسەڭىز دە ويلانىپ بارىپ ىستەۋگە تىرىسىڭىز. «جەتى رەت ولشەپ ءبىر رەت كەسىڭىز»
«تۇسىنۋگە تىرىسىڭىز»
ستەفان كوۆي: «ءبىرىنشى ءتۇسىنىپ كورىڭىز، سودان كەيىن بارىپ ءوزىڭىزدى تۇسىنگەنىن قالاڭىز» . بۇل ايتىلا سالعان ءتامسىل ەمەس، پايداسى بار دۇنيە. ويتكەنى وزگەلەردى ءتۇسىنۋ ارقىلى ءسىز ءوزىڭىزدى دە تاني الاسىز. وزگەنى كوپ تىڭداڭىز. جانە جاي تىڭداپ قويماڭىز ءتۇسىنىڭىز. ءسىزدىڭ ويىڭىز جەتىپ ەكى تۇسىنىك ءبىر- بىرىمەن تابىسقان كەزدە بارىپ ارەكەتكە ءوتىڭىز. ال بۇل تۇسىنىكتەر ءسىزدىڭ جان دۇنيەڭىزدى تىنىشتىعىن ساقتاۋعا كومەكتەسەدى.
« ءوزىڭىزدى جەڭە ءبىلىڭىز»
ءدال قازىر ءسىز قانداي وي ويلاپ وتىرساڭىز سول ويدىڭ جەتەگىندە كەتەسىز. ال ويلاعان ويعا كۇش ءتۇسىرىپ، ونى باقىلاي بىلسەڭىز ءسىز ءار ىسىڭىزگە جاۋاپ بەرە الاسىز. بۋددا: «ادامدى قۇرتاتىن ونىڭ جاۋى ەمەس، ءوزى» دەيدى. ەندەشە ءوزىڭىزدى ىشتەي جەڭۋ سىرتقى ورتاڭىزبەن تىعىز بايلانىسقا تۇسۋىڭىزگە اسەر ەتەدى. بۇل زاڭدىلىق جەتەۋدىڭ ىشىندەگى ەڭ قيىنى.
«جان دۇنيەنىڭ ۇيلەسىمدىلىگىمەن ءومىر ءسۇرىڭىز»
جان دۇنيەنىڭ ۇيلەسىمدىلىگىن ىشتەن ىزدەڭىز. ول سىزگە سىرتتان كەلمەيدى. سىرت كوزدىڭ نە سىرتتىڭ اڭگىمەسى ءسىزدىڭ تىنىشتىعىڭىزدى قالىپتاستىرمايدى. ويتكەنى ولاردىڭ ايتۋىمەن ءسىزدىڭ جۇرەگىڭىزدىڭ قالاۋى ەكى ءتۇرلى. سوندىقتان ايتقانعا ەرىپ ەمەس، قالاۋمەن قالاپ كۇن كەشىڭىز. ال جان دۇنيەنىڭ ۇيلەسىمدىلىگى دەگەنىمىز - ءسىزدىڭ تىنىشتىعىڭىزدىڭ كەپىلى.
massaget.kz
