قازاقستانداعى ەڭ وعاش 7 پارا

وكىنىشكە قاراي، ءبىزدىڭ ەلدە دە پاراقورلىق بەلەڭ العان. ءتىپتى ءتۇرلى جولمەن پارا الىپ، ەل ەسىندە قالىپ ۇلگەرگەندەر دە بارشىلىق. بۇل تۋرالى theopenasia.net-كە سىلتەمە جاساپ NUR. KZ حابارلايدى.

 نازارلارىڭىزعا قازاقستانداعى ەڭ وعاش پارا العانداردىڭ ءتىزىمىن ۇسىنامىز.

ويىنشىق

الماتى وبلىسىندا وعاش پارا العان جول پوليتسەيى جاۋاپقا تارتىلدى. جۇمىس بارىسىندا ول ەكى جىلعا جۇرگىزۋشى قۇقىعىنان ايىرىلعان تۇرعىندى كولىك باسقارعان كۇيىندە قۇرىقتاعان. ونى جاۋاپكەرشىلىكتەن بوساتۋدىڭ ەسەسىنە ينسپەكتور اتامبايەۆ جۇرگىزۋشىدەن پۋلتپەن باسقارىلاتىن ويىنشىق كولىك ساتىپ الىپ بەرۋىن قالاعان.

الايدا 35 مىڭ تەڭگەلىك سىيلىقتى قىمباتسىنعان جۇرگىزۋشى ينسپەكتوردى ءتارتىپ ساقشىلارىنا ۇستاپ بەردى.

ناتيجەسىندە، سوت قۇقىق قورعاۋشىنى ءۇش جىلعا باس بوستاندىعىنان ايىردى.

ەسىكتەر

تاراز ءى ءى ب- دەگى بۇرىنعى تەرگەۋشى سەكسۋالدىق جانجالدان پايدا تاپپاق بولعانى ءۇشىن ەكى ميلليون تەڭگەگە جۋىق ايىپپۇل تولەيتىن بولدى. ايەل ءوزىن زورلاماق بولعانىن ايتىپ، پوليتسەيگە جۇگىنگەندە تەرگەۋشى ابيەۆ ءىستى تەرگەۋگە كىرىسەدى.

الايدا ايىپتالۋشىنى كەشىرگەن ايەل ءوز ارىزىن قايتارىپ الماق بولادى. ءىستى تەگىن توقتاتۋدى قالاماعان ءتارتىپ ساقشىسى ايىپتالۋشىدان پارا تالاپ ەتەدى. ول ەر كىسىنىڭ مەتالل جونۋشى بولىپ قىزمەت ەتەتىنىن بىلگەننەن كەيىن، ودان وزىنە تەمىر ەسىك ورناتىپ بەرۋىن سۇراعان.

ايىپتالۋشى پوليتسەيدىڭ تالابىن ورىندايدى، ءبىراق ونى الدىن الا قۇقىق قورعاۋشىلارعا ايتىپ بەرەدى. ەسىك ورناتىلا سالىسىمەن پوليتسەيدىڭ قولىنا كىسەن سالىندى.

بيلەتتەر

اقتاۋدا ميگراتسيالىق پوليتسيا قىزمەتكەرى پارانى اۋە بيلەتتەرى تۇرىندە العان. شەتەل ازاماتتارىنا قۇجاتىن راسىمدەۋدى تەزدەتكەنى ءۇشىن 412 مىڭ تەڭگەلىك بيلەت ساتىپ الىپ بەرۋىن تالاپ ەتكەن يسپەكتور قاناتبايەۆ ءتيىستى جازاسىن الدى.

سوت ونى مۇلكىن تاركىلەي وتىرىپ، 7  جىلعا باس بوستاندىعىنان ايىردى. سونىمەن قاتار ەر كىسى قۇقىق قورعاۋ ورگاندارىندا قىزمەت ەتۋدەن الاستاتىلدى.

ال سولتۇستىك قازاقستان وبلىسى مادەنيەت باسقارماسىنىڭ بۇرىنعى باسشىسى ءدال سونداي ارەكەتى ءۇشىن ءبىر جىل تۇرمەدە وتىراتىن بولدى. ول دا بيلەتتى پارا رەتىندە الماق بولعان. الايدا اۋە بيلەتىن ەمەس، كونسەرت بيلەتىن سۇراتقان. ءىس- شارا ۇيىمداستىرۋشىسىن وزىنە شاقىرعان ول، اگۋتين مەن ۆارۋمنىڭ كونسەرتىنە ءبىرىنشى قاتاردان تەگىن ورىن بەرۋىن تالاپ ەتكەن.

ولاي بولماعان جاعدايدا كونسەرتتى بولدىرمايتىنىن ايتىپ، قوقان- لوققى كورسەتكەن. پروديۋسەرلەر مادەنيەت باسقارماسى باسشىسىنا جارتى ميلليون تەڭگە تۇراتىن 26 بيلەتتى سىيلاپ، كەيىن قارجى پوليسياسىنا حابارلاعان. تالعات اقىلبەكوۆ قىلمىس ۇستىندە ۇستالدى.

قويلار

وڭتۇستىك قازاقستان وبلىسى سارىاعاش اۋدانى «جىلعا» اۋىلدىق وكرۋگىنىڭ اكىمى پارانى قويمەن العانى ءۇشىن جاۋاپقا تارتىلدى. جەر تەلىمىن بەرۋدىڭ ەسەسىنە ەكى قوي سۇراعان ازامات ولاردى جەپ تە ۇلگەرمەگەن.

سونىمەن قاتار، وڭتۇستىك قازاقستاندا قويعا دەگەن ماحاببات كولونيا باسشىسىنىڭ ورىنباسارىن دا قىلمىسقا يتەرمەلەگەن. قوي ەتى ءۇشىن قىلمىسكەرلەردى بوستاندىققا جىبەرىپ وتىرعان ەر كىسىنىڭ ءوزى قىلمىسكەر دەپ تانىلدى.

ۋىلدىرىق

اتىراۋ وبلىسىندا وعاش پارا الۋ وقيعاسى قايعىلى جاعدايمەن اياقتالدى. قارجى پوليتسەيلەرى اۋداندىق پوليتسيا شەفىن قىلمىس ۇستىندە قۇرىقتاعان. «يساتاي» ءى ءى ب باسشىسى بەلگىلەنگەن اقشادان بولەك 3 كەلى ۋىلدىرىقتى پارا رەتىندە العان. تەرگەۋ اقىلبەك قۇبايدۋلليننىڭ بۇل پارانى براكونەرلەرگە بولىسۋ ءۇشىن العانىن انىقتادى.

مايور ۋاقتىشا وقشاۋلاعىشتا ءوزىن ناشار سەزىنگەنىن ايتادى. كۇدىكتىنى ەمحاناعا جەتكىزگەن. كەيىن ول ەمحانادان قاشىپ كەتىپ، بىرنەشە كۇننەن سوڭ قالا ورتالىعىنداعى قۇرىلىس الاڭىندا اسىلىپ قالادى.

بۇقتىرىلعان ەت

ال سەمەيدە وفيتسەر پارانى بۇقتىرىلعان ەت تۇرىندە الامىن دەپ اباقتىدان ءبىر- اق شىققان. جەرگىلىكتى اسكەري- تەحنيكالىق مەكتەپتىڭ ديرەكتورى كۋرسانتتاردى ءۇش مەزگىل تاماقتاندىرۋدى ءوز موينىنا العان كاسىپكەردەن وسى جارتىلاي فابريكاتتىڭ ەكى قورابىن تالاپ ەتىپتى. ۇستىنەن تاعى 200 مىڭ تەڭگە قوسىپ بەرۋىن سۇراعان. كاسىپكەر قۇلقىنى كەڭ ديرەكتوردى بىردەن قۇزىرلى ورگان وكىلدەرىنە ۇستاپ بەردى.

ءدال جۇمىس ورنىندا قۇرىقتالعان ديرەكتور ەكى جىلعا سوتتالىپ كەتتى. سونىمەن بىرگە، ول مەملەكەتتىك قىزىمەتتەن دە ءۇش جىلعا الاستاتىلدى. ءبىراق 59 جاستاعى ايىپتالۋشى ۇكىممەن كەلىسپەي، قايتادان شاعىم تۇسىرمەك نيەتتە.

كولىك شامدارى

پاۆلودار وبلىسىندا كولونيا قىزمەتكەرى تايلاقوۆ جازاسىن وتەۋشىدەن پارا رەتىندە اۆتوكولىكتىڭ  10000 تەڭگە تۇراتىن ەكى جارىق شامىن العان. ەسەسىنە ول اباقتىعا وتىرعان ازاماتقا قولايلى جاعداي جاساۋعا ۋادە بەرگەن.

ناتيجەسىندە قالالىق سوتتىڭ ۇكىمىمەن تايلاقوۆ قىلمىستىق كودەكستىڭ 366-بابى، 1- ءبولىمى بويىنشا قىلمىس جاساعانى ءۇشىن ايىپتى دەپ تانىلدى. سونداي- اق ونىڭ جەكە باسىنا تيەسىلى مۇلىگى تاركىلەنىپ، 500 مىڭ تەڭگە كولەمىندە ايىپپۇل تولەۋى ءتيىس.

بۇعان قوسا، ول ءومىر بويى مەملەكەتتىك قىزمەتتە جانە جەرگىلىكتى باسقارۋ ورگاندارىندا جۇمىس ىستەۋ قۇقىعىنان ايىرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى