حابار ارناسىندا «7 ءان» اتتى جاڭا مۋزىكالىق جوبا باستالدى

ەلىمىزدىڭ بەلگىلى انشىلەرىنىڭ حالىقتىڭ سۇيىكتىسىنە اينالعان اندەردى جاستار زامان تالابىنا ساي، جاڭاشا ورىنداپ شىقپاق. ەسكەندىر حاسانعاليەۆ، روزا رىمبايەۆا، نۇرعالي ءنۇسىپجانوۆ، مەيرامبەك بەسپايەۆ سىندى انشىلەر مەن «دوسمۇقاسان»، «نۇر- مۇقاسان»، «مۋزارت» توبى ورىندايتىن اندەردى حالىق ءسۇيىپ تىڭدايدى.

سوندىقتان دا جاڭا شوۋدا وسى انشىلەردىڭ رەپەرتۋارىنداعى اندەرگە ءبىر باعدارلاما ارنالادى. ياعني جەتى جاس ورىنداۋشى ونىڭ جەتى ءانىن جاڭاشا ورىنداپ شىقپاق.

نۇرگۇل نۇعمانوۆا، مۋزىكالىق پروديۋسەر:

- ءبىز مۇندا ءتۇپنۇسقادان الشاقتايمىز. كەيدە اۋەندەرىن وزگەرتەمىز، بىردە وڭدەۋى بولەك بولۋى مۇمكىن. دەگەنمەن ءاننىڭ مازمۇنى، نەگىزى وزگەرمەيدى. باستى ماقسات - ءاندى جاڭاشا ورىنداۋ.

تۇيگەنىمىز - اعا بۋىن وكىلدەرىنىڭ سۇيىكتى اندەرىن جاستارعا، بولاشاق ۇرپاققا زامان تالابىنا ساي جەتكىزۋ. مىسالى، «جەتى ءان» باعدارلاماسىنىڭ بۇگىنگى قوناعى - حالىقتىڭ سۇيىكتىسى روزا رىمبايەۆا. ءتۇسىرىلىم الاڭىندا ونىڭ ورىنداۋىنداعى «ايگولەك» ءانى شىرقالدى.

اڭسار ءدىلداباي، «دجۋنيورس» توبىنىڭ ءانشىسى:

- بۇل باعدارلاما شىنىندا دا قىزىق بولاتىن سەكىلدى. سەبەبى شىنىندا دا وسى بالا كەزىمىزدەگى تىڭداپ وسكەن اندەرىمىزدى جاڭا باعىتپەن وزگەرتىپ ايتۋ، ءبىزدىڭ وزىمىزگە دە قىزىق بولدى. ياعني انگە جاڭا تىنىس بەرۋ.

باعدارلامانىڭ ەرەكشە تۇسى، ەل اۋىزىندا جۇرگەن ليريكالىق ءان ويلاماعان جەردەن حيپ- حوپ، سوۋل، كلاسسيكالىق ءتىپتى حالىق اندەرى نەگىزىندە دە ورىندالۋى مۇمكىن.

مەيىرحان جانتورعانوۆ، «مەسسو» توبىنىڭ ءانشىسى:

- بۇل جوبا بىزدەر ءۇشىن جاڭا اشىلۋ دەپ ايتسا بولادى. سەبەبى جاندى داۋىسپەن ءوزىمىزدىڭ دەڭگەيىمىزدى تاعى دا جوعارىلاتىپ، تاعى دا ءوزىمىزدى سىناپ كورەيىك دەپ وسىندا كەلىپ وتىرمىز.

روزا رىمبايەۆا، ق ر حالىق ءارتىسى:

- بۇگىنگى ورىندالاتىن اندەر 40 -جىل بۇرىن، 35 -جىل بۇرىن جازىلعان، ورىندالعان جانە سول كەزدەگى مانەرمەن ورانجيروۆكا جاسالعان. بۇگىنگى ورىنداۋشىلار بۇگىنگى كۇننىڭ مانەرىمەن، بۇگىنگى كوزقاراسپەن ورىنداپ جاتىر. سەبەبى قاتىپ قالعان دۇنيە جوق قوي. مۋزىكانتتاردىڭ يمپروۆيزاتسياسى بار بۇل جەردە، بۇل ەرەكشە ءبىر وزگەشەلىكپەن ورىندالىپ وتىر.

ساراپشىلار توبىندا بەلگىلى مۋزىكانتتار، ءانشى، اقىندار بار. ارينە، بۇل سايىس بولعاندىقتان، قازىلار مۇشەسى مەن ورىنداۋشى اراسىندا كەلىسپەۋشىلىك بولۋى مۇمكىن. ءبىراق ەڭ سوڭعى شەشىمدى العاشقى ورىنداۋشى قابىلدايدى. ياعني ول جەتى ءاننىڭ ىشىنەن وزىنە ۇناعان نۇسقاسىن تاڭدايدى.

جەڭىمپازداردىڭ گالا-كونسەرتىمەن اياقتالاتىن «جەتى ءان» باعدارلاماسىن بۇگىننەن باستاپ ءار جۇمادا كەشكى ساعات 21:30 دا «حابار» ارناسىنان كورە الادى.

«حابار»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى