ەلوردالىق «استانا ارلاندارى» 7- جەڭىسىنە قول جەتكىزدى
العاشقى جەكپە-جەك ارلاندىقتار ءۇشىن بارىنشا قيىن بولدى دەسەك تە بولادى. ويتكەنى بۇعان دەيىن وليمپيادا ويىندارىندا ەكى مارتە قولا جۇلدەگەر اتانعان، بۇگىندە يتالياندىقتاردىڭ ساپىندا ونەر كورسەتۋگە بەل بۋعان يرلاندىق بارنس تە كونلاندتىڭ ازۋلى ەكەندىگى بوكس جانكۇيەرلەرىنە جاقسى تانىس. دەگەنمەن، 49 كەلى سالماق ساناتىندا ونەر كورسەتكەن جەرلەسىمىز تەمىرتاس ءجۇسىپوۆ ۇپاي سانىمەن ەسە جىبەرگەنىمەن، قارىمدى قارسىلاسىنا ايتارلىقتاي ەسە جىبەرە قويدى دەپ ايتۋعا كەلمەيدى. ال 56 كەلى سالماق ساناتىندا شارشى الاڭعا كوتەرىلگەن جەرلەسىمىز قايرات ەرعاليەۆ تاعى ءبىر يرلاندىق مايكل دجون كونلاننان باسىم ءتۇستى.
ايتا كەتەرلىگى، 5 راۋندتىق كەزدەسۋدىڭ 4 راۋندى بارىنشا شيەلەنىستى ءوتتى دەسەك ارتىق ەمەس. الايدا، 5- راۋندتىڭ بەل ورتاسىندا قازاقستاندىق بوكسشىنىڭ سول قاباعى جارىلىپ، جەكپە-جەك توقتاتىلۋىنان-اق قازاقستاندىق بوكس جانكۇيەرلەرىنىڭ وزەگىن وكىنىش ورتەگەن-ءدى. ءبىراق، جەكپە-جەكتى ءجىتى باقىلاۋدا ۇستاعان تورەشىلەر جەڭىستى ق. ەراليەۆتىڭ قانجىعاسىنا بايلادى. ويتكەنى، 4 راۋند بويى قايرات قارسىلاسىنان ۇپاي سانى ەسەبىمەن باسىم تۇسكەن ەدى. كەلەسى كەزەكتە شارشى الاڭعا كوتەرىلگەن 64 كەلى سالماق ساناتىنداعى جەرلەسىمىز اسحات ءۋاليحانوۆ شارشى الاڭدا تاماشا ونەر كورسەتكەنىمەن، قارسىلاسى ۆينچەنتسو مانگياكاپرەگە ەسە جىبەردى.
ال 75 كەلى سالماق ساناتىندا شارشى الاڭدا ءوزىن ەركىن ۇستاي بىلگەن مەيىرىم نۇرسۇلتانوۆ يتالياندىق رافاەل مۋننونىڭ قارسىلىق تانىتۋىنا ەش مۇمكىندىك بەرمەدى. وسىلايشا، 2:2 ەسەبىمەن تەڭ تۇسكەن قازاقستان- يتاليا ماتچىنىڭ تاعدىرىن قازاقستاندىق ۆاسيلي ليەۆيت پەن يتالياندىق ەندري سپاحي شەشۋ ءتيىستى. 91 كەلى سالماق ساناتىندا جارىس جولىنا شىققان جەرلەسىمىز العاشقى راۋندتان-اق قارسىلاسىن اۋىر سوققىلاردىڭ استىنا الىپ، شارشى الاڭداعى تىنىسىن العاشقى 3 مينۋتتا-اق تارىلتتى دەسەك ارتىق ەمەس. ويتكەنى، ەكىنشى راۋندتا يتالياندىق ودان ءارى جەكپە-جەكتى جالعاستىرۋدان باس تارتقان بولاتىن.
وسىلايشا، استانانىڭ ارلاندارى ازۋلى قارسىلاستارىن وسىمەن 7- مارتە جەرگە قاراتىپ وتىر. ەندىگى «استانا ارلاندارىنىڭ» كەلەسى كەزدەسۋى ۆەنەسۋەلا تورىندە 7- ناۋرىزدا وتپەك.
اۆتور: مارلان جيەمباي
