بيىل قازاقستاننىڭ بيداي ەكسپورتى 7 ميلليون توننادان كەم بولجانبايدى - ا. مامىتبەكوۆ
بۇگىن ماجىلىستە ءوتىپ جاتقان ۇكىمەت ساعاتىندا اۋىل شارۋاشىلىعى ءمينيسترى اسىلجان مامىتبەكوۆ وسىلاي مالىمدەدى.
«جازعى ۋاقىتتارى وڭىرلەردە جاۋىن- شاشىن نورمادان الدەقايدا كوپ ءتۇسىپ، كۇن سالقىنداۋ بولدى. ارينە، جازدا جاۋىن- شاشىن كەرەك، الايدا تومەنگى تەمپەراتۋرا مەن كۇن قىزۋىنىڭ جەتىسپەۋشىلىگى استىق داقىلدارىنىڭ تولىق ءپىسىپ جەتىلۋىنە مۇمكىندىك بەرمەدى. سوسىن بيىلعى جىلدىڭ كۇزگى ۋاقىتىندا دا جاۋىن كوپ بولدى، جيىن- تەرىمدى قيىنداتىپ تاستادى. ناتيجەسىندە سولتۇستىك قازاقستان جانە قوستاناي وبلىستارىنىڭ جەكەلەگەن اۋداندارىندا جيىن ناۋقانى ءالى كۇنگە جالعاسۋدا، اقمولا وبلىسىنداعى ەكى اۋدانداعى كۇزگى جۇمىس اياقتالۋعا جاقىن»، - دەدى اسىلجان مامىتبەكوۆ.
ونىڭ ايتۋىنشا، اكىمدىكتەردىڭ الدىن الا مالىمەتتەرىنە سايكەس، بۇگىنگى كۇنى ەلىمىز بويىنشا 14,5 ميلليون گەكتاردا الاڭدا نەمەسە ەگىن القابىنىڭ 96,5 پايىزىندا استىق داقىلدارى جينالدى.
«باستىرىلعان بيداي شامامەن بۋنكەرلىك سالماقتا 18,3 ميلليون توننانى قۇرادى، ءار گەكتاردان ەگىن ءتۇسىمى 12,6 سەنتنەردى قۇراپ وتىر. ال مايلى داقىلدار ەگىستىك القابىنىڭ 64 پايىزىنان جينالدى، جينالعان باقشا ونىمدەرى مەن كارتوپ 99,6 پايىزدى قۇرادى. بۇل رەتتە كوكونىس داقىلدارى بىلتىرعى دەڭگەيدەن گەكتارىنا 12 سەنتنەرگە ارتىق، ال كارتوپ گەكتارىنا 15,9 سەنتنەرگە ارتىق»، - دەدى ا. مامىتبەكوۆ.
سونىمەن قاتار، مينيستر اۋىل شارۋاشىلىعى تاۋارلارىن وندىرۋشىلەر اۋا رايىنىڭ قولايسىزدىعىنا قاراماستان، جيىن تەرىم بارىسىندا مەيلىنشە جاقسى كورسەتكىشكە قول جەتكىزگەنىن اتاپ ءوتتى. ونىڭ ايتۋىنشا، شىعىن بۇگىنگىدەن الدەقايدا كوپ بولۋى ىقتيمال ەدى.
«سالىستىرۋ رەتىندە ايتساق، بىلتىرعى جىلى بيىلعىدان جاعىمدى اۋا رايىنا قاراماستان ەگىن القابىنىڭ 99,6 پايىزى جينالعان ەدى. ەندەشە ايىرما سونشالىقتى ۇلكەن ەمەس، بۇل ەگىستىك باسىندا جۇرگەن شارۋالاردىڭ ەرەن ەڭبەگى. اعىمداعى جىلى جالپى بيداي كولەمى تازارتىلعاننان كەيىن شامامەن 17,6 ميلليون تونناعا بولجانادى. بۇل بيدايعا ەكسپورتتىق الەۋەتتى جەتى ميلليون تونناعا جەتكىزۋگە مۇمكىندىك بەرەدى»، - دەدى ا. مامىتبەكوۆ.
اۆتور: قانات مامەتقازى ۇلى
