قادىر مىرزا ءالىنىڭ 7 مىڭعا جۋىق كىتابى تۋعان جەرىنە جەتكىزىلدى

وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆتىڭ ءمالىم ەتكەنىندەي، اقىننىڭ قۇندى مۇرالارىنىڭ ورالعا جەتكىزىلۋىنە ەڭ الدىمەن ەلباسى تاپسىرماسىنا سايكەس وبلىس ورتالىعىندا قادىر مىرزا ءالى اتىنداعى ونەر ورتالىعىنىڭ بوي كوتەرۋى سەبەپ بولدى.

مىڭ ورىندىق امفيتەاترى، قازاقستان جازۋشىلار، سۋرەتشىلەر وداعى سىندى شىعارماشىلىق ۇيىمدار ورنالاساتىن بولمەلەرى، اق جايىق وڭىرىنەن شىققان اقىن- جازۋشىلاردىڭ مۇراجايلارى، كونفەرەنس- زالى، باسقا دا زاماناۋي ورىندارى بار، ت م د ەلدەرىندە بالاماسى جوق بۇل عيماراتتىڭ قۇرىلىسى بىتۋگە جاقىن.

ەكىنشىدەن، اقىننىڭ عۇمىر بويى جيناعان كىتاپتارى مەن جادىگەرلەرىنىڭ ەلگە جەتۋىنە وبلىس باسشىسى نۇرلان نوعايەۆ ۇيىتقى بولدى. ول اقىننىڭ جارى سالتاناتپەن، ۇرپاعىمەن ءتىل تابىسىپ، تىكەلەي بايلانىس جاسادى. سونىڭ ناتيجەسىندە ج. مولداعاليەۆ اتىنداعى وبلىستىق عىلىمي- امبەباپ كىتاپحاناسى مەن وبلىستىق تاريحي- ولكەتانۋ مۇراجايىنان بارعان التى مامان اقىننىڭ كىتاپحاناسىن عىلىمي نەگىزدە ىرىكتەپ، تەڭدەدى. 6767 كىتاپ، قادىر تۇتىنعان جۇمىس ۇستەلى، جازۋ ماشىنكەسى، جۇمساق جيھازى، بارلىعى 239 جادىگەر «كاماز» كولىگىمەن ەلگە اكەلىندى.

ج. مولداعاليەۆ اتىنداعى وبلىستىق كىتاپحانانىڭ باس مامانى اسىلعانىم جۇماعاليەۆانىڭ ايتۋىنشا، اقىن كىتاپحاناسىندا 7 مىڭنان استام كىتاپ ساقتاۋلى ەكەن. ونىڭ ىشىندە ەنسيكلوپەديا، انىقتامالىق، كوركەم ادەبيەتتەر، الەم ادەبيەتى، اۋدارمالار، اۆتوبيوگرافيالىق ادەبيەتتەر بار.

ەندى اقىن كىتاپحاناسى مەن تۇتىنعان بۇيىمدارى ورالدىڭ تورىندە تۇراتىن بولادى. قادىر مىرزا ءالى اتىنداعى ورتالىق جىل اياعىنا دەيىن پايدالانۋعا بەرىلمەكشى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى