قىتايدا نوسەر جاۋىن مەن داۋىل كەزىندە 78 ادام قازا تاپتى
جەرگىلىكتى بيلىكتىڭ حابارلاۋىنشا، 200 گە جۋىق زارداپ شەگۋشى اۋىر جاراقات العان، ولار مۇشكىل حالدە جاتىر. قازىرگى ۋاقىتتا ىزدەستىرۋ-قۇتقارۋ جۇمىستارى اياقتالماعان، بيلىك وكىلدەرى قۇربانداردىڭ سانى ءوسۋى مۇمكىندىگىن جوققا شىعارمايدى. ءبىرقاتار ەلدى مەكەندە ەلەكتر توعىمەن قامتاماسىز ەتۋ مۇمكىن بولماي وتىر.
نوسەر جاڭبىرلى داۋىل جياڭسۋ پروۆينتسياسىنىڭ بىرنەشە اۋدانىندا 23- ماۋسىم كۇنى تۇستەن كەيىن باستالعان. تابيعات اپاتىن كورگەندەردىڭ ايتۋىنشا، قاتتى جەل كولىكتەردى اۋدارىپ، اعاشتاردى سىندىرىپ، ۇيلەردىڭ شاتىرىن جۇلىپ اكەتكەن. بيلىك زارداپ شەككەن اۋداندارعا گۋمانيتارلىق كومەك جىبەردى، ونىڭ ىشىندە مىڭعا جۋىق باسپانا-شاتىر مەن 2 مىڭنان استام توسەك بار.
China Daily گازەتىنىڭ ەلەكتروندى نۇسقاسىنىڭ جازۋىنشا، داۋىل ەكى زاۋىتتى قيراتقان. باسىلىمنىڭ حابارلاۋىنشا، مەكەمەلەردە قاۋىپتى حيميكاتتار ساقتالعان، الايدا قاۋىپتى زاتتار قورشاعان ورتاعا تارالىپ كەتۋىنە قاتىستى مالىمەت بەرىلمەگەن.
مەتەورولوگتاردىڭ حابارلاۋىنشا، جەلدىڭ قارقىنى كەي جەرلەردە 35 م/س- گە جەتكەن. بۇل داۋىل 1966-جىلى يانچەن قالاسىندا سوققان داۋىلدان كەيىنگى ءىرى تابيعات اپاتى رەتىندە تىركەلدى.
