ۇكىمەت وتىرىسى: قازاقستاندا 787 ميلليارد تەڭگەنىڭ مۇلكى جاريا ەتىلدى
ق ر قارجى ءمينيسترى باقىت سۇلتانوۆ مۇلىكتى جاريا ەتۋ بويىنشا ناۋقاننىڭ بارىسى جايىندا باياندادى، دەپ حابارلاندى primeminister.kz سايتىندا.
قارجى ءمينيسترىنىڭ مالىمەتىنشە، قازىرگى ۋاقىتتا جاريا ەتۋگە مالىمدەلگەن مۇلىك سوماسى ەلىمىز بويىنشا 1 تريلليون تەڭگەگە جەتتى، ونىڭ 787 ميلليارد تەڭگەسى جاريا ەتىلگەن، ونىڭ ىشىندە ق ر اۋماعىنداعى مۇلىك - 500 ميلليارد تەڭگەگە جۋىق، شەتەلدەگى مۇلىك - 1 ميلليارد تەڭگە، اقشالاي قاراجات - 287 ميلليارد تەڭگە.
«ەگەر وتكەن جىلدىڭ 1- جەلتوقسانىنان باستاپ كۇشىنە ەنگەن (جاريا ەتۋ تۋرالى) زاڭنىڭ جاڭا ەرەجەلەرىنە دەيىن بارلىعى 425 ميلليارد تەڭگە جاريا ەتىلسە، سوڭعى ءۇش ايدا قوسىمشا 362 ميلليارد تەڭگە جاريا ەتىلگەن»، - دەپ باسا ايتتى ب. سۇلتانوۆ.
وعان قوسا، ازاماتتارعا زاڭنىڭ بۇرىنعى ەرەجەلەرى بويىنشا اقشانى جاريا ەتۋگە تولەنگەن 3 ميلليارد تەڭگەنىڭ 2,5 ميلليارد تەڭگەگە جۋىعى قايتارىلدى. ناۋقان كەزىندە ءوز مۇلكىن جاريا ەتۋگە قۇزىرەتتى ورگاندارعا بارلىعى 78 مىڭعا جۋىق ادام جۇگىندى.
«ياعني، تۇزەتۋلەر ناۋقان بارىسىنا جاڭا سەرپىن بەرگەنىن كورىپ وتىرمىز. بۇل حالىق تاراپىنان زور قىزىعۋشىلىقتى بىلدىرەدى»، - دەپ تولىقتىردى ءوز ءسوزىن قارجى ءمينيسترى.
ءوز كەزەگىندە، ق ر ۇلتتىق بانكىنىڭ ءتوراعاسى دانيار اقىشيەۆ ۇلتتىق بانك جانە ە د ب سايتتارىندا تۇسىنىكتى جانە قولجەتىمدى اقپاراتتى جاريالاۋ ارقىلى اقپاراتتىق قامتۋ جانە جۇرگىزىلىپ جاتقان جاريا ەتۋدى سۇيەمەلدەۋ بويىنشا جۇمىس كۇشەيتىلگەنىن اتاپ ءوتتى.
«وڭىرلەر دەڭگەيىندە ۇلتتىق بانكتىڭ فيليالدارى بەلسەندى تارتىلعان، ولاردىڭ وكىلدەرى ە د ب- ءدىڭ باستى كەڭسەلەرىندە جانە فيليالدارىندا جاريا ەتۋ شارتتارى تۋرالى اقپاراتتىق ماتەريالداردىڭ بار-جوقتىعىن تەكسەرەدى، بانكتىڭ جاۋاپتى قىزمەتكەرلەرىنىڭ جۇرگىزىلىپ جاتقان ناۋقان جايلى حاباردارلىعى دارەجەسىن انىقتايدى، ازاماتتاردىڭ ەسكەرتۋلەرىن جازىپ الادى، ءتۇسىندىرۋ جۇمىستارىن جۇرگىزەدى. بانكتەردىڭ جۇمىسىنداعى جاريا ەتۋ ماسەلەلەرىنە قاتىستى بارلىق انىقتالعان كەمشىلىكتەر جايلى بانك باسشىلارى اقپاراتتاندىرىلىپ، ولاردى جويۋ بويىنشا ناقتى شارالار قولدانىلادى»، - دەدى د. اقىشيەۆ.
تالقىلاۋ قورىتىندىسى بويىنشا كارىم ءماسىموۆ سايكەس مەملەكەتتىك ورگاندارعا اتالعان جۇمىستى جالعاستىرۋدى تاپسىردى.
