قازاقستان وقۋشىلارىنىڭ 75 پايىزى تولىق وتباسىندا تۇرادى
اتالعان قۇجاتتا 11، 13 جانە 15 جاستاعى 7400 دەن استام مەكتەپ وقۋشىسىنىڭ اۋقىمدى دەرەكتەرى جيناقتالعان. ەسەپ 2022-جىلعى «مەكتەپ جاسىنداعى بالالاردىڭ دەنساۋلىققا قاتىستى مىنەز-قۇلقى» (HBSC) زەرتتەۋىنە نەگىزدەلگەن.
«بالالاردىڭ 74,9 پايىزى اتا-اناسىمەن بىرگە تۇرادى. ونىڭ ىشىندە بالالاردىڭ 72,9 پايىزى اكەسى جانە اناسىمەن، 1,7 پايىزى اناسى جانە وگەي اكەسىمەن، 0,3 پايىزى وگەي شەشەسى جانە اكەسىمەن تۇرادى. 21,4 پايىزى اناسىمەن، 3,1 پايىزى اكەسىمەن، 0,6 پايىزى پاتروناتتىق تاربيەدە تۇرادى»، - دەلىنگەن حابارلامادا.
اتا-اناسىمەن بىرگە تۇراتىن بالالاردىڭ 68 پايىزىندا اكەسى دە، اناسى دا جۇمىس ىستەيدى، 26,1 پايىزىندا بىرەۋى عانا جۇمىس ىستەسە، 1,7 پايىزىندا ەكەۋى دە جۇمىسسىز.
وتباسىنىڭ الەۋمەتتىك-ەكونوميكالىق دەڭگەيى بويىنشا تابىسى تومەن بالالاردىڭ ۇلەسى - 19,4 پايىز، ورتاشا دەڭگەيدە - 61 پايىز، جوعارى دەڭگەيدە - 19,6 پايىز بالا بار. بۇل رەتتە، وتكەن جىلى 2018-جىلمەن سالىستىرعاندا ورتاشا جانە جوعارى تابىسى بار وتباسىنان شىققان وقۋشىلاردىڭ پايىزى ءوستى جانە تومەن تابىسى بار وتباسىلار ازايعان.
تالداۋ بارىسىندا انىقتالعانداي، جاسوسپىرىمدەرگە اكەلەرىنە (80,4 پايىز) قاراعاندا انالارىمەن (89,4 پايىز) نە قىزىقتىراتىنى تۋرالى سويلەسۋ وڭايىراق. 15 جاسقا قاراي اسىرەسە قىزداردا اتا-انامەن قارىم-قاتىناس ساپاسى ناشارلايدى. بارلىق جاستاعى ۇلدار قىزدارعا قاراعاندا اناسىمەن جانە اكەسىمەن قارىم-قاتىناس جاساۋ وڭاي ەكەنىن ءجيى ايتادى.
كۇن سايىن وقۋشىلاردىڭ 78,4 پايىزى وتباسىمەن ءبىر داستارحاندا تاماقتانادى.
جاس وسپىرىمدەردىڭ كوپشىلىگى (76 پايىز) وتباسىنىڭ ۇلكەن قولداۋىن سەزىنەدى. بۇل كورسەتكىش قىزدارعا قاراعاندا ۇلداردا جوعارى، جاسىنا قاراي بۇل كورسەتكىش تومەندەيدى. 2018-جىلدان باستاپ 2022-جىلعا قاراي وتباسىنىڭ قولداۋى جوعارى بالالاردىڭ ۇلەسى 5 پايىزعا تومەندەگەنى بايقالادى. ورتاشا العاندا، بالالاردىڭ 64,9 پايىزى دوستارىنىڭ قولداۋى كوبىرەك ەكەنىن ايتقان.
