قازاق تەاتر ونەرىنىڭ مايتالمانى ەسمۇحان وبايەۆ 75 جاستا
ە. وبايەۆ 1941 -جىلى الماتى وبلىسىنىڭ رايىمبەك اۋدانىندا تۋعان. الماتى مەملەكەتتىك كونسەرۆاتورياسىن، ماسكەۋدەگى ماكسيم گوركي اتىنداعى اكادەميالىق تەاتر كۋرسىن بىتىرگەن. مۇحتار اۋەزوۆ اتىنداعى اكادەميالىق دراما تەاترىنىڭ، عابيت مۇسىرەپوۆ اتىنداعى بالالار مەن جاسوسپىرىمدەر تەاترىنىڭ قويۋشى رەجيسسەرى، اباي اتىنداعى سەمەي وبلىستىق مۋزىكالىق دراما تەاترىنىڭ كوركەمدىك جەتەكشىسى، قازاق مەملەكەتتىك تەاتر جانە كينو ينستيتۋتىنىڭ رەكتورى بولعان. 1995-2001 -جىلدارى - قازاقستان رەسپۋبليكاسى مادەنيەت ءمينيسترىنىڭ ءبىرىنشى ورىنباسارى، ورىنباسارى، مادەنيەت كوميتەتى ءتوراعاسىنىڭ ورىنباسارى قىزمەتتەرىن اتقارعان.
ول رەجيسسەر بولىپ ز. اقىشەۆتىڭ «جاياۋ مۇسا»، تاحاۋي احتانوۆتىڭ «بوران»، م. كارىمنىڭ «اي تۇتىلعان ءتۇن»، ش. قۇسايىنوۆتىڭ «سەرتكە سەرت»، ق. مۇحامەدجانوۆتىڭ «وزىمە دە سول كەرەك»، ءسابيت مۇقانوۆتىڭ «بوتاگوز» جانە «قاشقار قىزى»، بەيىمبەت مايليننىڭ «شۇعا»، ءانۋار ءالىمجانوۆتىڭ «ماحامبەتتىڭ جەبەسى» بويىنشا، روللان سەيسەنبايەۆپەن بىرلەسىپ جازعان «ءوزىمدى ىزدەپ ءجۇرمىن» مەن اكىم تارازيدىڭ «ىندەت» سپەكتاكلدەرىن قويدى. سەمەي مۋزىكالىق دراما تەاترىنىڭ باس رەجيسسەرى بولىپ، وسى تەاتر ساحناسىنا ءبىرقاتار سپەكتاكلدەر شىعاردى: مۇحتار اۋەزوۆتىڭ «ايمان- شولپان»، «ەڭلىك- كەبەك»، «اباي»، «قاراگوز»، عابيت مۇسىرەپوۆتىڭ «اقان سەرى- اقتوقتى»، ەۆگەني برۋسيلوۆسكي مەن عابيت مۇسىرەپوۆتىڭ «قىز جىبەك»، تاحاۋي احتانوۆتىڭ «كۇشىك كۇيەۋ»، سافۋان شايمەردەنوۆتىڭ «ءانىم سەن ەدىڭ»، ە. راحماديەۆ پەن عابيت مۇسىرەپوۆتىڭ «قايران، مايرا»، دۋلات يسابەكوۆتىڭ «اپكە» مەن «ەرتەڭدى كۇتۋ»، و. بودىقوۆتىڭ «قوش بول، ءبورىباسار»، م. سارسەكەيەۆتىڭ «جارىلىس»، قالتاي مۇحامەدجانوۆتىڭ «كوميسسار عابباسوۆ»، ج. فايزيدىڭ «باشماعىم»، ف. ەرۆەنىڭ «تۇلكى بيكەش» سپەكتاكلدەرى بار.
«پاراسات» وردەنىمەن ماراپاتتالعان. ول گەرمانيادا، ينديادا، كورەيادا، قىتايدا، رەسەيدە، وزبەكستاندا، قىرعىزستاندا، ت. ب. ەلدەردە وتكەن قازاق ونەرىنىڭ مادەني كۇندەرىنە شىعارماشىلىق جەتەكشىلىك جاسادى.
