اقىن ايتقالي نارىكوۆ 75 جاستا
ءوڭىر باسشىسى اقىندى مەرەيلى جاسىمەن قۇتتىقتاپ، ولەڭ ولكەسىندە جىر مارجانىن تەرىپ، ءسوز قادىرىن كەيىنگى جاس ۇرپاققا ۇعىندىرا بەرۋىنە تىلەكتەستىگىن ءبىلدىردى. «ءسىز الماتى مەن استاناعا بارماي-اق ەلدە ءجۇرىپ، ەڭبەك ەتتىڭىز. وسى ەلدىڭ جاعدايىن، تۇرمىس-تىرشىلىگىن قارىمدى قالامىڭىز ارقىلى تامىرشىداي ءدوپ باسىپ وتىراسىز. سوندىقتان دا جەرلەستەرىڭىزگە قادىرلىسىز. كۇندەلىكتى ومىرگە، زاماننىڭ اعىمىنا بەلسەندىلىكپەن اتسالىسىپ جۇرەسىز. ءسىزدىڭ ولەڭدەرىڭىز بەن ماقالالارىڭىزدى گازەتتەن وقىپ تۇرامىز. اسىرەسە، تاۋەلسىزدىك جىلدارىنا ارناپ جازعان ولەڭدەرىڭىزدىڭ جاس ۇرپاقتى پاتريوتتىققا، ۇلتجاندىلىققا، ءوز ەلىن ءسۇيىپ، قادىرلەۋدە ورنى بولەك. عۇمىر جاسىڭىز ۇزاق، وتباسىڭىز امان بولىپ، نەمەرەلەرىڭىزدىڭ قىزىعىن كورىڭىز»، - دەپ تىلەك ايتقان نۇرلان اسقار ۇلى اڭگىمە اراسىندا ايتقالي اقىن تۋرالى قادىر مىرزا ءالىنىڭ جازعان ءبىر كەزدەگى تۇشىمدى ويلارىن تىلگە تيەك ەتتى. اقىننىڭ ولەڭدەرىنەن جاتقا ءۇزىندى دە وقىپ بەردى.
كەزدەسۋدە قازىرگى ادەبيەتتىڭ جاي-كۇيى، جاستار تاربيەسى دە ءسوز بولدى.
ايتا كەتەيىك، تاسقالا اۋدانىندا دۇنيەگە كەلگەن ايتقالي نارىكوۆ 1968-جىلى ورال پەداگوگيكالىق ينستيتۋتىن بىتىرگەننەن كەيىن وبلىستىق «ورال ءوڭىرى» گازەتىنىڭ رەداكتسياسىندا، ماڭعىستاۋ وبلىستىق گازەتىندە، «قازاقستان-ورال» تەلەارناسىندا جەمىستى ەڭبەك ەتتى.
تىرناقالدى تۋىندىلارى رەسپۋبليكا جاس اقىندارىنىڭ «جاس كەرۋەن» اتتى ۇجىمدىق جيناعىندا 1969-جىلى جاريالانسا، «جالىن» باسپاسىنان شىققان «جۇرەك تولقىندارى» كىتابىنا كولەمدى توپتاماسى ەندى. «كوك مايسا»، «سامال»، «ساعىنىش»، بالالارعا ارنالعان «ەركىن ەسەيىپ كەلەدى» اتتى كىتاپتاردىڭ اۆتورى. كەڭەس وداعىنىڭ باتىرى سادىق جاقسىعۇلوۆ تۋرالى دا جيناق شىعاردى. رەسپۋبليكالىق جاستار پوەزياسى فەستيۆالىنىڭ ديپلومانتى (1972). تاسقالا اۋدانىنىڭ قۇرمەتتى ازاماتى.
