قازاقستاندا جەڭىل اۆتوكولىك قۇراستىرۋ كورسەتكىشى 72 پايىزعا ءوستى
تەك بىلتىردىڭ وزىندە جەڭىل كولىك قۇراستىرۋ 72 پروتسەنتكە وسكەن. ناتيجەسىندە بۇل سالادان تۇسەتىن تابىس 185 ميلليارد تەڭگەگە جەتتى. وسكەمەندە جىلىنا 60 مىڭ اۆتوكولىك شىعاراتىن زاۋىت سالىنىپ جاتىر. ول ىسكە قوسىلعاندا كورسەتكىش تاعى ەسەلەنە تۇسپەك. جاڭا اۆتوزاۋىت وسكەمەننىڭ شەتىندە سالىنادى. ول ءۇشىن ارنايى 500 گەكتاردان استام جەر بولىنگەن. بۇگىنگە دەيىن ونىڭ اكىمشىلىك عيمارتى بوي كوتەردى. بىلتىر كۇزدەن باستاپ ءوندىرىستىڭ ىرگەتاسى قالىنىپ جاتىر. قۇرىلىسشىلار ءدال قازىر دانەكەرلەۋ جانە سىرلاۋ بولگىنىڭ تاعانىن تارتۋعا كىرىسكەن.
«بيىل قوزعالتقىش سەحىن تولىق اياقتاپ، قۇرىلعىلاردى قويىپ، مونتاجداۋ جۇمىستارىن باستايمىز. قازىر بارلىق جۇمىس كەستە بويىنشا اتقارىلىپ جاتىر. زاۋىت ىسكە قوسىلىپ، بارلىق قوندىرعىلار ورناتىلعان سوڭ، ءبىر جىلدا 60 مىڭ جەڭىل اۆتوكولىك شىعارۋ جوسپارلانىپ وتىر. ءوندىرىس تولىق ىسكە قوسىلعاندا، ءبىر مىڭ ادام تۇراقتى جۇمىسپەن قامتىلادى. ول ءۇشىن جاس ماماندار قازىرگى اۆتوزاۋىتتا دايىندالىپ جاتىر. جوعارى وقۋ ورىندارىنداعى ستۋدەنتتەر ءىس-تاجىريبەدەن زاۋىتتا وتەدى. ولارعا كاسىبي ماماندار سيفرلىق جۇيەمەن جۇمىس ىستەيتىن قۇرال- سايمانداردىڭ قىر-سىرىن ۇيرەتەدى»، - دەيدى اۆتوزاۋىتتىڭ تەحنيكالىق ديرەكتورى دميتري پوپوۆ.
