72 جاستاعى قىزىلوردالىق كۇنىنە 10 شاقىرىم جاياۋ جۇرەدى
قىزىلوردا. قازاقپارات - 72 جاستاعى قىزىلوردالىق ايتان قىدىربايەۆا بەس جىلدان بەرى جاياۋ ءجۇرۋدى ادەتكە اينالدىرعان.
ول سىرداريا اۋدانىنىڭ ساكەن سەيفۋللين اۋىلىندا تۇرادى. قىرىق جىلدان استام ۋاقىت اۋىل بالالارىنا ءبىلىم مەن تاربيە بەرىپ، بەرىدە زەينەتكە شىقتى. ال بەس جىل بۇرىن جاياۋ ءجۇرۋدى باستادى.
- العاشقى كەزدە جۇرتتان ۇيالىپ، جولداسىم ەكەۋمىز اۋىلدىڭ سىرت جاعىنا قاراي جۇرەتىنبىز. كەيىن «نەسىنە ۇيالامىن؟» دەپ باعىتىمدى اۋىلدىڭ ۇلكەن كوشەسىنەن كورشى اۋىلعا قاراي اۋىستىردىم. ودان اۋدان ورتالىعىنا دەيىن سوزدىم، - دەدى كەيىپكەرىمىز.ايتان قىدىربايەۆا تاڭەرتەڭ ۇيقىدان ويانا سالىسىمەن جۇگىرمەيدى. الدىمەن سۋ ءىشىپ الىپ، سوسىن جاتتىعۋ جاسايدى. مۇنى جۇگىرۋ الدىنداعى دايىندىق دەۋگە بولادى. ءبىلىم سالاسىنىڭ ارداگەرى جۇرگەن جەرىندە جاقسى ادەتتىڭ پايداسى جايىندا ءجيى ايتادى. ونى ءوزى دە ءوز باسىنان بىلەدى.
- دەنساۋلىققا كوپ پايداسى بار ەكەنىنە كوزىم جەتتى. مىسالى، مەنى قان قىسىمى، سوزىلمالى دەمىكپە، ءوت جولى اۋرۋى مازالايتىن. قازىر، شۇكىر، كوپ تىرلىك جاساپ قويعاندا بولماسا اۋىرمايمىن، - دەدى ايتان قىدىربايەۆا.
وعان ەرىپ جاياۋ جاياۋ جۇرەتىندەر قاتارى بىرتىندەپ كوبەيىپ كەلەدى. كۇندەلىكتى سەرىگىنە اينالعان ايمان قالدىعارايەۆا ەكەۋى تاۋلىگىنە 8-10 شاقىرىم شاماسىنداعى جولدى ارتتا قالدىرادى.
- قازىر جولداسىم دا جاياۋ جۇرۋگە قايتادان ماشىقتانىپ ءجۇر. ول كۇنىنە 4-5 مىڭ قادام جاسايدى. نەمەرەم دە اتاسىنان قالماي ىزىندە جۇرەدى، - دەدى كەيىپكەرىمىز.
ايتا كەتەيىك، جۇيەلى تۇردە جاياۋ ءجۇرۋ، جۇگىرۋ قان قىسىمىن قالىپقا كەلتىرىپ، قان تامىرلارىنىڭ تونۋسىن ارتتىرادى.
