قازاقتىڭ 71 جاستاعى اقساقالى نيۋ-يوركتەگى مارافونعا قاتىسپاق

توعىز جولدىڭ تورابىندا ءىزى قالعان سالتانات تۇيتەبايەۆ جارىستا الدىنا جان سالمايدى. ءساتىن سالسا ءالى دە بۇل دۇنيەدەگى تالاي جەلاياقتى شاڭ قاپتىرماق. جاڭا جىلدىڭ العاشقى كۇنى الەم جۇرتى ءۇشىن ادەتتە بىردەي باستالادى.

كەشەگىدەن جيىلماعان داستارحان، ونىڭ قاسىنا جايعاسقان قوناقتار جانە بىرنەشە كۇنگە جالعاسقان دەمالىس. ال ءبىزدىڭ كەيىپكەرىمىز ءۇشىن جىلدىڭ ءار كۇنى بىردەي باستالادى.

71 جاستاعى سالتانات اتا كۇندە ەرتەمەن تۇرىپ، 20 شاقىرىم جۇگىرەدى. اتا دەۋگە اۋىز بارمايتىن بۇل قاريانىڭ تابانىنىڭ استىندا مىڭ ەمەس، ميلليونداعان شاقىرىم قالدى.

سوناۋ بالا كۇندە باستالعان اۋەستىك ءومىر بويعى ادەتكە اينالىپ، جۇيرىك بوزبالانى حالىقارالىق بايگەلەرگە جەتكىزەتىنىن سپورتشى ءوزى دە بىلمەسە كەرەك.

سالتانات تۇيتەبايەۆ، حالىقارالىق مارافون جەڭىمپازى:

- كىشكەنتاي كەزىمىزدەن سپورتپەن شۇعىلداناتىنبىز. 1950-60-جىلدارى نە كومپيۋتەر، نە تەليەۆيزور جوق. ەرمەگىمىز تەك سپورت بولدى. كۇنىنە 20 شاقىرىمنان اپتاسىنا 5 رەت جۇگىرەمىن.

جاقىندا سينگاپۋردا وتكەن حالىقارالىق مارافوندا سالتانات اتا 42 شاقىرىمدى باعىندىرىپ، 3 ساعات 27 مينۋتتا مارە سىزىعىن ءبىرىنشى بولىپ كەستى. جۇگىرگەندە وزگەلەرگە شاڭ قاپتىراتىن قاريا جالىنداپ تۇرعان جاس شاعىندا ءمىنسىز بابىن كورسەتەتىن مۇمكىندىك بولماعانىن ايتادى.

ەندى اقساقال بىردە-ءبىر مارافوندى قالت جىبەرمەۋگە بەل بۋىپ وتىر. دەگەنمەن ەلدەگى مارافوننىڭ دەڭگەيىنە ءالى دە كوڭىلى تولمايدى.

سالتانات تۇيتەبايەۆ، حالىقارالىق مارافون جەڭىمپازى:

- قازاقستاندا ەگەمەندىك العالى مارافون تەك الماتىدا بولدى. بيىل بەسىنشى رەت. ال ەندى سالىستىرايىق. مەن جەتە الماي جۇرگەن نيۋ-يورك مارافونىنا بيىل 120 جىل بولادى. ا ق ش- تا جىلىنا 130-140 مارافون وتەدى، ءار قالادا. نيۋ-يورككە كەلەسى جىلى جەڭۋ ءۇشىن بارامىن. شاڭىراق يەسى باعىندىرعان چەمپيوندىق بيىكتەرگە سوڭىنان ەرگەن ۇرپاعى دا ەرىپتى.

سالتانات اتانىڭ قىزى شاحماتتان حالىقارالىق دارەجەدەگى شەبەر اتانسا، جيەنى استانا قالاسىنىڭ قىزدار اراسىنداعى فۋتبول قۇراماسىنىڭ بەلدى مۇشەسى.

انەل ەلەۋسىزوۆا، نەمەرەسى:

- اتامىزدى ءبىز ماقتان تۇتامىز. مەن فۋتبولعا بارامىن دەگەن كەزدە تەك سول كىسى قولداعان بولاتىن. قازىر قالدىرماي بارلىق سايىستارىما كەلىپ وتىرادى. مەن دە ونىڭ ىزىمەن اتاقتى سپورتشى بولىپ، مارافوندارعا قاتىسقىم كەلەدى. جۇگىرۋ جولىندا ءبىر ساتكە دە دامىل تاپپايتىن سالتانات اتا ومىردە دە ءبىر ورىندا تۇرعاندى قۇپ كورمەيدى. «كۇن سايىن جۇگىرۋگە شىققاندا تۋعانداردى عانا ەمەس، كورشىلەرىمدى دە ەرتىپ اكەتەتىن بولدىم»، - دەيدى ءوزى. سوندىقتان 70 جاستىڭ جەلكەنىن كوتەرگەن اقساقالدىڭ ۇستانىمى ءار قازاقستاندىققا ۇلگى بولۋعا لايىقتى سياقتى.

اۆتورلارى: كاۋسار اياپبەرگەن قىزى،

ەرلان ناۋرىزبايەۆ

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى