شىنجاڭدىق 71 جاستاعى قارت 150 قاسقىرمەن بىرگە تاۋ اراسىندا تۇرادى - فوتو
بۇل جەردە قاسقىر باعاتىن ياڭ شاڭشىڭ ەسىمدى 71 جاستاعى قاريا تۇرادى، دەپ حابارلايدى قازاقپارات ءتىلشىسى. جاقىندا قىتايدىڭ تيان-شان اقپاراتتىق پورتالى قاسقىر باعۋعا قۇمار قاريانىڭ ومىرىمەن تانىسىپ قايتتى.
«ياڭ شاڭشىڭنىڭ «قاسقىرلى سايىندا» 8 ءتۇرلى ءبورى تۇقىمىنان 150 دەن استام جابايى قاسقىر ءومىر سۇرەدى. قاريا ءار كۇنىن جابايى جىرتقىشتارمەن بىرگە كوڭىلدى وتكىزۋدە»، دەپ جازادى دەرەككوز.
قارتتىڭ ايتۋىنشا، ول ءبورى تۇقىمىن ەڭ العاش قازاق دوسىنىڭ ۇيىنەن كورىپتى. شىنجىرلاپ بايلاۋلى تۇرعان بولتىرىككە جانى اشىپ، ونى دوسىنان باعۋعا سۇراپ العان ەكەن. ونىڭ قاسقىر باعۋعا دەگەن ىنتاسى وسىدان باستالعان.
العاشىندا تۋىستارى قارسىلىق تانىتقانىمەن ونىڭ جابايى جىرتقىشقا دەگەن قۇمارتۋشىلىعىنا ەشكىم توسقاۋىل بولا الماعان.
بۇگىندە ول ۇلكەن اڭعاردى جالعا الىپ، ارنايى ءبورى باعاتىن ورىنعا اينالدىرعان. ياڭ شاڭشىڭنىڭ ايتۋىنشا، جىرتقىشتاردىڭ ازىعىنا جىلىنا 1 ميلليون يۋان قارجى كەتەدى ەكەن. بۇل شىعىندى ول ءوزىنىڭ جەكە بيزنەسىمەن اقتايدى 
«جابايى اڭداردا ادامداردىڭ جاناشىرلىعىن سەزىنەدى جانە لايىقتى جاۋاپ تا قايتارادى. قاسقىرلار ءوز سۇيىسپەنشىلىگىن ادامعا جاقىنداپ اياعىنا ورالىپ، اقىرىن تىستەلەۋ ارقىلى بىلدىرەدى»، - دەيدى قاريا.
اۆتور: ريزابەك نۇسىپبەك ۇلى
