باتىس قازاقستاندا كيىك سانى 70 مىڭنان استى

ق ر ا ش م ورمان جانە اڭشىلىق شارۋاشىلىعى كوميتەتى وبلىستىق ورمان جانە اڭشىلىق شارۋاشىلىعى اۋماقتىق ينسپەكتسياسىنىڭ باسشىسى قايرات قادەشەۆتىڭ ايتۋىنشا، بيىل 19 ادامعا قاتىستى 18 قىلمىستىق ءىس قوزعالىپ، سونىڭ 9 ى بويىنشا تەرگەۋ امالدارى جۇرگىزىلۋدە.

سوت ۇكىمىمەن 5 ادامعا 1 جىلدان 2 جىلعا دەيىن شارتتى مەرزىم كەسىلسە، ءبىر ادام 1,5 جىلعا باس بوستاندىعىنان ايىرىلدى. جانۋارلار الەمىنە كەلتىرىلگەن زالال 13 ميلليون 374,5 مىڭ تەڭگەنى قۇرادى. 3 موتوتسيكل، 6 اڭشى مىلتىعى، تاسىمالداناتىن 2 راتسيا، 13 كيىك توشكەسى، 484 ءمۇيىز تاركىلەندى.

كيىكتى زاڭسىز اۋلاۋشىلار قاتارىندا جەرگىلىكتى براكونەرلەر عانا ەمەس، اقتوبە، اتىراۋ، جامبىل وبلىستارىنىڭ تۇرعىندارى دا كەزدەسەدى.

جالپى، كيىك قورعاۋ شارالارى دا كۇشەيتىلۋدە. بيىل «وحوتزووپروم» وندىرىستىك بىرلەستىگىنىڭ فيليالى ورالدا (بۇرىن اقتوبەگە قارايتىن) قۇرىلىپ، قازىر وندا 30 ادام جۇمىس جاساۋدا. ولار قازتالوۆ اۋدانىندا 15 كۇننەن ۆاحتالىق ادىسپەن ەڭبەك ەتەدى. 10 تەحنيكادان بولەك، كيىكتى تىكۇشاقپەن باقىلاۋدا. كيىك نەگىزىنەن قازتالوۆ، جانىبەك اۋداندارى اۋماعىن مەكەندەيدى. 2010 -جىلى 12 مىڭ، 2011 -جىلى 500 كيىك قىرىلعانىمەن، جالپى سانىنىڭ ءوسىپ كەلە جاتقانى قۋانتادى. مىسالى، وتكەن جىلى 51 مىڭداي بولسا، بيىلعى كوكتەمگى ساناق كەزىندە شامامەن 70200 گە جەتتى. كۇنى بۇگىن قازاقستاندا كيىك ەڭ كوپ تارالعان اۋماق باتىس قازاقستان وبلىسى بولىپ وتىر.

«كيىكتى ءمۇيىزى ءۇشىن اۋلايتىنى بەلگىلى. ونى سودان كەيىن زاڭسىز جولدارمەن قىتايعا اسىرادى. قازىرگى كەزدە سوت شەشىمىنە سايكەس تاركىلەنگەن مۇيىزدەر جويىلادى. ءبىزدىڭ ويىمىزشا، وسىنى فارماتسيەۆتيكالىق باعىتتا جاراتۋدىڭ جولدارىن ىزدەستىرۋ كەرەك سەكىلدى. وسىعان وراي زاڭ تەتىكتەرىن قاراستىرۋ جونىندە اۋىل شارۋاشىلىعى مينيسترلىگىنە ۇسىنىس جاسادىق»، دەدى ق. قادەشەۆ.

ايتا كەتەيىك، كيىكتى زاڭسىز اۋلاعانداردىڭ ءىسى قازىرگى تاڭدا قازتالوۆ اۋداندىق سوتىندا قارالۋ ۇستىندە.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى