ەلوردادا حالىق قاھارمانى م. التىنبايەۆتىڭ 70 جىلدىق مەرەيتويىنا ارنالعان شارا وتۋدە - فوتو
«بۇگىنگى سالتاناتتى جيىننىڭ شىمىلدىعىن اشا وتىرىپ، تورىمىزدە وتىرعان حالىق قاھارمانى ، ارميا گەنەرالى مۇحتار قاپاش ۇلى التىنبايەۆتى بۇگىنگى 70 جىلدىق بيىگىمەن شىن جۇرەگىممەن قۇتتىقتاۋعا رۇقسات ەتىڭىزدەر.
ءار سولداتتىڭ بورىشى - وتانىمىزدى قورعاۋ. ءسوزىمدى ەلباسى، باس جوعارعى قولباسشىسى نۇرسۇلتان ءابىش ۇلى نازاربايەۆتىڭ وسىناۋ قاناتتى قاعيداسىمەن ادەيى باستاپ وتىرمىن. ويتكەنى، ءبىز بەيبىت كۇننىڭ وزىندە باتىرىن ارداقتاپ، قاھارمانىن قادىرلەي بىلگەن حالىقپىز»، - دەدى مەرەيتوي يەسىن قۇتتىقتاعان ەلىمىزدىڭ قورعانىس ءمينيسترى يمانعالي تاسماعامبەتوۆ.
قورعانىس ءمينيسترى ەگەمەندىكتىڭ العاشقى جىلدارىندا م. التىنبايەۆتىڭ شەتتەگى اسكەري قىزمەتىن قيىپ، ەلباسىنىڭ ارنايى شاقىرۋمەن تۋعان ەلگە ورالعان تاڭداۋلى ازاماتتارىڭ ءبىرى بولعانىن اتاپ ءوتتى. جاڭاشىل اسكەرباسى، داڭقتى ۇشقىر كوماندير، ويشىل ماقساتكەر ازامات تاۋەلسىزدىكتىڭ ەلەڭ- الاڭىندا ەلىمىزدىڭ ءتول اسكەرىن قۇرۋعا قاتىسىپ، قارۋلى كۇشتەرىمىزدە بولعان بارلىق دەرلىك ۇردىستەردىڭ بەل ورتاسىندا جۇرگەنىن ايتتى.
«وسىلايشا، ول ەلىمىزىدىڭ ەڭ ءبىر قيىن- قىستاۋ، ياعني وتپەلى كەزەڭدەرىندە مەملەكەت قالىپتاستىرۋ ىسىنە ارالاسىپ، ەل سەنىمىن اقتاي ءبىلدى. سوندىقتان دا 2006 - جىلدىڭ 6 - مامىردا ق ر پرەزيدەنتى ن. نازاربايەۆ قورعانىس ءمينيسترى، ارميا گەنەرالى م. التىنبايەۆقا ەلىمىزدىڭ ەڭ جوعارى ماراپاتى «حالىق قاھارمانى» اتاعىن بەردى. ەلباسىنىڭ ناعىز ەرلەردى، ياعني ەلى ءۇشىن ەرلىك جاساۋعا تايسالمايتىن قازاقتىڭ رۋحى اسقاق، ءور مىنەزدى ازاماتاردى جانىنا تارتۋى كورەگەندىكتىڭ كورىنىسى»، - دەدى ي. تاسماعامبەتوۆ.
سالتاناتتى شارا بارىسىندا مەرەيتوي يەسىن ق ر قارۋلى كۇشتەرى باس شتابىنىڭ باسشىلىعى، ق ر ق ك اسكەري قىزمەتشىلەرى جانە پارلامەنت دەپۋتاتتارى قۇتىقتادى.
ايتا كەتەرلىگى، اتالعان ورتالىقتا م. التىنبايەۆتىڭ ءومىرى مەن اسكەري قىزمەتىنەن سىر شەرتەتىن فوتو كورمە ۇيىمداستىرىلعان.
