ۇلى جەڭىستىڭ 70 جىلدىعىنا ارنالعان قايىرىمدىلىق كونسەرت وتەدى
كەش «استانا وپەرا» تەاترى مالىمدەگەن ۇلى جەڭىستىڭ 70 جىلدىعىنا ارنالعان قايىرىمدىلىق كونسەرتتەر اياسىندا وتەدى. بۇل تۋرالى ەلوردا اكىمدىگىنىڭ رەسمي سايتىندا حابارلادى.
تەاتر جىل بويى وسى ايرىقشا وقيعاعا ورايلاستىرىلعان 12 كونسەرت وتكىزۋدى جوسپارلاپ وتىر. ولاردىڭ باستى ماقساتى - تىڭدارمانعا كلاسسيكالىق ونەردى تاماشالاۋعا مۇمكىندىك بەرۋ.
بۇل كۇنى تىڭدارماندار فرانتسۋز كومپوزيتورلاردىڭ شىعارماشىلىعىمەن تانىسادى.
اتاپ ايتقاندا، ەلوردالىق كورەرمەن تاماشالايتىن تۋىندىلار: گابريەل فورەنىڭ «پاۆانا»، ەرنەست شوسسوننىڭ وركەستر مەن سكريپكاعا ارنالعان پوەماسى، 25 ور. جانە جاك يبەردىڭ وركەستر مەن فلەيتاعا ارنالعان كونسەرتى، ك. سەن- سانستىڭ «اجالدىڭ ءبيى».
«پاۆانا» - بۇل ساراي ماڭىندا ورىندالاتىن يسپاندىق باياۋ ىرعاقتى ءبيى. مۋزىكا تانۋشىلاردىڭ ايتۋىنشا، گابريەل فورە اتالعان مۋزىكالىق شىعارماسى ارقىلى فرانسۋزداردىڭ يسپان مۋزىكاسىنا دەگەن قىزىعۋشىلىعىنا لايىقتى باعاسىن بەردى. تۋىندى، قۇرامىنا ىشەكتى جانە قوس-قوستان فلەيتا، گوبوي، كلارنەت، فاگوت جانە كەرنەي كىرەتىن شاعىن وركەسترگە ارنالعان. الايدا «پاۆانانىڭ» كەڭ تاراعانى سونشالىقتى، ونىڭ اسپاپتىڭ كوپتەگەن تۇرىندە ورىندالعان نۇسقالارىن كەزدەستىرۋگە بولادى.
ەرنەست شوسسوننىڭ وركەستر مەن سكريپكاعا ارنالعان پوەماسى تىڭدارماننىڭ ەرەكشە ىقىلاسىنا لايىقتى. بۇل تۋىندى الەمدىك سكريپكالىق رەپەرتۋاردا تۇراقتى ورىن تەۋىپ، قازىرگى ۋاقىتتا كومپوزيتوردىڭ ەڭ كوپ ورىندالاتىن شىعارماسى بولىپ تابىلادى. كەش باعدارلاماسىندا سونداي-اق، ⅩⅩ عاسىردىڭ ءبىرىنشى جارتىسىندا ءومىر كەشكەن بەلگىلى فرانسۋز كومپوزيتورى جاك يبەردىڭ وركەستر مەن فلەيتاعا ارنالعان كونسەرتى بار. يبەر تۋىندىنى 1932 - جىلى جازعان جانە ول XX عاسىرداعى فرانسۋز فلەيتا مەكتەبىنىڭ الىپ تۇلعالارىنىڭ ءبىرى مارسەل مويزگە ارنالعان.
