ۇلى جەڭىستىڭ 70 جىلدىعىنا وراي ۇيىمداستىرىلعان اسكەري-پاتريوتتىق ەستافەتا

بۇگىن «دوستار» مادەنيەت سارايىندا اقمولادا جاساقتالعان 72- گۆارديالىق اتقىشتار ديۆيزياسىنىڭ جاۋىنگەرلىك تۋىنىڭ كوشىرمەسىن كوكشەلىكتەر ستەپنوگورسك قالاسىنان سالتاناتتى تۇردە قابىلداپ الدى.

تاريحقا كوز جۇگىرتەر بولساق، بۇگىنگى استانا اۋماعىندا قۇرىلعان بۇل ديۆيزيا ستالينگراد ءۇشىن بولعان شايقاستا اسقان ەرلىك كورسەتتى. جاۋجۇرەك ساربازداردىڭ قاھارماندىعى ەسكەرىلىپ، 29-اتقىشتار ديۆيزياسى بولىپ قۇرىلسا، 1943-جىلدىڭ ءبىرىنشى ناۋرىزىندا 72- گۆارديالىق اتقىشتار ديۆيزياسى دەگەن مارتەبە بەرىلدى. مۇنان كەيىن ديۆيزيا كۋرسك مايدانىندا، حاركوۆ، مەرەفۋ، كراسنوگراد، كيروۆگراد قالالارىندا، دنەپر مەن يۋجنىي بۋگا وزەندەرى ماڭىندا سوعىسىپ، رۋمىنيا، ترانسيلۆانيا، ۆەنگريا، اۆستريا، چەحوسلوۆاكيانى ازات ەتۋگە قاتىسادى. ال جاۋىنگەرلەردىڭ ستالينگراد ءتۇبى مەن پراگاعا دەيىن جاساعان مايدان جولى اڭىزعا بەرگىسىز قاھارماندىققا تولى. سودان دا بولار، بۇل ديۆيزيانىڭ ساربازدارى «وتقا كۇيمەس، سۋعا باتپاس بىرەگەيلەر» اتانىپ، اتتارى شارتاراپقا جايىلدى. وسى داڭقتى قۇرىلىمنىڭ رەسەي قارۋلى كۇشتەرىنىڭ ورتالىق مۇراجايىندا ساقتالعان جاۋىنگەرلىك تۋدىڭ كوشىرمەسىن «اۋعان سوعىسى ارداگەرلەرى مەن مۇگەدەكتەرىنىڭ وداعى» قوعامدىق بىرلەستىگىنىڭ وكىلدەرى ەلگە الىپ كەلگەن ەدى. ەندى مىنە، ول رەسپۋبليكامىزداعى بارلىق اسكەري بولىمدەردى ارالاپ، وشپەس باتىرلىقتىڭ ۇلگىسىن كەيىنگى ۇرپاققا پاش ەتۋدە.

ال، بۇل ەستافەتا بۇگىنگى ءبىزدىڭ بەيبىت ءومىرىمىز ءۇشىن اجالمەن بەتپە-بەت ايقاسقا ءتۇسىپ، قاسىق قانى قالعانشا وتاندى قورعاۋدىڭ وشپەس ۇلگىسىن كورسەتكەن مايدانگەرلەردىڭ رۋحتارىنا تاعزىم ەتۋ بولىپ تابىلادى. تۋ كوشىرمەسى ۇلتتىق ۇلاننىڭ ەل اۋماعىنداعى قۇرىلىمدىق اسكەري بولىمدەرى، ارداگەرلەر ۇيىمدارى، اسكەري-پاتريوتتىق كلۋبتاردىڭ وكىلدەرى، جوعارى جانە ورتا ارناۋلى وقۋ ورىندارىنىڭ ستۋدەنتتەرمەن كەزدەسۋلەردە كورسەتىلەتىن بولادى.

جەڭىستى جاقىنداتۋعا اقمولالىق وتىز مىڭ ساربازدىڭ دا ولشەۋسىز ۇلەس قوسقانى، ونىڭ ىشىندە 45 ءىنىڭ كەڭەس وداعىنىڭ باتىرى اتانعانى بەلگىلى. اتالعان ديۆيزيا دا نەگىزىنەن ءبىزدىڭ جەرلەستەرىمىزدەن جاساقتالعان ەدى. وسىنى تىلگە تيەك ەتكەن 3517 اسكەري ءبولىمىنىڭ كومانديرى، مايور جارقىن ساپاريانوۆ ەرلىك تۋىن 5510 اسكەري ءبولىمىنىڭ كومانديرى، پودپولكوۆنيك جانبولات تولەگەنوۆكە تابىس ەتتى. ول دا ءوز كەزەگىندە تەڭدەسسىز باتىرلىق ۇلگىسىنەن قالعان بۇل ەستەلىكتىڭ تەك ەسكەرتكىش بەلگى رەتىندە قالۋىن، ەندىگى ۇرپاقتىڭ تەك بەيبىت كۇندى عانا كورۋىن تىلەدى.

بۇل پىكىردى جان الىسىپ، جان بەرىسكەن سول قيان-كەسكى شايقاستاردى ءوز كوزىمەن كورگەن مايدانگەر مولداعالي قاجىموۆ تا قولداي ءتۇستى. نەبارى ون سەگىز جاسىندا سوعىسقا اتتانعان سارباز سول اۋىر جىلداردى جانە قارۋلاستارىن اۋىر كۇرسىنىسپەن ەسكە الىپ، بۇگىنگى ساربازداردىڭ وتان الدىنداعى بورىشتارىن ابىرويمەن وتەپ، اماندىقپەن ۇيلەرىنە ورالۋلارىنا تىلەكتەستىگىن ءبىلدىردى. ال، 5510 اسكەري بولىمىندە بورىشىن وتەۋشى اتىراۋلىق ادىلەت سەرىكاليەۆ جاۋىنگەرلىك تۋ كوشىرمەسىنىڭ سول جىلدارداعى ەرلىكتىڭ كۋاگەرىندەي ەكەنىن، ونى كورىپ، ەرەكشە جىگەرلەنگەنىن اتاپ ءوتتى. ەندى انتقا ادال بولۋ باستى مىندەت. بىزدەن كەيىن جاۋىنگەرلىك تۋدىڭ كوشىرمەسى پەتروپاۆل قالاسىنا جول تارتپاق. جالپى، ول ۇلان-عايىر قازاق دالاسىنىڭ 25 قالاسىن ارالاپ، جەڭىس كۇنى قارساڭىندا ەلورداعا جەتكىزىلەدى دەپ جوسپارلانعان.

اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى